خروج 40 - Sindhi Bible

¹ پوءِ خداوند موسيٰ کي فرمايو، ۽ چيائينس تہ

² تون پهرين تاريخ جماعت واري تنبوءَ ۾ عبادت جو خيمو کڙو ڪج.

³ ۽ تون انهي ۾ شاهديءَ جي صندوق رکج، ۽ صندوق کي پردي سان ڍڪي ڇڏج.

⁴ ۽ تون ميز اندر آڻي، انهيءَ جون شيون مٿس ٺاهي جوڙي رکج؛ ۽ شمعدان اندر آڻي، انهي جا ڏيئا ٻارج.

⁵ ۽ تون شاهديءَ جي صندوق جي اڳيان، لوبان ساڙڻ لاءِ، سوني قربانگاهہ رکج، ۽ خيمي جي در جو پردو ٽنگي ڇڏج.

⁶ ۽ تون جماعت واري تنبوءَ جي خيمي جي در جي اڳيان، سوختني قربانيءَ واري قربانگاهہ رکج.

⁷ ۽ تون جماعت واري تنبوءَ ۽ قربانگاهہ جي وچ ۾ حوض رکج، ۽ انهي ۾ پاڻي وجهي ڇڏج.

⁸ ۽ تون چوڌاري اڱڻ بيهارج، ۽ اڱڻ جي دروازي تي پردو ٽنگي ڇڏج.

⁹ ۽ تون مسح ڪرڻ جو تيل کڻي، عبادت جي خيمي کي، ۽ جيڪي شيون منجهس آهن، تن سڀني کي مسح ڪج، ۽ انهي کي ۽ انهي جي سڀ سامان کي پاڪ ڪج؛ پوءِ اهو پاڪ ٿيندو.

¹⁰ ۽ تون سوختني قربانيءَ واريءَ قربانگاهہ کي، ۽ انهيءَ جي سڀني ٿانون کي بہ مسح ڪج: پوءِ قربانگاهہ تمام پاڪ ٿيندي.

¹¹ ۽ تون حوض ۽ انهي جي صندليءَ کي بہ مسح ڪج، ۽ انهي کي پاڪ ڪج.

¹² ۽ تون هارون ۽ سندس پٽن کي جماعت واري تنبوءَ جي در وٽ آڻي، کين پاڻيءَ سان غسل ڏج:

¹³ ۽ تون هارون کي پاڪ پوشاڪ ڍڪائج، ۽ کيس مسح ڪري پاڪ ڪج، تہ هو ڪهانت جي درجي تي منهنجي خدمت ڪري.

¹⁴ ۽ تون هن جي پٽن کي آڻي کين پهراڻ ڍڪائج،

¹⁵ ۽ تون انهن کي بہ سندن پيءُ وانگر مسح ڪج، تہ هو ڪهانت جي درجي تي منهنجي خدمت ڪن: ۽ اها مساحت هنن جي لاءِ، سندن پيڙهين ۾ هميشہ جي لاءِ، ڪهانت جو نشان ٿيندي.

¹⁶ سو موسيٰ ائين ڪيو، يعني جيئن خداوند کيس فرمايو هو، تيئن ئي ڪيائين.

¹⁷ ۽ ٻئي سال جي پهرئين مهيني جي پهرين تاريخ هيئن ٿيو، جو عبادت جو خيمو کڙو ڪيو ويو،

¹⁸ ۽ موسيٰ خيمي کي کڙو ڪري بيهاريو، ۽ انهي جا کوپا وڌائين، ۽ انهي جا ٺاٺ بيهاريائون، ۽ انهي جا گز وڌائين، ۽ انهي جا ٿنڀ کڙا ڪيائين.

¹⁹ ۽ هن خيمي جي مٿان تنبو پکيڙيو، ۽ انهي جي مٿان تنبوءَ جو ڍڪ وڌائين؛ جيئن ڪ خداوند موسيٰ کي فرمايو هو.

²⁰ ۽ هن شاهديءَ جون تختيون کڻي صندوق ۾ وڌيون، ۽ ڏنڊا صندوق مان لنگهايائين، ۽ صندوق جي مٿان رحمت جو پوش رکيائين؛

²¹ پوءِ صندوق خيمي ۾ کڻي آيو، ۽ پردو وجهي شاهديءَ جي صندوق ڍڪي ڇڏيائين؛ جيئن ڪ خداوند موسيٰ کي فرمايو هو.

²² ۽ هن جماعت واري تنبوءَ ۾، خيمي جي اُتر واري پاسي، پردي جي ٻاهران ميز رکي،

²³ ۽ انهيءَ تي خداوند جي حضور ۾ ماني ٺاهي جوڙي رکيائين؛ جيئن ڪ خداوند موسيٰ کي فرمايو هو.

²⁴ ۽ هن جماعت واري تنبو ۾، خيمي جي ڏکڻ واري پاسي، شمعدان رکيو،

²⁵ ۽ خداوند جي حضور ۾ ڏيئا ٻاريائين؛ جيئن ڪ خداوند موسيٰ کي فرمايو هو.

²⁶ ۽ هن جماعت واري تنبوءَ ۾، پردي جي سامهون، سوني قربانگاهہ رکي،

²⁷ ۽ انهيءَ تي خوشبودار مصالحن جو لوبان ساڙيائين؛ جيئن ڪ خداوند موسيٰ کي فرمايو هو.

²⁸ ۽ هن، خيمي جي در تي پردو ٽنگيو.

²⁹ ۽ هن جماعت واري تنبوءَ جي خيمي جي در وٽ سوختني قربانيءَ واري قربانگاهہ رکي، ۽ انهيءَ تي سوختني قرباني چاڙهيائين؛ جيئن ڪ خداوند موسيٰ کي فرمايو هو.

³⁰ ۽ هن جماعت واري تنبوءَ ۽ قربانگاهہ جي وچ ۾، حوض رکيو، ۽ انهي ۾ ڌوئڻ جي لاءِ پاڻي وڌائين.

³¹ ۽ موسيٰ، ۽ هارون، ۽ سندس پٽن انهي تي پنهنجا هٿ ۽ پير ڌوتا؛

³² جڏهن هو جماعت واري تنبوءَ ۾، ۽ قربانگاهہ جي ويجهو آيا، تڏهن پنهنجا هٿ پير ڌوتائون؛ جيئن ڪ خداوند موسيٰ کي فرمايو هو.

³³ ۽ هن عبادت جي خيمي ۽ قربانگاهہ جي آس پاس، اڱڻ کڙو ڪيو، ۽ اڱڻ جي دروازي تي پردو ٽنگي ڇڏيائين. انهيءَ طرح موسيٰ سمورو ڪم پورو ڪيو.

³⁴ تڏهن ڪڪر جماعت واري تنبوءَ کي ڍڪي ڇڏيو، ۽ عبادت جو خيمو خداوند جي جلال سان ڀرجي ويو.

³⁵ ۽ موسيٰ جماعت واري تنبوءَ ۾ گهڙي نہ سگهيو، ڇالاءِ جو انهي جي مٿان ڪڪر بيٺل هو، ۽ خيمو خداوند جي جلال سان ڀريل هو.

³⁶ جڏهن ڪڪر خيمي تان مٿي کڄي ويندو هو، تڏهن بني اسرائيل پنهنجيءَ مسافريءَ ۾ اڳتي وڌندا هئا،

³⁷ پر جي ڪڪر نہ کڄندو هو، تہ جنهن ڏينهن تائين اهو مٿي نہ کڄندو هو، تنهن ڏينهن تائين هو سفر نہ ڪندا هئا.

³⁸ ڇالاءِ تہ اسرائيل جي سڄي گهراڻي جي سامهون، سندن مسافري ۾، ڏينهن جو خداوند جو ڪڪر خيمي تي بيٺو رهندو هو، ۽ رات جو انهيءَ ۾ باهہ رهندي هئي.