خروج 38 - Sindhi Bible

¹ ۽ هن سوختني قربانيءَ جي لاءِ ٻٻر جي ڪاٺ جي قربانگاهہ جوڙي؛ انهيءَ جي ڊيگهہ پنج هٿ هئي، ۽ اها چورس هئي، ۽ انهيءَ جي اوچائي ٽي هٿ هئي.

² ۽ هن انهيءَ جي چئن ئي ڪنڊن تي سڱ جوڙيا؛ انهيءَ جا سڱ انهي ساڳئي هڪڙي ئي ٽڪر مان جڙيل هئا، ۽ هن انهيءَ تي پتل جو پٽ چاڙهيو.

³ ۽ هن قربانگاهہ جا سڀ ٿانو، يعني رک کڻڻ جا ٿانو، ڪوڏاريون، ٿالهہ، گوشت ٽنگڻ جا ڪنڍا، ۽ منگالا جوڙيا: اهي سڀ ٿانو هن پتل جا جوڙيا.

⁴ ۽ هن قربانگاهہ جي لاءِ هڪڙو پتل جو ڄاريدار آتشدان جوڙيو، جو انهيءَ ۾ چوڌاري ڪناري جي هيٺان اڌ تائين هو.

⁵ ۽ هن پتل جي آتشدان جي چئن ڪنڊن لاءِ چار پلٽيل ڇلا جوڙيا، تہ ڏنڊن وجهڻ جون جايون ٿين.

⁶ ۽ هن ٻٻر جي ڪاٺيءَ جا ڏنڊا جوڙيا، ۽ انهن تي پتل جو پٽ چاڙهيائين.

⁷ ۽ هن اهي ڏنڊا قربانگاهہ جي کڻڻ جي لاءِ انهيءَ جي پاسن وارن ڇلن ۾ وڌا؛ ۽ هن اها تختن جي کوکي وانگر جوڙي.

⁸ ۽ هن پتل جو هڪڙو حوض، ۽ انهي جي لاءِ پتل جي صندلي جوڙي؛ هن اهي جماعت واري تنبوءَ جي در تي، جيڪي زالون خدمت ڪنديون هيون، تن جي آرسين مان جوڙيا.

⁹ ۽ هن اڱڻ بہ جوڙيو؛ انهي جا پردا سنهي وٽيل سڻيءَ جا هئا؛ ڏاکڻي پاسي ڏکڻ ڏانهن پردن جي ڊيگهہ هڪ سؤ هٿ هئي.

¹⁰ انهن جا ويهہ ٿنڀ هئا، جن جي لاءِ پتل جا ويهہ کوپا هئا؛ ٿنڀن جا ڪنڍا ۽ انهن جا بند چانديءَ جا هئا.

¹¹ ۽ اُتر واري پاسي جي لاءِ بہ هڪ سؤ هٿ ڊگها پردا هئا، ۽ انهن جا ويهہ ٿنڀ هئا، جن جي لاءِ پتل جا ويهہ کوپا هئا؛ ٿنڀن جا ڪنڍا ۽ انهن جا بند چانديءَ جا هئا.

¹² ۽ الهندي واري پاسي لاءِ پنجاهہ هٿ ڊگها پردا هئا؛ انهن جا ڏهہ ٿنڀ ۽ انهن جا ڏهہ کوپا هئا؛ ٿنڀن جا ڪنڍا ۽ انهن جا بند چانديءَ جا هئا.

¹³ ۽ اڀرندي واري پاسي اڀرندي ڏانهن بہ اهي پنجاهہ هٿ ڊگها هئا.

¹⁴ دروازي جي هڪڙي پاسي لاءِ پندرهن هٿ ڊگها پردا هئا؛ انهن جا ٽي ٿنڀ، ۽ انهن جا ٽي کوپا هئا.

¹⁵ ساڳيءَ طرح دروازي جي ٻئي پاسي لاءِ بہ هئا: اڱڻ جي دروازي جي ٻنهي پاسن لاءِ پندرهن پندرهن هٿ ڊگها پردا، ٽي ٽي ٿنڀ، ۽ انهن جا ٽي ٽي کوپا هئا.

¹⁶ اڱڻ جي چوڌاري سڀيئي پردا سنهي وٽيل سڻيءَ جا هئا.

¹⁷ ۽ ٿنڀن جا کوپا پتل جا هئا، ۽ ڪنڍا، ۽ انهن جا بند چانديءَ جا هئا؛ ۽ انهن جي چوٽيءَ تي چانديءَ جو پٽ چاڙهيل هو؛ ۽ اڱڻ جي سڀني ٿنڀن کي چانديءَ جا بند پيل هئا.

¹⁸ ۽ اڱڻ جي دروازي لاءِ زردوزي ڪم جو پردو هو، جو آسماني، واڱڻائي، ۽ قرمزي رنگ، ۽ سنهي وٽيل سڻيءَ جو هو؛ انهي جي ڊيگهہ ويهہ هٿ هئي؛ ۽ اوچائي، اڱڻ جي پردن جي ويڪر موجب، پنج هٿ هئي.

¹⁹ ۽ انهي جا چار ٿنڀ هئا؛ ۽ انهن لاءِ پتل جا چار کوپا هئا؛ انهن جا ڪنڍا، ۽ انهن جا بند، ۽ چوٽيءَ جو ڍڪ، اهي سڀ چانديءَ جا هئا.

²⁰ ۽ خيمي جون ڪليون، ۽ چوڌاري اڱڻ جون ڪليون، سڀ پتل جون هيون.

²¹ عبادت جي خيمي، يعني شاهديءَ جي خيمي جو تفصيل اهو آهي: جيڪي شيون موسيٰ جي حڪم موجب لاوين جي خدمت لاءِ هارون ڪاهن جي پٽ اتمر جي هٿان شمار ڪيون ويون،

²² ۽ جنهن بابت خداوند موسيٰ کي حڪم ڏنو هو، سو سڀ، يهوداهہ جي قبيلي واري بضلي ايل بن اوري بن حور جوڙيو؛

²³ ۽ دان جي قبيلي واري اخيسمڪ جو پٽ اهلياب بہ هن سان گڏ هو، جو اُڪرڻ جو ڪم ڪندڙ، ۽ هوشيار ڪاريگر هو؛ ۽ آسماني، واڱڻائي، ۽ قرمزي رنگ، ۽ سنهي وٽيل سڻيءَ جي ڪپڙي تي زردوزيءَ جو ڪم ڪندڙ هو.

²⁴ جيڪو سون عبادتگاهہ جي سڀني ڪمن ۾ استعمال ڪيو ويو، يعني نذراني وارو سون، سو سڀ اوڻٽيهہ قنطار ۽ ست سؤ ٽيهہ مشقال هو؛ ۽ اهي مشقال عبادتگاهہ جي مشقال جهڙا هئا.

²⁵ ۽ جماعت جي شمار ڪيل سڀ چاندي، هڪ سؤ قنطار، ۽ هڪ هزار ست سؤ پنجهتر مشقال هئي، ۽ اهي مشقال عبادتگاهہ جي مشقال جهڙا هئا.

²⁶ جن ماڻهن جي عمر ويهہ سال ۽ انهي کان وڌيڪ هئي، ۽ شمار ٿيندڙن ۾ داخل ٿيا هئا، تن جو تعداد ڇهہ لک ٽي هزار ۽ ساڍا پنج سؤ هو: انهن مان هر ڪنهن ماڻهوءَ هڪ بقع، يعني عبادتگاهہ جي مشقال جهڙو اڌ مشقال ڏنو هو.

²⁷ ۽ سؤ قنطار چانديءَ مان پاڪ مڪان، ۽ پردي جا کوپا، پلٽي ٺاهيا ويا؛ هڪ سؤ کوپا، سؤ قنطارن مان؛ هڪ کوپو، هڪ قنطار مان.

²⁸ ۽ هن هڪ هزار ست سؤ پنجهتر مشقالن مان، ٿنڀن جا ڪنڍا، ۽ انهن جا بند جوڙيا، ۽ انهن جي چوٽين تي پٽ چاڙهيائين.

²⁹ ۽ نذراني وارو پتل، ستر قنطار ۽ ٻہ هزار چار سؤ مشقال هو؛

³⁰ انهي مان هن جماعت واري تنبوءَ جي در جا کوپا، ۽ پتل جي قربانگاهہ، ۽ انهيءَ جي لاءِ پتل جو آتشدان، ۽ قربانگاهہ جا سڀ ٿانو جوڙيا:

³¹ ۽ هن چوڌاري اڱڻ جا کوپا، ۽ اڱڻ جي دروازي جا کوپا، ۽ خيمي جون ڪليون، ۽ چوڌاري اڱڻ جون ڪليون، اهي سڀ جوڙيائين.