خروج 37 - Sindhi Bible

¹ ۽ بضلي ايل ٻٻر جي ڪاٺ جي صندوق جوڙي؛ انهيءَ جي ڊيگهہ اڍائي هٿ، ۽ ويڪر ڏيڍ هٿ، ۽ اوچائي بہ ڏيڍ هٿ هئي.

² ۽ هن انهيءَ کي اندران ۽ ٻاهران سون جو پٽ چاڙهيو، ۽ انهيءَ جي مٿان چوڌاري سون جو ڇٽ رکيائين.

³ ۽ انهيءَ جي چئن ئي پاون لاءِ سون جا چار پلٽيل ڪڙا جوڙيائين، ٻہ ڪڙا هڪڙي پاسي، ۽ ٻہ ڪڙا ٻئي پاسي لاءِ.

⁴ ۽ هن ٻٻر جي ڪاٺيءَ جا ڏنڊا جوڙيا، ۽ انهن تي بہ سون جو پٽ چاڙهيائين.

⁵ ۽ اهي ڏنڊا صندوق جي کڻڻ لاءِ انهيءَ جي پاسن وارن ڪڙن ۾ وڌائين.

⁶ ۽ هن نج سون جو رحمت جو پوش جوڙيو؛ انهي جي ڊيگهہ اڍائي هٿ، ۽ ويڪر ڏيڍ هٿ هئي.

⁷ ۽ هن سون جا ٻہ ڪروبي جوڙيا؛ اهي رحمت جي پوش جي ٻنهي ڇيڙن تي گهڙيل سون جا هئا،

⁸ هڪڙو ڪروبي هڪڙي ڇيڙي تي، ۽ ٻيو ڪروبي ٻئي ڇيڙي تي هو؛ هن ٻنهي ڇيڙن تي اهي ٻئي ڪروبي، انهي ساڳئي ٽڪر مان، رحمت جي پوش سان گڏيل جوڙيا.

⁹ انهن ڪروبين جا پر رحمت جي پوش جي مٿان پکڙيل هئا، ۽ سندن منهن هڪ ٻئي جي سامهون، رحمت جي پوش ڏانهن هئا.

¹⁰ ۽ هن ٻٻر جي ڪاٺ جي ميز جوڙي؛ انهيءَ جي ڊيگهہ ٻہ هٿ، ۽ ويڪر هڪ هٿ، ۽ اوچائي ڏيڍ هٿ هئي؛

¹¹ ۽ هن انهيءَ تي نج سون جو پٽ چاڙهيو، ۽ انهيءَ جي چوڌاري سون جو ڇٽ جوڙيائين.

¹² ۽ انهيءَ جي چوڌاري چار آڱر ويڪري ڪناري جوڙيائين، ۽ انهيءَ ڪناريءَ جي آس پاس سون جا ڇٽ جوڙيائين.

¹³ ۽ هن انهيءَ جي لاءِ سون جا چار پلٽيل ڪڙا جوڙيا، ۽ اهي ڪڙا انهيءَ جي چئن پاون جي چئن ڪنڊن ۾ وڌائين.

¹⁴ اهي ڪڙا ڪناريءَ جي ويجهو، ميز جي کڻڻ لاءِ، ڏنڊن وجهڻ جي جاين واسطي هئا.

¹⁵ ۽ هن ميز جي کڻڻ لاءِ ٻٻر جي ڪاٺيءَ جا ڏنڊا جوڙيا، ۽ انهن تي سون جو پٽ چاڙهيائين.

¹⁶ ۽ هن ميز تي رکڻ لاءِ ٿانو جوڙيا، يعني انهيءَ جون رڪابيون، چمچا، وٽا، ۽ اوتڻ لاءِ پيالا، اهي سڀ نج سون جا جوڙيائين.

¹⁷ ۽ هن نج سون جو شمعدان جوڙيو: اهو شمعدان گهڙيل ڪم جو هو؛ ۽ انهي جو ٿُڙ، شاخون، ڏياٽيون، بونبا ۽ گل، اهي سڀ هڪڙي ئي ٽڪر مان جوڙيل هئا.

¹⁸ ۽ انهي جي پاسن کان ڇهہ شاخون ٻاهر نڪتل هيون، يعني شمعدان جون ٽي شاخون هڪڙي پاسي کان ٻاهر نڪتل هيون، ۽ ٽي شاخون ٻئي پاسي کان؛

¹⁹ ۽ ٽي ڏياٽيون باداميءَ جي گلن جهڙيون، هڪڙي بونبي، ۽ هڪڙي گل سميت، هڪڙي شاخ ۾ هيون، ۽ ٽي ڏياٽيون باداميءَ جي گلن جهڙيون، هڪڙي بونبي، ۽ هڪڙي گل سميت، ٻي شاخ ۾ هيون: اهڙيءَ طرح شمعدان جون ڇهہ شاخون جيڪي ٻاهر نڪتل هيون تن ۾ ڏياٽيون هيون.

²⁰ ۽ چار ڏياٽيون باداميءَ جي گلن جهڙيون، بونبن ۽ گلن سميت، شمعدان جي وچ ۾ جڙيل هيون:

²¹ ۽ ٻن شاخن جي هيٺان هڪڙو بونبو انهي ساڳئي ٽڪر مان جڙيل هو، ۽ ٻين ٻن شاخن جي هيٺان هڪڙو بونبو انهيءَ ساڳئي ٽڪر مان جڙيل هو، ۽ ٽين ٻن شاخن جي هيٺيان بہ هڪڙو بونبو انهي ساڳئي ٽڪر مان جڙيل هو. اهڙيءَ طرح شمعدان مان نڪتل ڇهن ئي شاخن جي هيٺان بونبا هئا.

²² انهي جون شاخون، ۽ انهي جا بونبا انهي ساڳئي، هڪڙي ئي ٽڪر مان جڙيل هئا، اهي سڀيئي نج سون جي هڪڙي ئي ٽڪر مان گهڙيل هئا.

²³ ۽ هن انهي جي لاءِ ست ڏيئا جوڙيا، ۽ انهن جي ڦلن لاهڻ جا چمٽا، ۽ رڪابيون نج سون جون جوڙيائين.

²⁴ هن اهو، ۽ انهي جا سڀ ٿانو، نج سون جي هڪڙي قنطار مان جوڙيا.

²⁵ ۽ هن ٻٻر جي ڪاٺ مان لوبان ساڙڻ جي لاءِ هڪڙي قربانگاهہ جوڙي؛ انهيءَ جي ڊيگهہ هڪڙو هٿ، ۽ ويڪر بہ هڪڙو هٿ هئي، ۽ اها چورس هئي؛ ۽ انهيءَ جي اوچائي ٻہ هٿ هئي؛ ۽ انهيءَ جا سڱ انهي ساڳئي هڪڙي ئي ٽڪر مان جڙيل هئا.

²⁶ ۽ هن انهيءَ تي نج سون جو پٽ چاڙهيو، جو انهيءَ جي مٿان، ۽ چئن پاسن تي، ۽ سڱن تي هو؛ ۽ انهيءَ جي مٿان چوڌاري سون جو ڇٽ جوڙيائين.

²⁷ ۽ هن انهي جي لاءِ ڇٽ جي هيٺان ٻنهي پاسي، سندس ٻن پٽين تي سون جا ٻہ ڇلا جوڙيا، تہ انهيءَ جي کڻڻ لاءِ ڏنڊن وجهڻ جون جايون ٿين.

²⁸ ۽ هن ٻٻر جي ڪاٺيءَ جا ڏنڊا جوڙيا، ۽ انهن تي سون جو پٽ چاڙهيائين.

²⁹ ۽ هن عطارن جي هنر موجب، مسح ڪرڻ جو پاڪ تيل ۽ خوشبودار مصالحن جو لوبان جوڙيو.