Biblia Todo Logo
Bìoball air-loidhne

- Sanasan -

خروج 31 - Sindhi Bible

1 پوءِ خداوند موسيٰ کي فرمايو ۽ چيائينس تہ

2 ڏس، مون يهوداہ جي قبيلي واري بضلي ايل بن اوري بن حور کي نالو وٺي سڏيو آهي:

3 ۽ مون هن کي دانائيءَ، سمجهہ، علم ۽ هر ڪنهن قسم جي ڪاريگريءَ ۾ خدا جي روح سان ڀرپور ڪيو آهي،

4 انهي لاءِ تہ هوشياريءَ ۽ ڪاريگريءَ جا ڪم رٿي، ۽ سون، چانديءَ ۽ پتل جو ڪم ڪري،

5 ۽ جواهرن کي جڙڻ لاءِ گهڙي تيار ڪري، ۽ ڪاٺ جي اُڪرڻ ۾ هر ڪنهن قسم جي ڪاريگريءَ جو ڪم ڪري.

6 ۽ ڏس مون دان جي قبيلي واري، اخيسمڪ جي پٽ اهلياب کي، هن سان گڏ مقرر ڪيو آهي؛ ۽ سڀني هوشيار ماڻهن جي دلين ۾ هنر وڌو اٿم، انهي لاءِ تہ جنهن جو مون توکي حڪم ڏنو آهي، سو سڀ جوڙي تيار ڪن.

7 يعني جماعت وارو تنبو، ۽ شاهديءَ جي صندوق، ۽ انهيءَ تي جيڪو رحمت جو پوش آهي سو، ۽ تنبوءَ جو سامان،

8 ۽ ميز ۽ انهيءَ جا ٿانو، ۽ نج سون جو شمعدان، ۽ انهي جا سڀ ٿانو، ۽ لوبان واري قربانگاهہ،

9 ۽ سوختني قربانيءَ واري قربانگاهہ، ۽ انهيءَ جا سڀ ٿانو، ۽ حوض ۽ انهي جي صندلي،

10 ۽ سنها سوٽي ڪپڙا، ۽ ڪهانت جو ڪم ڪرڻ لاءِ هارون ڪاهن جي پوشاڪ، ۽ سندس پٽن جون پوشاڪون،

11 ۽ مسح ڪرڻ جو تيل، ۽ پاڪ مڪان لاءِ خوشبودار مصالحن جو لوبان: اهي سڀ، جيئن مون توکي حڪم ڏنو آهي تيئن هو تيار ڪن.

12 پوءِ خداوند موسيٰ کي فرمايو ۽ چيائينس تہ،

13 تون بني اسرائيل کي هيئن بہ چئُہ تہ اوهين منهنجا سبت جا ڏينهن ضرور مڃيندا رهجو، ڇالاءِ جو اوهان جي سڀني پيڙهين ۾ اها منهنجي ۽ اوهان جي وچ ۾ هڪڙي نشاني آهي، تہ اوهان کي خبر پوي تہ آءٌ اُهو خداوند آهيان، جو اوهان کي پاڪ ٿو ڪريان.

14 تنهنڪري اوهين سبت جو ڏينهن قائم رکجو، ڇو تہ اهو اوهان جي لاءِ پاڪ آهي؛ جيڪو بہ انهي کي ناپاڪ ڪندو سو ضرور ماريو ويندو؛ جيڪو انهي ڏينهن ڪو ڪم ڪندو، سو پنهنجيءَ قوم مان تباهہ ڪيو ويندو.

15 ڇهہ ڏينهن ڪم ڪار ڪيو وڃي؛ پر ستون ڏينهن پوري آرام جي لاءِ سبت آهي، اهو خداوند جي لاءِ پاڪ آهي: جيڪو سبت جي ڏينهن ڪو ڪم ڪندو، سو ضرور ماريو ويندو.

16 تنهنڪري بني اسرائيل سبت جو ڏينهن قائم رکن، ۽ انهي کي پنهنجين سڀني پيڙهين جي لاءِ هميشہ جو عهد سمجهي مڃيندا رهن.

17 اها منهنجي ۽ بني اسرائيل جي وچ ۾ هميشہ جي لاءِ هڪڙي نشاني آهي، ڇالاءِ جو ڇهن ڏينهن ۾ خداوند آسمان ۽ زمين کي جوڙيو ۽ ستين ڏينهن فارغ ٿيو، ۽ آرام ورتائين.

18 جڏهن هو سينا جبل تي موسيٰ کي سڀ ڳالهيون ٻڌائي رهيو، تڏهن هن کي شاهديءَ جون ٻہ تختيون، يعني خدا جي آڱر سان لکيل ٻہ پهڻ جون تختيون ڏنائين.

Sindhi Bible © Pakistan Bible Society, 1954,1962.

Pakistan Bible Society
Lean sinn:



Sanasan