خروج 25 - Sindhi Bible

¹ ۽ خداوند موسيٰ کي فرمايو تہ

² بني اسرائيل کي چئُہ تہ منهنجي لاءِ نذرانو آڻين، جيڪو ماڻهو پنهنجيءَ دل جي خوشيءَ سان جيڪو نذرانو آڻي، سو اوهين هن کان وٺو.

³ جيڪي شيون اوهين هنن کان نذراني طور وٺندا، سي هي آهن: سون، چاندي ۽ پتل؛

⁴ آسماني، واڱڻائي ۽ قرمزي رنگ جو ڪپڙو، سڻي ۽ ڏاس؛

⁵ گهيٽن جون ڳاڙهيون رڱيل کلون، ۽ مل ار مڇيءَ جون کلون ۽ ٻٻر جون ڪاٺيون؛

⁶ ڏيئن لاءِ تيل، مسح ڪرڻ جي لاءِ تيل ۽ لوبان لاءِ مصالحہ؛

⁷ ۽ ايفود ۽ سينہ بند ۾ جڙڻ لاءِ سليماني پهڻ.

⁸ ۽ هو پنهنجي لاءِ هڪڙو پاڪ مڪان جوڙين، تہ آءٌ سندن وچ ۾ رهان.

⁹ انهي خيمي جو نمونو ۽ انهي جي ٻئي سامان جو نمونو، جيئن آءٌ توکي ڏيکاريان، تيئن ئي اوهين جوڙيو.

¹⁰ هو ٻٻر جي ڪاٺ جي هڪڙي صندوق جوڙين، جنهن جي ڊيگهہ اڍائي هٿ ۽ ويڪر ڏيڍ هٿ ۽ اوچائي بہ ڏيڍ هٿ هجي.

¹¹ ۽ تون انهيءَ تي اندران ۽ ٻاهران نج سون جو پٽ چاڙهج، ۽ انهيءَ جي مٿان چوڌاري سون جو ڇٽ جوڙج.

¹² ۽ تون انهيءَ جي لاءِ سون جا چار ڪڙا، پلٽي ٺاهي، انهيءَ جي چئن ئي پاون ۾، ٻہ هڪڙي پاسي ۽ ٻہ ٻئي پاسي وجهج.

¹³ ۽ تون ٻٻر جي ڪاٺ جا ٻہ ڏنڊا ٺاهي، انهن تي سون جو پٽ چاڙهج.

¹⁴ ۽ اهي ڏنڊا انهيءَ صندوق جي کڻڻ لاءِ، صندوق جي پاسن تي انهن ڪڙن ۾ وجهج.

¹⁵ اهي ڏنڊا صندوق جي ڪڙن ۾ پيا ئي هجن ۽ انهن مان اصل ڪڍيا نہ وڃن.

¹⁶ ۽ جيڪو عهدنامو آءٌ توکي ڏيان، سو تون انهيءَ صندوق ۾ رکج.

¹⁷ ۽ تون نج سون مان رحمت جو پوش جوڙج: انهي جي ڊيگهہ اڍائي هٿ ۽ ويڪر ڏيڍ هٿ هجي.

¹⁸ ۽ تون سون جا ٻہ ڪروبي جوڙج، اهي رحمت جي پوش جي ٻنهي ڇيڙن تي گهڙيل سون جا جوڙج.

¹⁹ ۽ تون هڪڙو ڪروبي هڪڙي ڇيڙي تي ۽ ٻيو ڪروبي ٻئي ڇيڙي تي جوڙج. ٻنهي ڇيڙن تي اهي ڪروبي، انهي ساڳئي ٽڪر مان، رحمت جي پوش سان گڏيل جوڙج.

²⁰ انهن ڪروبين جا پر رحمت جي پوش جي مٿان پکڙيل هجن، جيئن ڪ اهو ڍڪجي وڃي، ۽ ڪروبين جا منهن هڪ ٻئي جي سامهون، رحمت جي پوش ڏانهن هجن.

²¹ ۽ تون اُهو رحمت جو پوش صندوق جي مٿان رکج، ۽ جيڪو عهدنامو آءٌ توکي ڏيان، سو انهيءَ صندوق ۾ رکج.

²² ۽ اتي يعني رحمت جي پوش جي مٿان، شاهديءَ جي صندوق تي جيڪي ٻہ ڪروبي هوندا، تن جي وچ ۾ آءٌ توکي گڏبس، ۽ جن ڳالهين بابت بني اسرائيل جي لاءِ توکي حڪم ڏيڻا هوندم، تن بابت تو سان گفتگو ڪندس.

²³ ۽ تون ٻٻر جي ڪاٺ جي هڪڙي ميز جوڙج: انهيءَ جي ڊيگهہ ٻہ هٿ، ويڪر هڪ هٿ، ۽ اوچائي ڏيڍ هٿ هجي.

²⁴ انهيءَ تي نج سون جو پٽ چاڙهج، ۽ انهيءَ جي مٿان بہ چوڌاري سون جو ڇٽ جوڙج.

²⁵ ۽ انهيءَ جي آس پاس چار آڱر ويڪري ڪناري جوڙج، ۽ انهيءَ ڪناريءَ جي چوڌاري بہ سون جو ڇٽ جوڙج.

²⁶ ۽ انهي جي لاءِ سون جا چار ڪڙا ٺاهي، انهيءَ جي چئن پاون جي چئن ئي ڪنڊن ۾ وجهج.

²⁷ اهي ڪڙا ڪناري جي ويجهو هجن، تہ ميز کي کڻڻ جي لاءِ ڏنڊن وجهڻ جي جاءِ رهي.

²⁸ ۽ تون ٻٻر جي ڪاٺ مان ڏنڊا ٺاهي، انهن تي سون جو پٽ چاڙهج تہ انهن سان اها ميز کڻن.

²⁹ ۽ تون انهيءَ تي رکڻ لاءِ رڪابيون، چمچا ۽ اوتڻ لاءِ پيالا جوڙج؛ ۽ اهي نج سون جا جوڙج.

³⁰ ۽ تون انهيءَ ميز تي هميشہ منهنجي حضور ۾ نذراني جي ماني رکندو رهج.

³¹ ۽ تون نج سون جو هڪڙو شمعدان جوڙج، اهو شمعدان گهڙيل سون جو هجي؛ انهي جو ترو، ۽ ٿُڙ، ۽ ڏياٽيون ۽ بونبا ۽ گل، اهي سڀ هڪڙي ئي ٽڪر مان گهڙيل هجن.

³² ۽ انهي جي پاسن کان ڇهہ شاخون ٻاهر نڪتل هجن، يعني شمعدان جون ٽي شاخون هڪڙي پاسي کان ٻاهر نڪتل هجن، ۽ ٽي شاخون ٻئي پاسي کان.

³³ ۽ ٽي ڏياٽيون باداميءَ جي گلن جهڙيون، هڪڙي بونبي ۽ هڪڙي گل سميت، هڪڙيءَ شاخ ۾ هجن؛ ۽ ٽي ڏياٽيون باداميءَ جي گلن جهڙيون، هڪڙي بونبي ۽ هڪڙي گل سميت، ٻيءَ شاخ ۾ هجن: اهڙي طرح شمعدان جي ڇهن ئي ٻاهر نڪتل شاخن ۾ هجن.

³⁴ ۽ خود شمعدان ۾ چار ڏياٽيون باداميءَ جي گلن جهڙيون، بونبن ۽ گلن سميت هجن.

³⁵ ۽ ٻن شاخن جي هيٺان هڪڙو بونبو انهيءَ ساڳئي ٽڪر مان ٺهيل هجي؛ ۽ ٻين ٻن شاخن جي هيٺان بہ هڪڙو بونبو انهي ساڳئي ٽڪر مان ٺهيل هجي؛ ۽ ٽين ٻن شاخن جي هيٺان بہ هڪڙو بونبو انهي ساڳئي ٽڪر مان ٺهيل هجي. اهڙيءَ طرح شمعدان مان نڪتل، ڇهن ئي شاخن لاءِ هجي.

³⁶ يعني شمعدان، ۽ انهي جون شاخون، ۽ انهن جا بونبا ساڳئي هڪڙي ئي ٽڪر مان ٺهيل هجن: اهي سڀيئي نج سون جي هڪڙي ئي ٽڪر مان گهڙيل هجن.

³⁷ ۽ تون انهن جي لاءِ ست ڏيئا جوڙج، ۽ اهي ڏيئا اهڙيءَ طرح هجن جو انهي جي سامهون سوجهرو ڪن.

³⁸ ۽ انهن جي ڦلن لاهڻ جا چمچا ۽ رڪابيون نج سون جون هجن.

³⁹ ۽ اهو، ۽ انهي جا ٿانو، سون جي هڪ قنطار وزن مان جوڙيا وڃن.

⁴⁰ ۽ ڏسج تہ جيڪي نمونا هن جبل تي توکي ڏيکاريا ويا آهن تن جهڙا تون اهي جوڙين.