واعظ 10 - Sindhi Bible

¹ مئل مکيون عطار جي سرهي تيل کي بہ اهڙو ڪيو ڇڏين جو انهي مان بدبوءِ پيئي اچي: انهي طرح ٿوري ئي بي عقلي ڏاهپ ۽ عزت کي بي قدر ڪيو ڇڏي.

² ڏاهي ماڻهوءَ جي دل سندس سڄي هٿ ۾ آهي؛ پر بي عقل جي دل سندس کٻي هٿ ۾ آهي.

³ هائو، هيئن بہ آهي تہ جڏهن بي عقل رستو ڏيئي هلي ٿو تڏهن سمجهہ ڇڏيو وڃيس ۽ سڀ ڪنهن کي چوندو وتي تہ آءٌ بي عقل آهيان.

⁴ جيڪڏهن حاڪم جي طبيعت تنهنجي برخلاف ٿئي، تہ پنهنجي جاءِ ڇڏي نہ وڃ؛ ڇالاءِ جو تحمل وڏن ڏوهن کي جهڪو ڪيو ڇڏي.

⁵ هڪڙي خرابي آهي جا مون سج هيٺان ڏٺي آهي، اُها ڄڻ تہ هڪڙي چڪ آهي جا حاڪم جي ڪيل آهي:

⁶ بي عقلي وڏي درجي ۾ رکي ٿي وڃي، ۽ دولتمند هيٺائين جاءِ تي ويهن ٿا.

⁷ مون نوڪر گهوڙن تي ڏٺا آهن، ۽ امير نوڪرن وانگر زمين تي هلندا ڏٺا اٿم.

⁸ جيڪو کڏ کڻي ٿو سو انهي ۾ پوي ٿو؛ ۽ جيڪو ڪنهن لوڙهي کي لتاڙي لنگهي ٿو تنهن کي نانگ کائيندو.

⁹ جيڪو پٿر ٽڪي ٿو تنهن کي انهن مان ايذاءُ بہ ٿو رسي؛ ۽ جيڪو ڪاٺ چيري ٿو، تنهن کي انهي مان خوف بہ آهي.

¹⁰ جيڪڏهن لوهہ مڏو آهي، ۽ ماڻهو انهي جي ڪَنيءَ کي لائي تکو نہ ڪندو، تہ ان کي وڌيڪ زور لائڻو پوندو: پر ڏاهپ هدايت ڪرڻ لاءِ فائدي واري آهي.

¹¹ جيڪڏهن منڊ لڳڻ کان اڳي نانگ ڏنگيندو تہ پوءِ مانڊيءَ مان ڪوبہ فائدو نہ پهچندو.

¹² ڏاهي ماڻهوءَ جي وات جون ڳالهيون وڻڻ جهڙيون آهن؛ پر بي عقل جا چپ خود کيس بہ ڳهي ويندا.

¹³ هن جي وات جي ڳالهين جي شروعات بي عقلي آهي: ۽ هن جي گفتگو جي پڇاڙي نقصان جهڙي چريائي آهي.

¹⁴ بي عقل گهڻو ڳالهائي بہ ٿو، انهي هوندي بہ ماڻهوءَ کي خبر ڪانهي تہ ڇا ٿيندو؛ ۽ جيڪي انهي کان پوءِ ٿيندو سو ڪير چئي سگهندو.

¹⁵ بي عقل جو پورهيو سڀ ڪنهن کي بيزار ڪيو ڇڏي، ڇالاءِ جو هن کي خبر نہ آهي تہ ڪيئن شهر ۾ وڃجي.

¹⁶ اي ملڪ افسوس آهي تنهنجي حال تي، جڏهن تنهنجو بادشاهہ هڪڙو ٻار آهي، ۽ تنهنجا امير صبح جو کائين ٿا!

¹⁷ اي ملڪ، تون سڀاڳو آهين جڏهن تنهنجو بادشاهہ اميرن جو اولاد آهي، ۽ تنهنجا امير پوري وقت تي کائين ٿا، نہ نشي ٿيڻ لاءِ، پر سگهہ لاءِ!

¹⁸ سستيءَ جي ڪري ڇت ڪري پوي ٿي؛ هٿن جي ڍرائيءَ ڪري گهر سمي پوي ٿو.

¹⁹ مجلس کلڻ جي لاءِ ڪبي آهي، ۽ شراب جان کي خوش ڪري ٿو: ۽ ناڻو سڀني ڳالهين کي پورو ٿو پوي.

²⁰ بادشاهہ تي لعنت نہ وجهہ، پنهنجي خيال ۾ بہ ائين نہ ڪر؛ ۽ پنهنجي سمهڻ جي ڪوٺيءَ ۾ دولتمند تي لعنت نہ وجهہ: ڇالاءِ جو ڪو پکي آواز کڻي ويندو، ۽ جنهن کي پر آهن سو اها ڳالهہ وڃي ٻڌائيندو.