شريعت جو دور 27 - Sindhi Bible

¹ پوءِ موسيٰ اسرائيل جي بزرگن سان گڏجي ماڻهن کي حڪم ڏيئي چيو، تہ جيڪي حڪم آءٌ اڄوڪي ڏينهن اوهان کي ٻڌايان ٿو سي سڀيئي مڃيندا رهجو.

² ۽ جنهن ڏينهن اوهين يردن لنگهي انهي ملڪ ۾ وڃو جو خداوند تنهنجو خدا توکي ڏئي ٿو، انهي ڏينهن تون وڏا وڏا پهڻ کڙا ڪج، ۽ انهن کي گچ سان لنبي ڇڏج:

³ پار وڃڻ کان پوءِ هن شريعت جون سڀ ڳالهيون انهن تي لکج؛ انهي لاءِ تہ تون انهي ملڪ ۾ وڃي داخل ٿين، جو خداوند تنهنجو خدا توکي ڏئي ٿو، جنهن ۾ کير ۽ ماکي پيئي وهي، جيئن ڪ خداوند تنهنجي ابن ڏاڏن جي خدا توسان واعدو ڪيو آهي.

⁴ سو جڏهن اوهين يردن جي پار وڃو، تڏهن اهي پهڻ، جن جو آءٌ اڄوڪي ڏينهن اوهان کي حڪم ٿو ڏيان، سي عيبال جبل تي کوڙجو، ۽ تون انهن کي گچ سان لنبي ڇڏج.

⁵ تون اتي خداوند پنهنجي خدا جي لاءِ پهڻن جي هڪڙي قربانگاهہ جوڙج: ۽ تون انهن تي لوهہ جو ڪوبہ اوزار ڪم نہ آڻج.

⁶ تون خداوند پنهنجي خدا جي اها قربانگاهہ اڻ گهڙيل پهڻن جي جوڙج: ۽ انهيءَ تي خداوند پنهنجي خدا جي لاءِ سوختنيون قربانيون چاڙهج:

⁷ ۽ اتي ئي تون سلامتيءَ جون قربانيون چاڙهج، ۽ اهي کائج؛ ۽ تون خداوند پنهنجي خدا جي حضور ۾ خوشيون ڪج.

⁸ تون انهن پهڻن تي هن شريعت جون سڀ ڳالهيون تمام چٽيءَ طرح لکج.

⁹ پوءِ موسيٰ ۽ لاوي ڪاهن سڀني اسرائيلين سان گفتگو ڪري کين چيو، تہ اي اسرائيل ماٺ ڪري ٻڌ، اڄوڪي ڏينهن تون خداوند پنهنجي خدا جي اُمت ٿيو آهين.

¹⁰ تون خداوند پنهنجي خدا جي فرمانبرداري ڪج، ۽ جيڪي سندس حڪم ۽ قانون، آءٌ اڄوڪي ڏينهن توکي ٻڌايان ٿو، تن تي عمل ڪج.

¹¹ ۽ موسيٰ انهي ساڳئي ڏينهن ماڻهن کي تاڪيد ڪري چيو، تہ

¹² جڏهن اوهين يردن لنگهي پار وڃو، تڏهن شمعون لاوي، يهوداہ، اشڪار، يوسف ۽ بنيمين جا قبيلا گرازيم جبل تي بيهي ماڻهن کي برڪتون ٻڌائين،

¹³ ۽ روبن، جد، آشر، زبولون، دان ۽ نفتاليءَ جا قبيلا عيبال جبل تي بيهي ماڻهن کي لعنتون ٻڌائين.

¹⁴ ۽ لاوي ورندي ڏيئي وڏي آواز سان اسرائيل جي سڀني ماڻهن کي چون تہ

¹⁵ جيڪو ماڻهو ڪاريگر جي هوشياريءَ سان اُڪريل يا پلٽيل مورت جوڙي، جا خداوند جي نظر ۾ مڪروهہ آهي، ۽ انهيءَ کي ڪنهن لڪل جاءِ تي رکي، سو ملعون آهي، ۽ سڀ ماڻهو ورندي ڏيئي چون، آمين.

¹⁶ جيڪو ماڻهو ماءُ پيءُ جي بيعزتي ڪري سو ملعون آهي، ۽ سڀ ماڻهو چون، آمين.

¹⁷ جيڪو ماڻهو پنهنجي پاڙيسريءَ جا حد وارا نشان هٽائي، سو ملعون آهي، ۽ سڀ ماڻهو چون، آمين.

¹⁸ جيڪو ماڻهو انڌي کي گمراهہ ڪري سو ملعون آهي، ۽ سڀ ماڻهو چون، آمين.

¹⁹ جيڪو ماڻهو پرديسيءَ، يتيم، ۽ بيوہ زال سان ناحق ڪري سو ملعون آهي، ۽ سڀ ماڻهو چون، آمين.

²⁰ جيڪو ماڻهو پنهنجي پيءُ جي زال سان سمهي سو ملعون آهي، ڇالاءِ جو هن پنهنجي پيءُ جو ننگ کوليو آهي، ۽ سڀ ماڻهو چون، آمين.

²¹ جيڪو ماڻهو ڪنهن بہ قسم جي جانور سان بدفعلي ڪري سو ملعون آهي. ۽ سڀ ماڻهو چون، آمين.

²² جيڪو ماڻهو پنهنجيءَ ڀيڻ، يعني پنهنجي پيءُ جي ڌيءَ، يا پنهنجي ماءُ جي ڌيءَ سان سمهي سو ملعون آهي. ۽ سڀ ماڻهو چون، آمين.

²³ جيڪو ماڻهو پنهنجي سس سان سمهي سو ملعون آهي. ۽ سڀ ماڻهو چون، آمين.

²⁴ جيڪو ماڻهو پنهنجي پاڙيسريءَ کي لڪي ڌڪ هڻي سو ملعون آهي. ۽ سڀ ماڻهو چون، آمين.

²⁵ جيڪو ماڻهو بيگناهہ کي قتل ڪرڻ لاءِ رشوت وٺي سو ملعون آهي. ۽ سڀ ماڻهو چون، آمين.

²⁶ جيڪو ماڻهو هن شريعت جي ڳالهين تي قائم رهي عمل نہ ڪري، سو ملعون آهي. ۽ سڀ ماڻهو چون، آمين.