2.بادشاهَہ 21 - Sindhi Bible

¹ جڏهن منسي بادشاهي ڪرڻ لڳو تڏهن هو ٻارهن ورهين جو هو؛ ۽ هن يروشلم ۾ پنجونجاهہ ورهيہ بادشاهي ڪئي: ۽ هن جي ماءُ جو نالو حفصي باہ هو.

² ۽ هن اُهي ڪم ڪيا جي خداوند جي نظر ۾ خراب هئا، جو اُهي انهن غير قومن جي ڪراهت جهڙن ڪمن موافق هئا، جن کي خداوند بني اسرائيل جي اڳيان هڪلي ڪڍيو هو.

³ ڇالاءِ جو هن وري اُهي مٿانهيون جايون جوڙايون، جي سندس پيءُ حزقياہ ڊاهي ڇڏيون هيون؛ ۽ هن بعل جي لاءِ قربانگاهون اڏايون؛ ۽ هڪڙو يسيرت بہ جوڙايو، جيئن ڪ اسرائيل جي بادشاهہ اخي آب ڪيو هو، ۽ آسمان جي سڀني تارن جي عبادت ڪيائين، ۽ اُنهن جي بندگي ڪيائين.

⁴ ۽ هن خداوند جي گهر ۾ قربانگاهون جوڙايون، جن بابت خداوند فرمايو هو تہ يروشلم ۾ آءٌ پنهنجو نالو رکندس.

⁵ ۽ هن خداوند جي گهر جي ٻن ايوانن ۾ آسمان جي سڀني تارن لاءِ قربانگاهون جوڙايون.

⁶ ۽ هن پنهنجي پٽ کي باهہ مان لنگهايو، ۽ فالون وجهارايائين، ۽ جادو ڪم ۾ آندائين، ۽ جن کي جن اُپندا هئا تن سان، ۽ ڏائڻن سان واهپو رکيائين: هن خداوند کي ڪاوڙائڻ لاءِ سندس نظر ۾ گهڻي خرابي ڪئي.

⁷ ۽ جيڪا يسيرت جي مورت هن جوڙائي هئي سا هن انهيءَ گهر ۾ رکائي، جنهن جي بابت خداوند دائود کي ۽ سندس پٽ سليمان کي فرمايو هو، تہ هن گهر ۾، ۽ يروشلم ۾، جو اسرائيل جي سڀني فرقن مان مون پسند ڪيو آهي، آءٌ هميشہ لاءِ پنهنجو نالو قائم رکندس:

⁸ نڪي جيڪو ملڪ مون هنن جي ابن ڏاڏن کي ڏنو تنهن مان وري ڪڏهن اسرائيل جا پير ٻاهر ڪڍندس؛ بشرطيڪ جيڪي حڪم مون هنن کي ڏنا آهن، ۽ جا شريعت منهنجي ٻانهي موسيٰ هنن کي ڏني آهي، تنهن موجب هو تعميل ڪندا رهندا.

⁹ پر هنن نہ ٻڌو: ۽ منسي هنن کي ٺڳاري انهن کان اُهي ڪم ڪرايا جي اُنهن قومن جي ڪمن کان بہ خراب هئا، جن کي خداوند بني اسرائيل جي اڳيان چٽ ڪري ڇڏيو.

¹⁰ ۽ خداوند پنهنجن ٻانهن نبين جي معرفت فرمايو، تہ

¹¹ يهوداہ جي بادشاهہ منسيءَ هي ڪراهت ۽ شرارت جهڙا ڪم ڪيا آهن، جي سڀني امورين جي ڪمن کان بہ وڌيڪ آهن، جي کانئس اڳي هئا ۽ يهوداہ کي بہ پنهنجن بتن سان گنهگار ڪرايو آهي:

¹² تنهنڪري خداوند، اسرائيل جو خدا هيئن ٿو فرمائي تہ ڏس آءٌ يروشلم ۽ يهوداہ تي اهڙي مصيبت نازل ٿو ڪريان جو جيڪو انهيءَ جي خبر ٻڌندو تنهن جا ٻئي ڪن پيا ٻرندا.

¹³ ۽ آءٌ سامريہ جي ڏور ۽ اخي آب جي گهراڻي جو شاهل يروشلم جي مٿان ڇڪيندس: ۽ آءٌ يروشلم کي ائين اُگهي ڇڏيندس جيئن ڪو ماڻهو رڪابي اُگهندو ۽ انهيءَ کي اُٿلائي پٿلائي رکندو آهي.

¹⁴ ۽ آءٌ پنهنجي ميراث جو باقي بچيل حصو اُڇلائي ڇڏيندس ۽ هنن کي سندن دشمنن جي هٿن ۾ ڏيئي ڇڏيندس؛ ۽ اُهي پنهنجن دشمنن جو شڪار ۽ لٽ جو مال ٿيندا؛

¹⁵ ڇالاءِ جو هنن اُهي ڪم ڪيا آهن جي منهنجي نظر ۾ خراب آهن، ۽ جنهن ڏينهن هنن جا ابا ڏاڏا مصر مان نڪتا تنهن کان وٺي اڄ ڏينهن تائين، هنن مون کي ڪاوڙ پئي ڏياري آهي.

¹⁶ تنهن کان سواءِ منسيءَ گهڻوئي رت بي گناهہ هاريو، جيسين ڪ هن يروشلم کي هڪڙي ڇيڙي کان ٻئي ڇيڙي تائين ڀري ڇڏيو؛ انهيءَ کان سواءِ اهو گناهہ ڪيائين جو يهوداہ کان گناهہ جا ڪم ڪرايائين، اهڙا ڪم جي خداوند جي نظر ۾ خراب هئا.

¹⁷ هاڻي منسيءَ جا باقي ٻيا ڪم ۽ ٻيو جيڪي هن ڪيو، ۽ جو گناهہ هن ڪيو سي سڀ يهوداہ جي بادشاهن جي تواريخ جي ڪتاب ۾ لکيل نہ آهن ڇا؟

¹⁸ ۽ منسي پنهنجي ابن ڏاڏن سان وڃي سُتو ۽ خود پنهنجي گهر جي باغ ۾، عزا جي باغ ۾ دفن ڪيو ويو: ۽ سندس پٽ امون سندس جاءِ تي بادشاهہ ٿيو.

¹⁹ جڏهن امون بادشاهي ڪرڻ لڳو تڏهن ٻاويهن ورهين جو هو؛ ۽ هن يروشلم ۾ ٻہ ورهيہ بادشاهي ڪئي، ۽ سندس ماءُ جو نالو مسلمت هو، جا يطبهيءَ واري حروص جي ڌيءَ هئي.

²⁰ ۽ هن اُهي ڪم ڪيا جي خداوند جي نظر ۾ خراب هئا، جيئن ڪ سندس پيءُ منسي ڪيو هو.

²¹ ۽ جنهن رستي تي هن جو پيءُ هليو هو، انهيءَ رستي تي هو بہ هليو، ۽ جن بتن جي هن جي پيءُ بندگي ٿي ڪئي، تن جي هن بہ ڪئي، ۽ انهن جي عبادت ڪيائين:

²² ۽ هن خداوند، پنهنجي ابن ڏاڏن جي خدا کي ڇڏي ڏنو ۽ خداوند جي رستي تي نہ هليو.

²³ ۽ امون جي نوڪرن هن جي برخلاف منصوبو ڪيو ۽ بادشاهہ کي سندس گهر منجهہ ئي ماري ڇڏيائين.

²⁴ پر جن ماڻهن بادشاهہ امون جي برخلاف منصوبو ڪيو هو تن سڀني کي انهيءَ ملڪ جي ماڻهن قتل ڪري ڇڏيو؛ ۽ انهيءَ ملڪ جي ماڻهن هن جي پٽ يوسياہ کي سندس جاءِ تي بادشاهہ ڪيو.

²⁵ هاڻي امون ٻيا جيڪي ڪم ڪيا، سي يهوداہ جي بادشاهن جي تواريخ جي ڪتاب ۾ لکيل نہ آهن ڇا؟

²⁶ ۽ هو عزا جي باغ ۾، پنهنجي قبر ۾ دفن ڪيو ويو: ۽ سندس پٽ يوسياہ سندس جاءِ تي بادشاهہ ٿيو.