1.سموئيل 27 - Sindhi Bible

¹ ۽ دائود پنهنجي دل ۾ چيو تہ هاڻي هڪڙي ڏينهن آءٌ سائول جي هٿان ماريو ويندس: منهنجي لاءِ انهي کان بهتر ٻي ڳالهہ ڪانهي تہ ڀڄي فلستين جي ملڪ ۾ وڃان؛ ۽ سائول مون کان نااُميد ٿي وري مون کي اسرائيل جي ڪنهن بہ سرحد ۾ نہ ڳوليندو: انهيءَ طرح آءٌ سندس هٿان ڇٽي پوندس.

² پوءِ دائود اُٿيو، ۽ جيڪي ڇهہ سؤ ماڻهو ساڻس هئا تن سميت لنگهي جات جي بادشاهہ معوڪ جي پٽ اڪيس وٽ ويو.

³ ۽ دائود ۽ سندس ماڻهو جات ۾ اڪيس سان رهڻ لڳا، ۽ هرهڪ ماڻهوءَ کي پنهنجو ڪٽنب ساڻ هو، يعني دائود پنهنجي پنهنجي زالن، اخي نوعم يزرعيلي، ۽ ابيجيل ڪرملڻ سان هو، جا نابال جي زال هئي.

⁴ ۽ سائول کي ٻڌايائون تہ دائود ڀڄي جات ڏي ويو آهي: ۽ هن وري انهي جي ڳولا نہ ڪئي.

⁵ ۽ دائود اڪيس کي چيو تہ جيڪڏهن هاڻي مون تنهنجي نظر ۾ مان لڌو آهي تہ ٻهراڙيءَ جي شهرن مان هڪڙي ۾ مون کي جاءِ ڏي تہ آءٌ اُتي رهان: ڇالاءِ جو تنهنجو ٻانهو ڇو شاهي شهر ۾ توسان گڏ رهي؟

⁶ تڏهن اڪيس انهيءَ ڏينهن هن کي صقلاج ڏنو: انهي ڪري صقلاج اڄ ڏينهن يهوداہ جي بادشاهن جو آهي.

⁷ ۽ جيڪي ڏينهن دائود فلستين جي ملڪ ۾ رهيو تن جو شمار هڪ ورهيہ ۽ چار مهينا هو.

⁸ پوءِ دائود پنهنجن ماڻهن سميت مٿي ويو، ۽ جسورين، ۽ جزرين، ۽ عماليقين تي ڪاهہ ڪيائين: ڇالاءِ جو اهي ئي قومون قديم وقت کان وٺي، شور ڏي ويندي مصر جي حد تائين، انهي ملڪ ۾ رهنديون هيون.

⁹ ۽ دائود انهي ملڪ کي فتح ڪيو، ۽ ڪوبہ مرد يا زال جيئرو نہ ڇڏيائين، ۽ رڍون، ۽ ڏاند، ۽ گڏهہ، ۽ اُٺ، ۽ ڪپڙا کڻي ويو؛ پوءِ موٽي اڪيس وٽ آيو.

¹⁰ ۽ اڪيس چيو تہ اڄ اوهان ڪيڏي ڪاهہ ڪئي هئي؟ تڏهن دائود چيس تہ يهوداہ جي ڏکڻ تي، ۽ يرحميلين جي ڏکڻ تي، ۽ قينين جي ڏکڻ تي.

¹¹ ۽ دائود ڪنهن بہ مرد يا زال کي جيئرو ڇڏي جات ۾ ڪين آڻيندو هو، تہ متان هو سندس نسبت ۾ وڃي خبر ڏئي تہ دائود هيئن ڪ هيئن ڪيو، ۽ جيڪو وقت هو فلستين ۾ رهيو تنهن ۾ هن جي هلت اهڙي رهي.

¹² ۽ اڪيس دائود تي ويساهہ آندو، ۽ چيائين تہ هو پنهنجي قوم اسرائيل ۾ بلڪل نفرت جهڙو ٿي پيو آهي؛ تنهنڪري هو هميشہ جي لاءِ منهنجو ٻانهو ٿيندو.