1.تواريخ 16 - Sindhi Bible

¹ ۽ هنن خدا جي صندوق اندر آڻي، جيڪو تنبو دائود انهيءَ جي لاءِ کوڙيو هو، تنهن جي وچ ۾ رکي: ۽ هنن خدا جي اڳيان سوختني قربانيون ۽ سلامتيءَ واريون قربانيون چاڙهيون.

² ۽ جڏهن دائود سوختني قرباني ۽ سلامتيءَ جون قربانيون چاڙهي بس ڪيون، تڏهن هن خداوند جي نالي سان ماڻهن کي برڪت ڏني.

³ ۽ هن سڄيءَ قوم مان، يعني اسرائيل جي ڪل جماعت، مردن توڙي زالن مان، هرهڪ کي هڪڙي ماني، ۽ گوشت جو ٽڪر، ۽ ڪشمش جي هڪڙي ٽڪي ورهائي ڏني.

⁴ ۽ هن لاوين مان ڪن کي مقرر ڪيو تہ خداوند جي صندوق جي اڳيان خدمت ڪن، ۽ خداوند اسرائيل جي خدا جو ذڪر ۽ شڪر ۽ تعريف ڪن:

⁵ پهريون آسف، ۽ هن کانپوءِ زڪرياہ، ۽ يعي ايل، ۽ سميراموت، ۽ يحيئيل، ۽ متتياہ، ۽ الياب، ۽ بناياہ، ۽ عوبيد ادوم، ۽ يعي ايل اهي سڀ تنبورن ۽ بربطن لاءِ، ۽ آسف جهانجهہ زور سان وڄائڻ لاءِ؛

⁶ ۽ بناياہ ۽ يحزيئيل ڪاهن هميشہ خداوند جي صندوق جي اڳيان تريون وڄائڻ لاءِ.

⁷ تڏهن انهيءَ ڏينهن دائود مقرر ڪيو تہ پهرين، آسف ۽ سندس ڀائرن جي هٿان، خداوند جو شڪر بجا آڻين.

⁸ خداوند جي شڪرگذاري ڪريو، سندس نالو وٺي دعا گهرو؛ قومن ۾ هن جا ڪم پڌرا ڪريو.

⁹ هن جي حضور ۾ گيت ڳايو ۽ سندس تعريف ڳايو؛ هن جي سڀني عجيب ڪمن جو ذڪر ڪريو.

¹⁰ هن جي پاڪ نالي تي فخر ڪريو؛ جيڪي خداوند جا طالب آهن، تن جي دل خوش ٿئي.

¹¹ خداوند ۽ سندس قدرت جي ڳولا ڪريو؛ سدائين سندس ديدار جا طالب رهو.

¹² هن جيڪي عجيب ڪم ڪيا آهن سي ياد ڪريو؛ سندس معجزا ۽ سندس زباني فيصلا؛

¹³ اوهين جي سندس ٻانهي اسرائيل جو نسل آهيو، اوهين بني يعقوب سندس چونڊيل آهيو.

¹⁴ هو خداوند اسان جو خدا آهي: سڄي جهان ۾ هن جا فيصلا آهن.

¹⁵ هن جو عهد اقرار هميشہ ياد رکو، اهو ڪلام جو هن هزار پيڙهين لاءِ فرمايو آهي؛

¹⁶ اُهو عهد اقرار جو هن ابرهام سان ڪيو، ۽ جو قسم هن اسحاق سان کنيو؛

¹⁷ ۽ يعقوب جي لاءِ هڪڙو قانون، ۽ اسرائيل جي لاءِ هڪڙو دائمي عهد اقرار ٺهرايو:

¹⁸ ۽ چيائين تہ آءٌ توکي ڪنعان جو ملڪ ڏيندس، تہ تنهنجو موروثي حصو ٿئي:

¹⁹ جڏهن اوهين شمار ۾ ٿورا هئا؛ هائو تمام ٿورا، بلڪ مسافر هئا؛

²⁰ ۽ اُهي هڪڙي ملڪ مان ٻئي ملڪ ۾، ۽ هڪڙيءَ بادشاهت مان ٻئي ملڪ جي ماڻهن ۾ ويا.

²¹ هن ڪنهن کي بہ مٿن ظلم ڪرڻ نہ ڏنو؛ هائو هن بادشاهن کي انهن جي خاطر جهڻڪيو.

²² ۽ چيائين تہ منهنجي مسح ٿيلن کي نہ ڇُهو، ۽ منهنجن نبين کي ايذاءُ نہ رسايو.

²³ سارو جهان خداوند جي لاءِ ڳائي: روزبروز سندس نجات جو بيان ڪري.

²⁴ قومن ۾ هن جو جلال ظاهر ڪريو، سڀني قومن ۾ سندس عجيب ڪمن جو بيان ڪريو.

²⁵ ڇالاءِ جو خداوند وڏو آهي ۽ تعريف جي لائق آهي: سڀني معبودن کان زيادہ کانئس ڊڄڻ گهرجي.

²⁶ ڇو جو قومن جا سڀيئي معبود بُت آهن: پر خداوند آسمان جوڙيا آهن.

²⁷ مان ۽ شان هن جي حضور ۾ آهن: قدرت ۽ خوشي سندس پاڪ مڪان ۾ آهن.

²⁸ اي سڀ قومون، خداوند جي، خداوند جي جلال ۽ قدرت جي تعريف ڪريو.

²⁹ خداوند جي نالي جي لائق تعريف ڪريو: نذرانا کڻي سندس حضور ۾ اچو: پاڪيزگيءَ جي جمال سان خداوند جي عبادت ڪريو.

³⁰ اي ساري زمين هن جي اڳيان ڊڄ: دنيا بہ اهڙي محڪم آهي جو چُري ڪين سگهندي.

³¹ ڀلي تہ آسمان خوشي ڪن ۽ زمين سرهي ٿئي؛ ۽ ڀلي تہ قومون هڪ ٻئي کي چون تہ خداوند بادشاهي ٿو ڪري.

³² ڀلي تہ سمنڊ ۽ جيڪي منجهس آهي سو شور گوڙ ڪري؛ ڀلي تہ ٻني ۽ جيڪي منجهس آهي سي خوشي ڪن؛

³³ تڏهن ٻيلي جا سڀيئي وڻ خداوند جي حضور خوشيءَ سان ڳائيندا، ڇالاءِ جو هو دنيا جي عدالت ڪرڻ لاءِ اچي ٿو.

³⁴ خداوند جي شڪرگذاري ڪريو؛ ڇو جو هو نيڪ آهي: ڇو جو سندس رحمت دائمي آهي.

³⁵ ۽ اوهين چئو تہ اي اسان جي نجات جا خدا، اسان کي بچاءِ، اسان کي گڏ ڪر، ۽ قومن کان بچاءِ، تہ تنهنجي پاڪ نالي جو شڪر ڪريون، ۽ تنهنجي تعريف ۾ فتح حاصل ڪريون.

³⁶ خداوند اسرائيل جو خدا اصل کان وٺي ابد تائين مبارڪ آهي: ۽ سڀني ماڻهن چيو آمين، ۽ خداوند جي تعريف ڪيائون.

³⁷ انهيءَ طرح هن آسف ۽ سندس ڀائرن کي خداوند جي صندوق جي اڳيان هميشہ لاءِ خدمت ڪرڻ لاءِ رکيو، جيئن تہ هر روز ضرورت ٿي پيئي:

³⁸ ۽ عوبيد ادوم ۽ سندس اٺهٺ ڀائرن کي، ۽ عوبيد ادوم بن يدوتون، ۽ حوساہ کي بہ رکيو تہ درباني ڪن:

³⁹ ۽ خداوند جي تنبوءَ اڳيان جو جبعون وٽ مٿانهينءَ جاءِ تي هو، هن صدوق ڪاهن ۽ سندس ڀائرن کي رکيو، جيڪي ڪاهن هئا،

⁴⁰ تہ خداوند جي اڳيان هميشہ صبح ۽ شام جو قربانگاهہ تي سوختني قرباني چاڙهين، جيئن تہ خداوند جي شريعت ۾ لکيل آهي، ۽ جنهن جو هن اسرائيل کي حڪم ڏنو؛

⁴¹ ۽ انهن سان گڏ هيمان ۽ يدوتون ۽ باقي ٻيا چونڊيل هئا، جن جا نالا لکيل هئا، تہ اُهي بہ خداوند جي شڪرگذاري ڪن، ڇالاءِ جو هن جي رحمت دائمي آهي؛

⁴² ۽ انهن هيمان ۽ يدوتون وٽ تريون ۽ جهانجهہ هئا تہ اُهي زور سان وڄائين، ۽ سازن سان خدا جا گيت ڳائين: ۽ بني يدوتون دروازي وٽ رهن.

⁴³ ۽ سڀ ماڻهو، هرڪو پنهنجي پنهنجي گهر هليو ويو: ۽ دائود بہ موٽيو تہ پنهنجي خاندان کي برڪت ڏئي.