1.تواريخ 15 - Sindhi Bible

¹ ۽ دائود پنهنجي لاءِ دائود جي شهر ۾ گهر جوڙايا؛ ۽ خدا جي صندوق لاءِ بہ هڪڙي جاءِ تيار ڪرايائين، ۽ اُنهيءَ لاءِ هڪڙو تنبو کوڙايائين.

² دائود چيو تہ لاوين کانسواءِ ٻيو ڪوبہ خدا جي صندوق نہ کڻي: اُنهن جي لاءِ خداوند اهو حڪم مقرر ڪيو آهي تہ خدا جي صندوق کڻن، ۽ هميشہ سندس خدمت ڪندا رهن.

³ ۽ دائود سڀ اسرائيلي يروشلم ۾ آڻي گڏ ڪيا، انهيءَ لاءِ تہ خداوند جي صندوق کڻي، جيڪا جاءِ انهيءَ جي لاءِ تيار ڪئي هئائين، اتي رکي.

⁴ ۽ دائود بني هارون ۽ بني لاوين کي گڏ ڪيو:

⁵ قهات جي پٽن مان اوري ايل سردار، ۽ سندس هڪ سؤ ويهن ڀائرن کي:

⁶ بني مراريءَ مان عساياہ سردار، ۽ سندس هڪ سؤ ويهن ڀائرن کي:

⁷ بني جيرسوم مان يوايل سردار، ۽ سندس هڪ سؤ ٽيهن ڀائرن کي:

⁸ بني اليصفن مان سمعياہ سردار، ۽ سندس ٻہ سؤ ڀائرن کي:

⁹ بني حبرون مان الي ايل سردار، ۽ سندس اسي ڀائرن کي:

¹⁰ بني عزي ايل مان عمينداب سردار ۽ سندس هڪ سؤ ٻارهن ڀائرن کي.

¹¹ ۽ دائود صدوق ۽ ابياتر ڪاهنن کي، ۽ لاوين مان اوري ايل، عساياہ، يوايل، سمعياہ، ۽ الي ايل ۽ عبينداب کي ڪوٺايو.

¹² ۽ انهن کي چيائين تہ اوهين لاوين جي ابن جي گهراڻن جا سردار آهيو: اوهين پاڻ ۽ پنهنجن ڀائرن کي مخصوص ڪريو، تہ وڃي خداوند اسرائيل جي خدا جي صندوق انهيءَ جاءِ تي، جا مون تيار ڪئي آهي، کڻي اچو.

¹³ ڇالاءِ جو جڏهن اوهان پهريون دفعو انهيءَ کي نہ کنيو، تڏهن خداوند اسان جو خدا اسان تي ڪڙڪي پيو، ڇو جو اسان قانون موجب کيس نہ ڳوليو هو.

¹⁴ تڏهن ڪاهنن ۽ لاوين خداوند اسرائيل جي خدا جي صندوق مٿي کڻي اچڻ لاءِ پاڻ کي پاڪ ڪيو.

¹⁵ ۽ بني لاوين خدا جي صندوق لٺين سان پنهنجن ڪلهن تي کنئي، جيئن موسيٰ خداوند جي ڪلام موجب حڪم ڏنو هو.

¹⁶ ۽ دائود لاوين جي سردارن کي چيو تہ پنهنجن ڀائرن مان ڳائڻا مقرر ڪريو، تہ ساز، تنبورا، بربط ۽ جهانجهہ وڄائي، بلند آواز سان خوشيون ڪن.

¹⁷ سو لاوين هيمان بن يوايل؛ ۽ هن جي ڀائرن آسف بن برڪياہ؛ ۽ بني مراري مان هن جي ڀائرن، ايتان بن قوسياہ کي مقرر ڪيو؛

¹⁸ ۽ انهن سان سندن ٻئي درجي جي ڀائرن، يعني زڪرياہ، ۽ بين، ۽ يعزيئيل، ۽ سميراموت، ۽ يحيئيل، ۽ عني، ۽ الياب، ۽ بناياہ، ۽ معسياہ، ۽ متتياہ، ۽ الفلهو، ۽ مقنياہ، ۽ عوبيد ادوم ۽ يعي ايل، جي دربان هئا.

¹⁹ انهيءَ طرح هيمان، آسف، ۽ ايتان مقرر ڪيا ويا تہ زور سان جهانجهہ وڄائين؛

²⁰ ۽ زڪرياہ، ۽ عزيئيل، ۽ سميراموت، ۽ يحيئيل، ۽ عني، ۽ الياب، ۽ معسياہ، ۽ بناياہ، علاموت جي سر تي تنبورا وڄائين؛

²¹ ۽ متتياہ، ۽ الفلهو، ۽ مقنياہ، ۽ عوبيد ادوم، ۽ يعيئيل، ۽ عزرياہ، شمنيت جي سر تي اڳرو بربط وڄائين.

²² ۽ لاوين جو سردار ڪنانياہ، جو ڳائڻ ۾ هوشيار هو، سو راڳ لاءِ مقرر هو، ۽ سُر کڻڻ سيکاريندو هو.

²³ ۽ برڪياہ، ۽ القانہ، صندوق لاءِ دربان هئا.

²⁴ ۽ شبنياہ، ۽ يهوسفط، ۽ نتنئيل، ۽ عماسي، ۽ زڪرياہ، ۽ بناياہ، ۽ اليعزر، جي ڪاهن هئا، تن خداوند جي صندوق جي اڳيان تريون وڄايون: ۽ عوبيد ادوم، ۽ يحياہ، صندوق لاءِ دربان هئا.

²⁵ انهيءَ طرح دائود، ۽ اسرائيل جا بزرگ، ۽ هزارن جا سردار خوشيءَ سان عوبيد ادوم جي گهر مان خداوند جي عهدنامي جي صندوق کڻڻ لاءِ ويا:

²⁶ ۽ هيئن ٿيو تہ جڏهن خدا لاوين جي مدد ڪئي، جن خداوند جي عهدنامي جي صندوق کنئي هئي، تڏهن هنن ست ڍڳا ۽ ست گهٽا قربان ڪيا.

²⁷ ۽ دائود، ۽ سڀ لاوي جن صندوق کنئي هئي، ۽ ڪنانياہ ڳائڻ وارن جو سردار، ۽ سڀ ڳائڻا جي ساڻس هئا، تن کي ڪتاني سڻيءَ جا جبا پيل هئا: ۽ دائود کي ڪتاني سڻيءَ جو افود پيل هو.

²⁸ انهيءَ طرح سڀني اسرائيلين نعرا هڻي ۽ زور سان ناد ۽ تريون، جهانجهہ، تنبورا ۽ بربط وڄائيندي، خدا جي عهدنامي جي صندوق آندي.

²⁹ ۽ هيئن ٿيو تہ جيئن خداوند جي عهدنامي جي صندوق دائود جي شهر ۾ آئي، تيئن سائول جي ڌيءَ ميڪل دريءَ مان ٻاهر نهاريو، ۽ دائود بادشاهہ کي نچندو ٽپندو ڏٺائين؛ ۽ سندس دل ۾ هن لاءِ حقارت پيدا ٿي.