ரோமர் 6 - Saurashtra Bible (BSI)

கிறிஸ்துகெ ஐக்யம்

¹ எக லெங்கு ஸங்கெ விஷயமுனுக் தொவ்லி அமி காய் தீர்மானுக் அவன்? தேவுகெ கிருபொ வேன் ஹொனொ மெனெதி அமி பாப் கெருவாய் மெனி ஸங்குவாய்கீ? கொப்பிம் ஸங்கன் ஹோனா.

² பாபுக் மொஜ்ஜிய அமி பீர் தெமாமூஸ் கோனக் ஜிவன் முஸய்?

³ கிறிஸ்து ஏசு ஸெந்தொ ஐக்யம்கன் ரா:ஸ்ததானுக் அமி அஸ்கின் ஞானஸ்நான் கள்ளியாஸ். அமி ஞானஸ்நான் கள்ளியெவேளு, ஏசுகெ மொரனும் மெளி ஐக்யம்கன் ரா:ஸ்ததானுக் ஞானஸ்நான் கள்ளியாஸ் மெனி தும்கொ சொக்கட் களாய்.

⁴ பரலோகு பா³புகெ மஹிமெ பொரெ ஸக்திஹால் கிறிஸ்து மொரனும்ரீ: ஜீவ் ஸெந்தொ ஹுடட்னி பொடெஸோன், அமி மெளி மேட் ஹொயெ நொவ்வொ ஜிவ்னம் ஜிவஸ்தக் ஞானஸ்நான் வாட்கன் ஏசு ஸெந்தொ மொரி க³ட்னி பொட்யாஸ். (கொலோ 2:12)

⁵ இஸனி ஞானஸ்நான் வாட்கன் ஏசுகெ மொரனும் அமி பாத்யம் கள்ளியெதி, தெனு ஜீவ் ஸெந்தொ ஹுடெஸோன் அமி மெளி ஜீவ் ஸெந்தொ ஹுடன் முஸய்.

⁶ அமி அத்தெங்குட் பாபுக் ப⁴ந்தைத்கன் ரா:னாஸ்தக், அம்ரெ ஸரீருகெ பாபு ஸக்தி நாஸ் ஹோஸ்ததானுக் அம்ரெ ஜுண்ண மெனிகு ஸுபா⁴வ் ஏசு ஸெந்தொ ஸிலுவாம் ஹன்னி பொடெஸ்தெ அம்கொ சொக்கட் களாய்.

⁷ மொரஸ்தெனொ பாபு ஸக்திம்ரீ: ஸொடுவி பொந்தரியொ.

⁸ கிறிஸ்து ஸெந்தொ அமி மொரெதி, தெங்கொ ஸெந்தொ அமி ஜிவன். எல்லேஸ் அம்ரெ நொம்கெ. (2 தீமோ 2:11)

⁹ மொரனும்ரீ: ஜீவ் ஸெந்தொ ஹுடெ கிறிஸ்து அத்தெங்குட் மொர்னான். மொரன் அத்தெங்குட் தெங்கொ ராஜ்ஜல்னா மெனி அம்கொ சொக்கட் களாய்.

¹⁰ பாபுகெ ஸக்திக் நாஸ் கெரஸ்தக் ஒண்டேவாள் அஸ்கினாகுர்சி ஏசு மொர்யாஸ். அத்தொ தெனு தேவுக் மெனி ஜிவராஸ்.

¹¹ திஸோஸ் பாபுகெ ஸக்தி அத்தெங்குட் தும்கொ ராஜ்ஜல்னா. துமி பாபு ஜிவ்னமுக் மொஜ்ஜியாஸ். கிறிஸ்து ஏசுகெ ஐக்யமும் தேவுக் மெனி ஜிவராஸ் மெனஸ்த களைளுவொ.

¹² அத்தெங்குட் தும்ரெ ஸரீருக் பாப் ராஜ்ஜலஹோனா; துமி தும்ரெ மொன்னு இச்சான்தானுக் சலஸ்தக் தாம் தேஹோனா.

¹³ துமி தும்ரெ ஸரீர அங்கமுனுக் அநீதிகெ அயுதுல்னுக் நிகர்கன் ஸேஸ்தெ பாபுக் ஒப்பிஞ்சி தேஹோனா. துமி மொரனும்ரீ: ஜீவ் ஸெந்தொ ஹுடெ மென்க்யான்ஸோன் தும்கொ தேவ்ஜோள் ஒப்பிஞ்சி தெவொ. தும்ரெ ஸரீர அங்கமுனுக் நீதி பொ⁴ரெ அயுதுல்னுகன் தேவ்ஜோள் ஒப்பிஞ்சி தெவொ.

¹⁴ பாப் தும்கொ ராஜ்ஜலஹோனா. காமெனெதி அத்தொ தும்கொ நியாய ப்ரமாண் ராஜ்ஜலரெனி; தேவுகெ கிருபொ தும்கொ ராஜ்ஜலரெஸ்.

நீதிக் ப⁴ந்தைத்கன் ர:னொ

¹⁵ அமி தீர்மான்கன் காய் ஸங்கன் முஸய்? நியாய ப்ரமாண் அம்கொ ராஜ்ஜல்னாஸ்தக் தேவுகெ கிருபொ அம்கொ ராஜ்ஜலரியஹால் அமி பாப் கெர்லேத் ர:வாய் மெனி ஸங்குவாய்கீ? கொப்பிம் திஸனி ஸங்கன் ஹோனா.

¹⁶ கொங்கஜோள் ப⁴ந்தைத்கன் தும்கொ ஒப்பிஞ்சி தேராஸ்கி தெங்கொஜோள் துமி ப⁴ந்தைத்கன் ர:னொ மெனி தும்கொ களானாகீ? துமி பாபுக் ப⁴ந்தைத்கன் ரி:யெதி, தும்கொ மொரனூஸ் ப²லன்கன் அப்பய். துமி தேவுக் ப⁴ந்தைத்கன் ஜிவெதி நீதி பொரெ ஜிவ்னம் தும்கொ ப²லன்கன் அப்பய்.

¹⁷ ஒண்டெ காலும் துமி பாபுக் ப⁴ந்தைத்கன் ர:த, தும்ரெஜோள் ஒப்பிஞ்சி தியெ போதனானுக் களைளி த்யெதானுக் சலஸ்தக் ப்ரேவ் பொட்யாஸ். தெகொகுர்சி மீ தேவுக் தந்யவாத் கெரரியொ.

¹⁸ அத்தொ துமி பாபும்ரீ: ஸொடுவி பொந்தி நீதிக் ப⁴ந்தைத்கன் ஸே.

¹⁹ துமி இவர் கெல்லன் முஸுனா மெனஸ்த மீ களைளி தும்கொ இவர் பொடஸ்தக் மீ இஸனி ஸங்கரியொ. தும்ரெ ஸரீர அங்கமுனுக் துமி அஸுத்தி⁴கின், அக்ரமம் பொரெ கார்யமுன் கெரஸ்தக் துமி தும்கொ ஒப்பிஞ்சி தீ³ ஹொத்யாஸ். திஸோஸ் அத்தொ துமி தும்ரெ ஸரீர அங்கமுனுக் பரிஸுத்தம்கின் நீதி பொரெ கார்யமுன் கெரஸ்தக் ஒப்பிஞ்சி தெவொ.

²⁰ துமி பாபுக் ப⁴ந்தைத்கன் ர:த, நீதி பொரெ கார்யமுன் கெர்யானி.

²¹ அத்தொ துமி லாஜ் பொடரிய கார்யமுனுக் தெப்பொ துமி மொன்னு ஒப்பய் கெர்யாஸ். த்யெலெந்தால் தும்கொ அப்பெ ப²லன் காயொ? மொரனூஸ் தும்கொ ப²லன்கன் அப்பெஸ். (ரோமர் 8:6,13)

²² அத்தொ துமி பாபும்ரீ: ஸொடுவி பொந்தி தேவுக் ப⁴ந்தைத்கன் ஸே. எகலெந்தால் அத்தொ தும்கொ அப்பரிய ப²லன் பரிஸுத்த ஜிவ்னம். ஸெத்லகன் நித்ய ஜிவ்னம் மெளி அப்பய்.

²³ பாபுகெ ப²லன் மொரன். ஹொயெதி அம்ரெ பகவான் ஏசு கிறிஸ்து வாட்கன் தேவ் தேரிய நித்ய ஜிவ்னம் அம்கொ தெ⁴ரும்கன் அப்பிரியொ.