தர்ஸன புஸ்தவ் 11 - Saurashtra Bible (BSI)

தீ³ ஸாக்ஷின்

¹ பல்சொ, பெ³த்தம்ஸோன் ஹொதெ ஒண்டெ லெ:க்கா வள்டி மொர்ஜோள் தெனி பொடெஸ். தெப்பொ, “தூ ஹுடி தேவுகெ த⁴வ்ராக்கின், தெக பலி பீடமுக் மொவ்ஜி ஸா. தேட் பாய்ம் பொடரிய மென்க்யானுக் மெளி மொவ்ஜி ஸா. (எசே 40:3; சக 2:1,2)

² த⁴வ்ராகெ ரவுள், யூத குலமும் உஜுனாஸ்த மென்க்யான்ஜோள் ஒப்பிஞ்சி தீரியஹால் தெல்லெ மொவ்ஜுங்கொ. தெனு பரிஸுத்த பட்ணமுக் 42 (தி³ஞ்சளிஸ்) ம:டொ லெங்கு தொக்கி நாஸ் கெரன். (லூக் 21:24)

³ மொர் வத்தானுக் ப்ரசார் கெரரிய தீ³ ஸாக்ஷினுக் மீ த⁴ட்டு. தெனு து³க்கு வஸ்தர் பி²ல்லி 1,260 (ஸஸருர் தீ³ ஸோவுர் ஷாட்) தின்னு லெங்கு தீர்கதரிஸனம் ஸங்கன்’’ மெனி மொர்ஜோள் ஸங்க்யாஸ்.

⁴ எனு புலோகுக் ராஜ்ஜலரிய பகவான்கெ ஸமூஹமும் ஹிப்பி ரா:ன். எனு தீ³ ஒலிவ ஜாடுனுக்கின், தீ³ த²ந்திலி தி³வானுக் கு³ர்துகன் ஸே. (சக 4:3,11-14)

⁵ தெங்கொ கோன்தி ஹீன் கெரன் ஸியெதி, அத²வா தெங்கொ தெங்கொ கோன்தி ஹீன் கெர்னொ மெனி ஹவ்டெதி தோணும்ரீ: அக்னி நிகிளி அவி தெங்கொ மிங்குதய்.

⁶ தெனு தீர்கதரிஸனம் ஸங்கரிய தின்னுநும் பொவுஸ் பொட்னாஸ்ததானுக் ஹபாளுக் ஜ²கரிய ஸக்தி தெங்கொ ரா:ய். தெனு பனிக் ரெகத்கன் மர்சடி, தெனு ஹவ்டரிய கெ⁴டி புலோகு மென்க்யானுக் ஸகல வித ரோகுன் அவடி ஹிம்ஸொ கெரஸ்தக் தெங்கொ அதிகார் ரா:ய். (1 ரஜா 17:1)

⁷ தெல்லெ தீ³ ஸாக்ஷின் தேவுகெ வத்தானுக் ஸங்கி முஸடெ பல்சொ, பதாளு க²ணிம்ரீ: மூகு பராட் அவி தெங்கொ ஸெந்தொ யுத்தம் கெரி, தெங்கொ ஜெகிஞ்சி, தெல்லெ தீ³ ஸாக்ஷினுக் மொரட்டுகய். (தானி 7:7)

⁸ தெங்கொ மொடொ தெல்லெ ம:ட்ட பட்ணமு வீதும் பொட்ரா:ய். தெல்லெ பட்ணமுக் சோதோம் மெனிகின், எகிப்து மெனி த்ருஷ்டாந்தம்கன் ஸங்கன். எல்லே பட்ணமும் தெங்கொ பகவானுக் மெளி ஸிலுவாம் ஹனி மொரட்யாஸ். (ஏசா 2:9,10)

⁹ வெகுள வெகுள மென்க்யான், கோத்ருன், தேஸு மென்க்யான் தெங்கொ மொடாக் தி²ன்ஹத்து³ தின்னு லெங்கு ஸான். தெங்கொ க³டஸ்தக் கொன்னின் அநுமதி தேனான்.

¹⁰ எல்லெ தீ³ தீர்கதரிஸின் மொஜ்ஜியெஹால் புலோகு மென்க்யான் ஜுகு ஸொந்தோஷ் பொடன். மென்க்யான் ஓகோகுன் ஸொந்தோஷ் பொடி ப³ஹுமான் தீ³ கள்ளன்.

¹¹ ஹொயெதி தி²ன்ஹத்து³ தின்னு ஜியெ பல்சொ, தேவுகெ ஜீவ் தேரிய ஸ்வாஸ் தெங்கொ பிஸ்தர் ஜியெஸ். தெனு ஹுடி ஹிப்யாஸ். தெங்கொ ஸியெ அஸ்கினாக் வேன் தாக் அவெஸ். (எசே 37:10)

¹² தெப்பொ “ஏட் ஹிங்கி அவொ’’ மெனி ஒண்டெ ம:ட்ட ஸெத்து³ அகாஸும்ரீ: அவெஸ்தெ தெல்லெ தீ³தெனு அய்கி, தெங்கொ விரோதின்கெ தொளா வெதுரூஸ் தெனு மேக் ஹொல்லெ ஜியாஸ். (2 ரஜா 2:11)

¹³ தெல்லெ கெ⁴டிமூஸ் ம:ட்ட பூகம்பம் அவி, பட்ணமும் தெ³ஸ்ஸும் ஒண்டெ வடொ கா²ல் பொடெஸ். எல்லெ பூகம்பம்ஹால் 7,000 (ஸாத் ஸஸர்) மென்க்யான் மொஜ்ஜியாஸ். உராவ் மென்க்யான் தக்கி பரலோகும் ஸேஸ்தெ தேவுக் மஹிமெ கெர்யாஸ்.

¹⁴ இஸனி தி³வ ஆபத் ஜேட்யொ. ஏலா, தி²ன்வ ஆபத் ஸெணம் அவஞ்ஜாரியொ.

ஸத்வ ஸங்க³நாது

¹⁵ ஸத்வ தேவு தூது ஸங்க³நாது புகெஸ். தெப்பொ அகாஸும் ம:ட்ட கம்பீர ஸெத்து³ அவி, “எல்லெ புலோகுக் ராஜ்ஜலரிய பாத்யம் அம்ரெ பகவான்கன் ஸேஸ்தெ ரக்ஷகருக் ஸே. தெனு கொப்பிம் ராஜ்ஜலன்’’ மெனி களடெஸ்.

¹⁶ தேவு ஸமூஹமும் அபுல் ஸிங்காஸனமும் பி³ஸிரிய 24 (சரவீஸு) ஒள்ட்யான் தேவுக் நமஸ் கெரி ஸங்கெ விஷயம்:

¹⁷ “ஸர்வ ஸக்தி பொ⁴ரெ தேவ் பகவானு, ஸேஸ்தெனுகின், ஹொத்யாஸ்தெனுகின், அவஞ்ஜாரிய தேவ்கன் ஸேஸ்தெ தும்கொ ஸ்தோத்ரு; துமி தும்ரெ மஹா ஸக்திஹால் புலோகுக் ராஜ்ஜலராஸ். (ஆமோ 3:13; 4:13)

¹⁸ துஸ்ர தேஸு மென்க்யான் ராக்³ பொட்யாஸ். தெப்பொ தும்கொ மெளி ராக்³ ஹுப்பி அவெஸ். மொர்யாஸ்தெனு நியாவ் ஸார்வொ பொந்தரிய கெ⁴டி அவ்டியொ; திஸோஸ் தும்ரெ தீர்கதரிஸின், பரிஸுத்துடுன், தும்கொ கெனம் கெரரிய ம:ட்டான், ந:ன்னான் அஸ்கினாக் துமி ஹேது கெரரிய தின்னு அவ்டியொ. பு⁴ஞிக் பாட் கெரெ மென்க்யானுக் நாஸ் கெரரிய தின்னு அவ்டியொ’’ மெனி ஸங்க்யாஸ். (ஸங் 2:1,5)

¹⁹ பல்சொ, பரலோகும் தேவுகெ த⁴வ்ரொ ஹுடட்னி பொடெஸ். தெல்லெ த⁴வ்ராம் பகவான்கெ நியமந்த்கெ பெடி தெக்கயெஸ். தெப்பொ சபல்னு, பயங்கர ஸெத்து³ன், பிடுகு ஸெத்து³ன், பூகம்பம், ம:ட்ட கு³ண்டா பொவுஸ் பொடெஸ்.