ஸங்கீதுன் 79 - Saurashtra Bible (BSI)

தேஸ் ஸொடுவி பொந்தஸ்தக் கெரரிய ப்ரார்தன

(ஆசாபுகெ கீத்)

¹ தேவு, துஸ்ர தேஸு மென்க்யான் தும்ரெ தேஸுக் ஜெகிஞ்சிதியாஸ்; தும்ரெ பரிஸுத்த த⁴வ்ராக் அண்டு கெர்திகியாஸ்; எருசலேமுக் நாஸ் கெர்திகியாஸ். (2 ரஜா 25:8-10; 2 சரி 36:17-19; எரே 52:12-14)

² தும்ரெ ஸெவ்கனுன்கெ ஸரீருக் அகாஸு பக்ஷினுக்கின், தும்ரெ பக்துடுன்கெ ஆங்குக் ராணு மூகுனுக் க²வ்ணம்கன் தீடியாஸ். (எரே 7:33)

³ எருசலேமும் தெங்கொ ரெகதுக் பனிஸோன் லுச்சட்யாஸ்; தெங்கொ ஸரீருக் க³டஸ்தக் கொன்னின் நீ:

⁴ அந்யத்ரான் அம்கொ அவ்மான்கன் ஹவ்டராஸ்; ஸெஜ்ஜ பஜ்ஜான் அம்கொ ஸீ கேலி கெரி அஸராஸ்.

⁵ பகவானு, துமி அம்ரெஜோள் அங்குன் கித்க தின்னு லெங்கு ராக்³கன் ரா:ன்? கொப்பிம் இஸோஸ் ரே:டன்கீ? தும்ரெ அத்தி³கு ராக்³ அக்னிஸோன் ஜெள்லேத் ரா:ய்கீ?

⁶ தும்கொ நொம்முனாஸ்த துஸ்ர தேஸுன் ஹொல்லெகின், தும்கொ பாய்ம் பொட்னாஸ்த ரஜான்ஜோள் துமி ராக்³ பொடுவொ. (2 தெச 1:8)

⁷ காமெனெதி தெனு யாக்கோபுகெ ஸந்ததினுக் மிங்கிதியாஸ்; தும்ரெ தேஸுக் நாஸ் கெர்யாஸ்.

⁸ அம்ரெ ஒள்ட்யான் கெரெ சூகுனுக் அம்கொ தண்டன தெவுங்கன்; அத்தொ அம்கொ தயவு கெருவொ; அம்கொ காய் சலய் மெனி களானாஸ்தக் அமி ஜிவராஸ்.

⁹ அம்கொ ரக்ஷண் கெரரிய தேவு! அம்கொ ஸொடுவி கெருவொ; அம்ரெ பாபுனுக் க்ஷமொ கெருவொ; தும்ரெ நாவ் கெனம் பொந்தஸ்தக் துமி அம்கொ ஹேது கெருவொ.

¹⁰ ‘தும்ரெ தேவ் கோட் ஸே’ மெனி துஸ்ர தேஸு மென்க்யான் புஸராஸ்; தும்ரெ பக்துடுனுக் தெனு மொரடெஹால் அம்ரெ தொளா வெதுருஸ் துமி தெங்கொ தண்டன தெவொ.

¹¹ ப⁴ராட் தேஸும் ப⁴ந்தைதுன்கன் ஜிவரிய அம்ரெ மென்க்யானுகெ கஷ்டம் தும்கொ களாந்தக்! மொரனு தண்டன பொந்தெ மென்க்யானுக் தும்ரெ மஹா ஸக்திஹால் கபடுவொ.

¹² மொர் மஹா ப்ரபு, துஸ்ர தேஸு மென்க்யான் தும்கொ கேலி கெரெஹால், ஸாத் கு³ணாவ் தண்டன தெங்கொ அப்பந்தக்.

¹³ அமி தும்ரெ ஜெனுல்னு; துமீஸ் அம்கொ சல்த கெரராஸ்; அமி கொப்பிம் தும்கொ ஸ்துதி கெரன். தோ²ர் தோ²ர்னுகன் அமி தும்கோஸ் ஸ்துதி கெரன்.