மாற்கு 13 - Saurashtra Bible (BSI)

எருசலேம் த⁴வ்ரொ நாஸ் ஹோய்

¹ ஏசு த⁴வ்ராம்ரீ: பராட் அவஸ்தவேளு தெங்கொ சிஷ்யானும் ஒண்டெதெனொ, “போதகரு, ஏட் ஸவொ, ஜுகு ஸிங்கார் தெய்டான்ஹால் எல்லெ மண்டபுனுக் பந்திராஸ்! ஸவொ’’ மெனி ஸங்கெஸ்.

² தெப்பொ ஏசு, “ஏட் அத்தொ இத்க ம:ட்ட மண்டபுனுக் துமி ஸாராஸ். ஹொயெதி ஒண்டெ கு³ண்டான் ஹொல்லெ ஒண்டெ கு³ண்டொ ரா:னாஸ்ததானுக் அஸ்கி புட்டி நாஸ் ஹோய்’’ மெனி ஸங்க்யாஸ்.

அவஞ்ஜாரிய ஹிம்ஸொகின் பாத

³ ஏசு த⁴வ்ரா வெதுர் ஒலிவ தொங்கரும் அலக்க³ பி³ஸி ர:த, பேதுரு, யாக்கோபு, யோவான், அந்திரேயா மெனஸ்தெனு ஏசுஜோள் அவி,

⁴ “துமி ஸங்‌கெ எல்லெ ஸம்பவம் கொப்பொ சலய்? எல்லெ அஸ்கி சலஞ்ஜாரிய காலுக் காய் கு³ர்து?’’ மெனி புஸ்யாஸ்.

⁵ ஏசு சிஷ்யானுக் ஸீ, “தும்கொ கொன்னின் ஹொங்கட்னாஸ்ததானுக் ஜாக்ரதகன் ர:வொ.

⁶ காமெனெதி ஜுகுதெனு மொர் நாவுக் உபயோக் கெரி ‘மீஸ் மேசியா' மெனி ஸங்கிலி ஜுகுதெங்காக் ஹொங்கடன்.

⁷ யுத்தமுக்கின், யுத்தமுக் தெ⁴ரெ ஸமசார் துமி அய்கினி பொடஸ்தவேளு தக்குங்கன். எல்லெ அஸ்கி சலீஸ் ஹொனொ. ஹொயெத் மெளி ஸெத்ல தின்னுன் ஸெணம் அவ்னா.

⁸ தேஸுக் விரோத்கன் தேஸ் யுத்தம் கெரய்; ராஜ்யமுக் விரோத்கன் ராஜ்யம் ஜெடொ மல்லய். ஜுகு தாம் பூகம்பம்கின் து³காள் அவய். எல்லெ அவஞ்ஜாரிய பா³தானுக் ஹர்ம்பம்.

⁹ “துமி ஜாக்ரதகன் ர:னொ. காமெனெதி ஆலோசன ஸபா மென்க்யான்ஜோள் தும்கொ ஒப்பிஞ்சி தேன். ப்ரார்தன த⁴வ்ரானும் தும்கொ ஹனன். மொகொ விஸ்வாஸ் கெரரியஹால் தும்கொ விசான கெரஸ்தக் தேஸாதிபதின்ஜோள்கின், ரஜான்ஜோள் பெல்லி ஜான். மொகொகுர்சி துமி தேட் ஸாக்ஷி ஸங்கன்.

¹⁰ எல்லெ ஸம்பவமுன் அஸ்கி சலஸ்தக் முல்லொ, அஸ்கி தேஸுனுக் சொக்கட் ஸமசார் ஸங்கினி பொட்னொ.

¹¹ தும்கொ கைது கெரி விசான கெரஸ்தவேளு துமி காய் வத்தொ கெரஸ்தெ மெனி விசார் பொடுங்கன். தெல்லெ கெ⁴டி தேவ் தும்கொ தேரிய வத்தானுக் கெருவொ. காமெனெதி வத்தொ கெரஸ்தெனு துமி நா: பரிஸுத்த ஆவி தெல்லெ கெ⁴டி தும்கொ வத்தொ தேன்.

¹² தெல்லெ தின்னுநும் பை⁴ பெ⁴ய்னான் அபுல் ஸெங்கொ உஜெ பை⁴ பெ⁴ய்னானுக் தெக்கடி தேன். மாய் பா³ப் அபுல் பில்லல்னுக்கின், பில்லல்னு அபுல் மாய் பாபுக் மொரடன்.

¹³ மொகொ விஸ்வாஸ் கெரரியஹால் அஸ்கின் தும்கொ த்³வேஷ் கெரன். ஸெத்ல லெங்கு விஸ்வாஸும் தீ⁴ர்குகன் நிள்சி ரா:ஸ்தெனூஸ் ரக்ஷண் பொந்தன்.

அவஞ்ஜாரிய மஹா பயங்கர ஹிம்ஸொ

¹⁴ “நாஸ் கெரரிய அண்டுக் பரிஸுத்த ஸ்தலமும் தொவ்ரியாஸ்தெ துமி ஸான். எல்லெ செவ்தஸ்ததெனு அர்து காயொ மெனி இவர் கெல்லந்தக். தெப்பொ யூதேயாம் ஸேஸ்தெனு தொங்கருக் தமி ஜாந்தக். (தானி 9:27; 11:31; 12:11)

¹⁵ கே⁴ர் ஹொல்லெ ஸேஸ்தெனு க²ல்லெ ஹுத்ரஹோனா; கொ⁴ம்மொ ஜீ காய்தி கள்ளி அவ்டுவாய் மெனி ஹவ்டஹோனா.

¹⁶ கே²தும் ஸேஸ்தெனு அபுல் உஞ்சா வஸ்தருக் கள்ளஸ்தக் ஜாஹோனா.

¹⁷ தெல்லெ தின்னும் கெ⁴ர்வார் ஸேஸ்தெங்கொகின் தூத் தேரிய பெய்லானுக் ஐயோ! தெனு ஜுகு பாத பொடன்.

¹⁸ எல்லெ ஹிம்ஸான் ஹீமு தின்னும் அவஹோனா மெனி ப்ரார்தன கெருவொ.

¹⁹ காமெனெதி தெல்லெ தின்னுநும் மென்க்யான் வேன் பாத பொந்தன். தேவ் புலோகுக் உருகெரெ தின்னுரீ: ஹிந்தா தின்னு லெங்கு மென்க்யானுக் இஸான் பா³தான் அவி ரா:னா. அத்தெங்குட் மெளி இஸனி அவ்னா. (யோயேல் 2:2; தானி 12:1)

²⁰ பகவான் தெல்லெ தின்னுநுக் உன்னொ கெர்னா ஜியெதி கொன்னின் ஜிவன் முஸுனா. ஹொயெதி தேவ் களைளியெ மென்க்யான் கபட்னி பொடஸ்தக் தெல்லெ தின்னுநுக் தேவ் உன்னொ கெர்ரியாஸ்.

²¹ “தெப்பொ கோன்தி தும்ரெஜோள் அவி, ‘ஏலா, மேசியா ஏட் ஸே; தேலா, மேசியா தேட் ஸே’ மெனி ஸங்கெதி நொம்முங்கன்.

²² காமெனெதி சொட்டொ மேசியான்கின், சொட்டொ தீர்கதரிஸின் அவன். முஸெதி தேவ் களைளியெ விஸ்வாஸின் மெளி ஹொங்கி ஜாஸ்ததானுக் அங்கிதமுன்கின் அற்புதுன் கெரன்.

²³ துமிகீ ஜாக்ரதகன் ர:னொ. ஏலா, அஸ்கி விஷயமுனுக் மீ முல்லோஸ் தும்கொ ஸங்குதரியொ.

மெனிகு பெடொ அவரிய தின்னும் சலரிய ஸம்பவம்

²⁴ “ஹிம்ஸொ பொந்தரிய தெல்லெ தின்னுன் முஸெ பல்சொ ஸுரித் ஹந்தார் பொடய். சாந்து ஹுஜாள் தேனா.

²⁵ நக்ஷத்ருன் கல்லெ பொடய். அகாஸுகெ அதிகார ஸக்தின் துஸ்ர தாமுக் ஜாய். (ஏசா 13:10; 34:4; எசே 32:7; யோயேல் 2:10; 3:4; ஆகா 2:6,21)

²⁶ தெப்பொ மெனிகு பெடொ ஸர்வ ஸக்திகன் மஹிமெ பொரெ மேகும் அவராஸ்த துமி தெக்கன். (தானி 7:13,14)

²⁷ தெனு அபுல் தேவு தூதுனுக் பு⁴ஞிர் சரு திக்குனுக் தட்டன். தெனு எல்லெ புலோக் பூரா ஜீ பகவான் களைளியெ மென்க்யானுக் ஒண்டேஸ்கன் மிளடன்.

உம்ப்ளா ஜாடு உபமான்

²⁸ “உம்ப்ளா ஜாடும்ரீ: ஒண்டெ விவர் களைளுவொ. தெல்லெ ஜாடு கொம்மான் சிகுர் அவி பான் ஸொடஸ்தவேளு ஹூனு தின்னு லெகுத்த ஸே மெனி தும்கொ களாய்.

²⁹ திஸோஸ் மீ ஸங்கரிய ஸம்பவமுன் சலஸ்தவேளு மெனிகு பெடொ பீர் அவஞ்ஜாரிய காலு லெகுத்த ஸே மெனிகின், தெனு தார்ஜோள் அவ்டியாஸ் மெனஸ்த களைளுவொ.

³⁰ மீ ஸங்கெஸ்தெ அஸ்கி சலஸ்தக் முல்லொ எல்லெ ஸந்ததி நாஸ் ஹோனா மெனி தீ⁴ர்குகன் மீ தும்கொ ஸங்கரியொ.

³¹ அகாஸ்கின் பு⁴ஞி நாஸ் ஹோய். மொர் வத்தான் கொப்பிம் நாஸ் ஹோனா.

மெனிகு பெடொ அவரிய தின்னுகின் கெ⁴டி

³² “மெனிகு பெடொ அவரிய தெல்லெ தின்னுகின் கெ⁴டி கொப்பொ மெனி பா³புக் ஜத துஸ்ர கொங்கினாக் களானா. பரலோகுகெ தூதுனுக் மெளி களானா. பெடாக் மெளி களானா.

³³ தெல்லெ கெ⁴டி கொப்பொ அவய் மெனி தும்கொ களானா. தேஹாலிம் ஜாக்ரதகன் ர:வொ. ஜகிலேத் ரீ: ப்ரார்தன கெருவொ.

³⁴ மெனிகு பெடொ பீர் அவரிய ஸம்பவம் 'ஒண்டெ எஜமான் அபுல் கே⁴ருக் ஸொட்டி பராட் தேஸுக் ஜாரிய ஸம்பவமுக் நிகர்கன் ஸே.' தெனொ அபுல் காம்கெரானுக் பொவி தென்தெனு கெர்னொ ஸேஸ்தெ காம் காயொ மெனி ஆக்³ஞொ தகரெஸ். தா³ர்ர:காக் ஸீ தூ ஜாக்ரதகன் ஜகிலேத் ரீ: கே⁴ருக் ஸீலெ மெனி ஸங்கிதி ஜாரெஸ்.

³⁵ திஸோஸ் துமி மெளி ஜாக்ரதகன் ஜகிலேத் ர:னொ. காமெனெதி கே⁴ரு எஜமான் வீள்டொதீ, ஹத்து³ ராதும்தீ, குடொ பொவரியவேளும்தீ, ஸொளபாரும்தீ, கொப்பொ அவன் மெனி தும்கொ களானா.

³⁶ திஸோஸ் துமி ஹவ்டி ஸானாஸ்தவேளு மெனிகு பெடொ அவி துமி நிஞ்ஜிரியாஸ்தெ தெக்கஹோனா.

³⁷ மீ தும்கொ அஸ்கினாக் எல்லெ ஸங்கரியொ. ஜாக்ரதகன் ர:வொ’’ மெனி மென்யாஸ்.