ஓசியா 1 - Saurashtra Bible (BSI)

¹ யூதா தேஸுக் உசியா, யோதாம், ஆகாஸ், எசேக்கியா மெனஸ்தெனு ராஜ்ஜலெ காலும்கின், இஸ்ரயேலுக் யோவாஸுகெ பெடொ எரொபெயாம் ராஜ்ஜலெ காலும் பெயேருகெ பெடொ ஓசியாக் தெனி பொடெ பகவான்கெ வத்தான்.

ஓசியாகெ பெய்ல்கின் பில்லல்னு

² பகவான் முல்லொகன் ஓசியாஜோள் வத்தொ கெரெவேளு ஸங்க்யாஸ்தெ: “தூ ஜீ ஒண்டெ வேசிக் ஹொராட் கெல்லெ; தெனொ தொகொ நொம்கெ துரோக் கெர்திகி ஜெனரிய பில்லல்னுக் தூ பா³ப்கன் ரா:ய்; காமெனெதி இஸோஸ் மொர் மென்க்யான் மெளி மொகொ நொம்கெ துரோக் கெர்திகி துஸ்ர தெய்வுனுக் பாய்ம் பொடராஸ் மெனஸ்தக் எல்லெ ஒண்டெ உதாரணகன் ரா:ய்” மெனி ஸங்க்யாஸ்.

³ பகவான்கெ வத்தாதானுக் ஓசியா ஜீ, திப்லிகெ பெ³டி கோமேருக் ஹொராட் கெல்லியெஸ். தெனொ கெ⁴ர்வார் ஹொயி ஒண்டெ பெடாக் ஜெனிஸ்.

⁴ தெப்பொ பகவான் ஓசியாக் ஸீ, “எல்லெ பில்லாக் ‘யெஸ்ரயேல்’ மெனி நாவ் தோ²வ். காமெனெதி யெகூகெ ஸந்ததின் யெஸ்ரயேல் மெனரிய தாமும் இஸ்ரயேல்கெ ரஜாக் செக்கி மொரடெஹால் மீ அங்குன் ருவ்வொ தின்னும் தெங்கொ தண்டன தொ³வு. எகூகெ ஸந்ததின் அத்தெங்குட் இஸ்ரயேலுக் ராஜ்ஜல்னாஸ்ததானுக் மீ தெங்கொ அஸ்கினாக் நாஸ் கெரு. (2 ரஜா 9:15—10:14)

⁵ தெல்லெ தின்னும், யெஸ்ரயேல் க²ணிபும் தெங்கொ ராணுவமுக் மீ நாஸ் கெரு” மெனி ஸங்க்யாஸ்.

⁶ ஓசியாகெ பெய்ல் கோமேர் பீர் கெ⁴ர்வார் ஹொயி ஒண்டெ பெட்கி பில்லாக் ஜெனிஸ். தெப்பொ பகவான் ஓசியாக் ஸீ, “எல்லெ பில்லாக் ‘லோருகாமா’ மெனி நாவ் தோ²வ். காமெனெதி இஸ்ரயேல்னுக் மீ தயவு தெக்கட்னா; தெனு கெரெ பாபுனுக் மீ க்ஷமொ கெர்னா.

⁷ ஹொயெதி யூதா தேஸு மென்க்யானுக் மீ தயவு கெரு. விரோதின்ஜோள்ரீ: தெங்கொ கபடஸ்தக் ப⁴லொ, த³னுஷ், பா³ண், கொ⁴டான், யுத்த வீருடுன் இத்யாதின் கொன்னி வேஸ் நீ: தேவ் பகவான்கன் ஸேஸ்தெ மீஸ் தெங்கொ கபடு” மெனி ஸங்க்யாஸ்.

⁸ லோருகாமா தூத் பேஸ்த விஷ்ரள்ளியெ பல்சொ கோமேர் பீர் ஒண்டெ பெட்கொ பில்லாக் ஜெனிஸ்.

⁹ தெப்பொ பகவான் ஓசியாக் ஸீ, “எல்லெ பில்லாக் ‘லோகம்மீ’ மெனி நாவ் தோ²வ். காமெனெதி துமி மொர் மென்க்யான் நா: மீ தும்ரெ தேவ் நாவ் நா:” மெனி ஸங்க்யாஸ்.

இஸ்ரயேலுக் தேவ் தேரிய வாக்கு

¹⁰ ஹொயெதி இஸ்ரயேல்னுக் கொன்னின் மொவ்ஜன் முஸுனா. தெனு ஸெந்துரு வளுன்ஸோன் வேன் ரா:ன். “துமி மொர் மென்க்யான் நா:” மெனி அத்தொ தேவ் தெங்கொ ஸீ ஸங்கெத் மெளி பல்சொ ஒண்டெதி, “துமி ஜீவ் ஸேஸ்தெ தேவுகெ பில்லல்னு” மெனி தெங்கொ ஸீ ஸங்கன். (ரோமர் 9:26)

¹¹ யூதா, இஸ்ரயேல் தேஸு மென்க்யானுக் தேவ் ஒண்டேஸ்கன் மிளடன். தெனு ஒண்டெ அதிபதிக் ந்யமுன் கெல்லி ப⁴ந்தைது தேஸும்ரீ: பிரி அவி அபுல் தேஸுக் பாத்யம் கெல்லன். தெல்லெ தின்னூஸ் யெஸ்ரயேல்கெ மஹா விஸேஷ் தின்னு.