எஸ்ரா 7 - Saurashtra Bible (BSI)

எஸ்ரா எருசலேமுக் அவரெஸ்

¹ ஜுகு ஒர்ஸு பல்சொ, பெர்சிய தேஸு ரஜொ அர்தசஷ்டா ராஜ்ஜலெ காலும் எஸ்ரா மெனி ஒண்டெதெனொ ஹொதெஸ். தெனொ பாபிலோனும்ரீ: எருசலேமுக் அவெஸ். (நெகே 2:1)

² எஸ்ரா செராயாகெ பெடொ; செராயா அசரியாகெ பெடொ; அசரியா இல்கியாகெ பெடொ; இல்கியா சல்லூமுகெ பெடொ; சல்லூம் சாதோக்குகெ பெடொ; சாதோக்கு அகிதூபுகெ பெடொ.

³ அகிதூபு அமரியாகெ பெடொ; அமரியா அசரியாகெ பெடொ; அசரியா மெராயோதுகெ பெடொ.

⁴ மொராயோத் சேராகியாகெ பெடொ; சேராகியா ஊசிகெ பெடொ; ஊசி புக்கிகெ பெடொ.

⁵ புக்கி அபிசுவாகெ பெடொ; அபிசுவா பினெகாசுகெ பெடொ; பினெகாசு எலெயாசார்கெ பெடொ; எலெயாசார், ப்ரதான ப⁴ட்டர் ஆரோன்கெ பெடொ.

⁶ எல்லெ எஸ்ரா இஸ்ரயேல்கெ தேவ் பகவான் மோசேக் தீ³ ஹொதெ நியாய ப்ரமாணுக் செவ்தி ஸமர்து பொந்தெ வேது வித்வான்கன் ஹொதெஸ். தேவ் பகவான்கெ ஆஸீர்வாத் தெகொ ஹொதெஹால் எஸ்ரா மகெஸ்தெ பூரா மஹா ரஜொ தியெஸ்.

⁷ மஹா ரஜொ அர்தசஷ்டா ராஜ்ஜலெ ஸத்வ ஒர்ஸும் எஸ்ரா பாபிலோனும்ரீ: எருசலேமுக் ஜியெஸ். தெகொ ஸெந்தொ தெவ்ட இஸ்ரயேல்னு, ப⁴ட்டர்னு, லேவியர்னு, கீத் கவஸ்தெனு, த⁴வ்ரா தா³ர்ர:கான், காம்கெரான் அஸ்கின் ஜியாஸ்.

⁸ அர்தசஷ்டா ராஜ்ஜலெ ஸத்வ ஒர்ஸும் எஸ்ரா எருசலேமுக் அவெஸ்.

⁹ பகவான்கெ தயவு எஸ்ராக் அப்பெஹால் முல்லா ம:டொ முல்லா தின்னு பாபிலோன்ரீ: நிகிளெ எஸ்ரா பஞ்ச்வ ம:டொ முல்லா தின்னு எருசலேமுக் ஜீ செரெஸ்.

¹⁰ பகவான்கெ ப்ரமாணுக் செவ்தி ஸீ, த்யெதானுக் ஜிவஸ்தெமாம்கின், இஸ்ரயேல்னுக் தெல்லெ ஆக்³ஞானுக்கின், நியதினுக் ஸிக்கடி தேஸ்தெமாம் எஸ்ரா நிகொகன் ஹொதெஸ்.

மஹா ரஜொ அர்தசஷ்டா லிக்கெ லேகு

¹¹ பகவான்கெ ஆக்³ஞானுக்கின் ப்ரமாணுக் ஸிக்கிலி பூரண ஞான் பொந்தெ எஸ்ராக் மஹா ரஜொ அர்தசஷ்டா லிக்கெ லேகுகெ ப்ரதி எல்லேஸ்.

¹² பரலோகு தேவுகெ நியாய ப்ரமாணுக் போதன கெரஸ்தெமாம் ஸமர்து ஹொயெ ப⁴ட்டர் எஸ்ராக் மஹா ரஜொ அர்தசஷ்டா நமஸ்கார் ஸங்கி லிக்கரிய லேகு.

¹³ “மொர் ராஜ்யமும் ஸேஸ்தெ இஸ்ரயேல்னுகின், ப⁴ட்டர்னுகின், லேவியர்னு அபுல் ஸொந்தொ தேஸுக் ஜனொ மெனி ஹவ்டெதி, தெனு தும்ரெ ஸெந்தொ எருசலேமுக் ஜாஸ்தக் மீ அநுமதி தேரியொ.

¹⁴ மீகின் மொர் மந்திரின் ஸாத் ஜெனு தொகொ எருசலேமுக் தட்டராஸ். தூ துரெ தேவுகெ ப்ரமாண்தானுக் ஜிவரியஸோன் யூதா தேஸும்கின் எருசலேமும் ஸேஸ்தெனு மெளி ஜிவராஸ்கி மெனி களைளஸ்தக் அமி தொகொ தட்டராஸ்.

¹⁵ எருசலேமும் இஸ்ரயேல்கெ தேவுக் தட்சணகன் அமி மொன்னுஜந்த தியெ ஸொந்நாக்கின் ருப்பாக் துமி கள்ளி ஜவாய்.

¹⁶ தீநா:ஸ்தக் பாபிலோனும் தும்கொ அப்பரிய ஸொந்நாக்கின், ருப்பாக்கின், அங்குன் எருசலேம் த⁴வ்ராக் இஸ்ரயேல்னு மொன்னுஜந்த தட்சணகன் தியெ ஸமான்னுக் துமி கள்ளி ஜாஸ்தக் அமி தும்கொ அநுமதி தேராஸ்.

¹⁷ எல்லெ ஹன்னவுக் தொவ்லி துமி கொ³ருனுக்கின், ஸெளி பெண்டுனுக்கின், தான்யமுனுக்கின், திராட்செ ரெஸ்ஸுனுக் க²டுவொ. பல்சொ எருசலேமும் தும்ரெ தேவுகெ த⁴வ்ரா பலி பீடமும் பலி தீ³பாய்ம் பொடுவொ.

¹⁸ உராவ் ஸேஸ்தெ ருப்பாக்கின், ஸொந்நாக் ஹெடி, தேவுகெ சித்தம்தானுக் தும்கொ ஒப்பயெ விதமும் உபயோக் கெல்லுவொ.

¹⁹ தும்ரெ தேவுகெ த⁴வ்ராக் உபயோகுகன் ரா:ஸ்தக் தும்ரெஜோள் தெனி பொடெ எனமுனுக் எருசலேமும் தும்ரெ தேவுகெ ஸந்நிதிம் தொவொ.

²⁰ அங்குன் துமி த⁴வ்ராக் காய்தி வேஸ் கெர்னொ மெனெதி ரஜாங்கு பொக்கிஷமும்ரீ: கள்ளுவாய்.

²¹ மஹா ரஜொ அர்தசஷ்டா ஆக்³ஞொ தகி, ஐபிராத் நெத்திக் வெதுர் தீருர் ஸேஸ்தெ பொக்கிஷதாருக் மீ ஸங்கரிய காயொமெனெதி: பரலோகு தேவுகெ ப்ரமாணுக் போதன கெரஸ்தெமாம் பூரண ஞான் பொந்தெ ப⁴ட்டர் எஸ்ரா தும்ரெஜோள் மகஸ்த அஸ்கி ஸெணம் தெவொ.

²² தெகொ பஜெ ஹொயெ 100 தாலந்து ருப்பொ, 100 கோர் கோ⁴முதந்து, 100 பா³த் திராட்செ ரெஸ்ஸு, 100 பா³த் தேல், பஜெ ஹொயெ மீட் இத்யாதினுக் தீ³ தட்டெ.

²³ எல்லெ தேஸுக் ராஜ்ஜலரிய மொர் ஜோள்கின், மென்க்யான்ஜோள் பரலோகு தேவ் ராக்³ பொட்னாஸ்ததானுக், த⁴வ்ராக் பஜெ ஸேஸ்தெ துமி தீ³ஹொனொ.

²⁴ அங்குன் மீ தும்கொ ஸங்கரியொ: தேட் ஸேஸ்தெ ப⁴ட்டர்னு, லேவியர்னு, கீத் கவஸ்தெனு, த⁴வ்ரா தா³ர்ர:கான், த⁴வ்ரா காம்கெரான், தேவுகெ த⁴வ்ரா ஸம்பந்தம்கன் காம் கெரரிய துஸ்ர கொங்கினாஜோள் துமி ஸுல்கம், கிஸ்தி இத்யாதினுக் வசூல் கெரஹோனா.

²⁵ ப்ரேவ் பொரெ எஸ்ரா! தேவ் தொகொ தீரிய ஞான்தானுக் ஐபிராத் நெத்திக் வெதுர் கெட்டர் ஜிவரிய அஸ்கினாக் நீதிகன் நியாவ் ஸார்வொ கெரஸ்தக் தும்ரெ தேவுகெ ப்ரமாணுக் சொக்கட் களைளிய நீதிபதினுக்கின், ராஜ்யபதினுக் ந்யமுன் கெர்லெ. தேவுகெ ப்ரமாண் களானாஸ்தெங்கொ ஸிக்கடி தே.

²⁶ தேவுகெ ப்ரமாணுக்கின், ரஜாகெ ஆக்³ஞாக் அண்குனாஸ்தெங்கொ ஸெர்ககன் தண்டன தெவாய். தெப்பொ மெளி அண்குனா ஜியெதி மொரனு தண்டன தெவாய். பராட் தேஸுக் மெளி ப⁴ந்தைதுகன் தட்டுவாய். தெங்கொ ஆஸ்தினுக் அபகரிஞ்சுலுவாய். காராம் மெளி தொவாய்” மெனி லிக்கி தட்டியெஸ்.

எஸ்ரா தேவுக் ஸ்துதி கெரரெஸ்

²⁷ எருசலேமும் ஸேஸ்தெ பகவான்கெ த⁴வ்ராக் ஸிங்கார் கெரஸ்தக் மஹா ரஜாகெ மொன்னுக் சல்த கெரெ அம்ரெ ஒள்ட்யானுகெ தேவ் பகவானுக் ஸ்தோத்ரு.

²⁸ தேவுகெ தயவு மொர் ஸெங்கொ ஹொதெஹால் மஹா ரஜொ, மந்திரின், அதிகாரின்கெ தயவு மொகொ அப்பெஸ். தேஹாலிம் மீ தைர்யம்கன் இஸ்ரயேல்கெ கொ³ம்டான் தெவ்டதெங்காக் மொர் ஸெந்தொ ஏட் பெல்லி அவெஸ்.