அப்போஸ்தலர் 9 - Saurashtra Bible (BSI)

சவுல்கெ மொன்னு ஸிங்கனி

¹ எருசலேமும் சவுல் மெனஸ்தெனொ பகவான்கெ சிஷ்யானுக் மொரடஸ்தக் ஆலோசன கெரெஸ்.

² தெனொ மஹா ப்ரதான ப⁴ட்டருக் தெக்கி, “ஏசுக் பாய்ம் பொடரிய அய்யானுக்கின், அம்மானுக் கைது கெரி எருசலேமுக் பெல்லி அவஸ்தக், தமஸ்கு பட்ணமுகெ ப்ரார்தன த⁴வ்ரானுகெ யூத அதிகாரினுக் அதிகார் தெவொ மெனி லேக் லிக்கி கள்ளி,

³ சவுல் தமஸ்கு பட்ணமுக் லெகுத்த ஜிலேத் ர:த, ரி:யெவந்நு அகாஸும்ரீ: ஒண்டெ ம:ட்டொ ஹுஜாள் தெகொ சுட்டுர் ப்ரகாஸிஞ்சஸ்தக்கின் தெனொ கா²ல் பொடெஸ்.

⁴ தெப்பொ, “சவுலு, சவுலு, தூ ககொ மொகொ ஹிம்ஸொ கெரரியொ’’ மெனி அபுல்ஜோள் வத்தொ கெரரிய ஒண்டெ ஸெத்து³க் அய்கெஸ்.

⁵ தெல்லெகொ சவுல், “பகவானு, துமி கோனு?’’ மெனி புஸெஸ். தெல்லெகொ பகவான், “தூ ஹிம்ஸொ கெரரிய ஏசு மீஸ்.

⁶ தூ அத்தொ ஹுடி, பட்ணமுக் ஜா. தூ கெர்னொ ஸேஸ்தெ தேட் தொகொ ஸங்கன்’’ மெனி மென்யாஸ்.

⁷ சவுல் ஸெங்கொ அவ்யாஸ்தெனு தெல்லெ ஸெத்து³க் அய்க்யாஸ். ஹொயெதி தேட் கொன்னின் நீ:ஸ்த தெக்கி, ப்ரம்ம லகி ஹிப்பி ஹொத்யாஸ்.

⁸ க²ல்லெ பொடெ சவுல் ஹுடி ஹிப்பெஸ். தெனொ தொளொ ஹுடி ஸியெவேளு தெகொ கொன்னி தெக்கெயெனி. ஸெங்கொ அவ்யாஸ்தெனு தெகொ ஹாத் தெரி தமஸ்குக் பெல்லி ஜியாஸ்.

⁹ தேட் தெனொ தீ²ன் தின்னு தொளா ஸநி நீ:ஸ்தக் ஹொதெஸ். தெல்லெ தின்னுநும் தெனொ கொன்னி கயெனி; பியெனி.

¹⁰ தமஸ்கு பட்ணமும் அனனியா மெனி நாவ் ஸேஸ்தெ ஒண்டெ சிஷ்யொ ஹொதெஸ். பகவான் தெகொ காக்ஷி தீ³, “அனனியா’’ மெனி பொவஸ்தக்கின், “பகவானு, ஸங்குவொ’’ மெனி ஸங்கெஸ்.

¹¹ தெப்பொ பகவான் தெகொஜோள், “தூ ஹுடி நேர் வீதுக் ஜா; யூதாகெ கே⁴ருக் தர்ஸு பட்ணமுரீ: சவுல் மெனி நாவ் ஸேஸ்தெ ஒண்டெ மெனிக் அவ்ரெஸ். தெனொ அத்தொ தேட் ப்ரார்தன கெர்லேத் ஸே.

¹² அனனியா மெனி நாவ் ஸேஸ்தெ ஒண்டெதெனொ அவி அபுல் ஹொல்லெ ஹாத் தொவஸ்தக்கின், பீர் தொளா ஸநி அப்பெஸோன் தெனொ தர்ஸன தெக்கெஸ்’’ மெனி ஸங்க்யாஸ்.

¹³ தெல்லெகொ அனனியா, “பகவானு, தெல்லெ மெனிக் எருசலேமும் தும்கொ விஸ்வாஸ் கெரரிய அஸ்கினாக் ஜுகு ஹிம்ஸொ கெரெஸ் மெனி தெகொ தெ⁴ரி ஜுகுதெனு ஸங்கெஸ்தெ மீ அய்கினி பொட்ரெஸ்.

¹⁴ தும்கொ பாய்ம் பொடரிய அஸ்கினாக் காராம் தொப்பஸ்தக், தெனொ ப்ரதான ப⁴ட்டர்னுஜோள் அதிகார் கள்ளி ஏட் மெளி அவ்ரியொ’’ மெனி மெனெஸ்.

¹⁵ தெல்லெகொ பகவான், “தூ ஜா, காமெனெதி யூத குலமும் உஜுனாஸ்த மென்க்யானுக்கின், ரஜானுக்கின், இஸ்ரயேல்னுக் மீ கோன் மெனி களடஸ்தக் மீ தெகொ களைள்ரியொ.

¹⁶ தெனொ மொகொலெந்தால் கித்க ஹிம்ஸொ பொந்துனொ மெனஸ்த மீ தெகொ களடு’’ மெனி ஸங்க்யாஸ்.

¹⁷ தெப்பொ அனனியா நிகிளி தெல்லெ கே⁴ருக் ஜியெஸ்; தெனொ சவுல் ஹொல்லெ ஹாத் தொவி, “ப்ரேவ் பொரெ பை⁴ சவுலு, தூ அவெ வாடும் தொகொ காக்ஷி தியெ பகவான் ஏசு, தொகொ தொளொ ஸநி அப்பஸ்ததானுக்கின், பரிஸுத்த ஆவிகெ ஸக்திக் தூ கள்ளஸ்ததானுக் தெனு மொகொ தட்டியாஸ்’’ மெனி ஸங்கெஸ்.

¹⁸ தென்னவேங்கு சவுல்கெ தொளாம்ரீ: ம:ளி பொக்குஸோன் ஒண்டெ கா²ல் பொடெஸ். தெகொ தொளா ஸநி அப்பெஸ். தெனொ ஹுடி ஞானஸ்நான் கள்ளியெஸ்.

¹⁹ பல்சொ தெனொ க²வ்ணம் கயி பலம் பொந்தெஸ். சவுல் தமஸ்கு பட்ணமும் சிஷ்யான் ஸெங்கொ தெவ்ட தின்னு ஹொதெஸ்.

சவுல்கெ ப்ரஸங்கம்

²⁰ பல்சொ சவுல், ஏசுஸ் தேவுகெ பெடொ மெனி ப்ரார்தன த⁴வ்ரானும் ஜீ ஸங்கெஸ்.

²¹ அய்க்யாஸ்தெனு அஸ்கின் ஆச்சர்யம் பொடி, “எருசலேமும் ஏசுக் பாய்ம் பொடஸ்தெங்கொ நாஸ் கெரஸ்தெனொ எனோஸ்னா? தெங்கொ அஸ்கினாக் கைது கெரி, ப்ரதான ப⁴ட்டர்னுஜோள் உட்சி பெல்லி ஜனொ மெனி ஒண்டே லக்ஷ்யம்கன் ஏட் அவெஸ்தெனோஸ்னா எனொ’’ மெனி மெல்லியாஸ்.

²² சவுல்கீ அங்குன் தைர்யம்கன், ‘ஏசுஸ் மேசியா’ மெனஸ்த ரூபல கெரி வத்தொ கெரெஹால் தமஸ்கும் ஜிவெ யூதர்னு தெகொ ஜவாப் ஸங்கன் முஸெனி.

²³ இஸனி ஜுகு தின்னு ஜியெ பல்சொ, யூதர்னு தெகொ மொரட்னொ மெனி தீர்மான் கெர்யாஸ்.

²⁴ தெங்கொ தீர்மான் சவுலுக் களையெஸ். தெகொ மொரட்னொ மெனி ராத் தீ³ஸ் பட்ணமு துர்னிம் ர:கிலேத் ஹொத்யாஸ்.

²⁵ ஒண்டெதி ராத், சிஷ்யான் பவுலுக் பெல்லி ஜீ, ஒண்டெ படிம் பிஸடி, பட்ணமு ரவுளு வாட்கன் ஹுத்ரடி ஸொட்யாஸ்.

எருசலேமும் சவுல்

²⁶ சவுல் எருசலேமுக் ஜியெ பல்சொ சிஷ்யான் ஸெங்கொ ர:னொ மெனி ஹவ்டெஸ். ஹொயெதி தெனொ மெளி பகவான்கெ சிஷ்யொ மெனஸ்த நொம்முனாஸ்தஹால், அஸ்கின் தெகொ ஸீ தக்யாஸ்.

²⁷ தெப்பொ பர்னபா மெனஸ்தெனொ சவுலுக் அப்போஸ்தலர்னுஜோள் பெல்லி ஜியெஸ். சவுல் தமஸ்கு பட்ணமுக் ஜிலேத் ர:த, பகவானுக் தெக்கெ விவர்கின், பகவான் தெகொஜோள் வத்தொ கெரெ விவர்கின், பல்சொ தமஸ்கு பட்ணமும் ஏசுகெ நாவுக் தைர்யம்கன் ஸங்கி, சவுல் ப்ரஸங்கம் கெரெஸ் மெனி பர்னபா தெங்கொஜோள் ஸங்கெஸ்.

²⁸ தெக பல்சொ சவுல் மெளி தெங்கொ ஸெந்தொ செரி எருசலேமும் பகவான் ஏசுகெ நாவுக் தைர்யம்கன் ஸங்கி ப்ரஸங்கம் கெரெஸ்.

²⁹ கிரேக்க பாஷா வத்தொ கெரரிய யூதர்னு ஜோள் தர்க்கம் கெரெஸ். தெனுகீ தெகொ மொரட்னொ மெனி வாட் வெக்யாஸ்.

³⁰ சவுல் ஸெங்கொ ஹொதெ விஸ்வாஸின் தெல்லெ களைளி, தெகொ செசரியாக் பெல்லி ஜீ, தேட்ரீ: தர்ஸு பட்ணமுக் தட்டிட்யாஸ்.

³¹ தெப்பொ யூதேயா, கலிலேயா, சமாரியாம் ஸேஸ்தெ தேவு ஸபான் ப்ரசன நீ:ஸ்தக் ஹொடெஸ். அஸ்கின் தேவுக் தக்கி பயபக்திகன் ஜிவெஹால்கின், பரிஸுத்த ஆவிகெ பலம்ஹால் தேவுகெ ஸபான் விருத்தி ஹொயெஸ்.

லித்தா, யோப்பா பட்ணமுனும் பேதுரு

³² பேதுரு ஜுகு கா³முனுகெ தேவு ஸபானுக் ஜீ ஸீதி அவஸ்தவேளு, ஒண்டெதி லித்தா கா³மும் ஜிவரிய பகவான்கெ ஜெனுல்னுக் ஜீ தெக்கெஸ்.

³³ தேட் ஆட் ஒர்ஸுகன் ஹாத் பாய்ஞ் அவ்னாஸ்தக் பொடி ஹொதெ ஐநேயா மெனி நாவ் ஸேஸ்தெ ஒண்டெ மெனிகுக் தெக்கெஸ்.

³⁴ பேதுரு தெகொஜோள், “ஐநேயா, ஏசு கிறிஸ்து தொகொ பரொ கெரராஸ், தூ ஹுடி துரெ சபாக் தூஸ் மஞ்சி தோவ்’’ மெனி ஸங்கெஸ். தென்னவேங்கு தெனொ ஹுடி ஹிப்பெஸ்.

³⁵ பரொ ஹொயெ ஐநேயாக் தெக்கி, லித்தா, சாரோன் கா³மு மென்க்யான் பகவானுக் விஸ்வாஸ் கெர்யாஸ்.

³⁶ யோப்பா பட்ணமும் தபீத்தாள் மெனி நாவ் ஸேஸ்தெ ஒண்டெ சீஷி ஹொதிஸ். கிரேக்கு பாஷாம் தெகொ நாவ் தொர்காள். தெல்லெகொ ‘ஹரின்’ மெனி அர்து. தெனொ ஜுகு சொக்கட் கார்யமுன்கின், தெருமுன் வேன் கெர்லேத் ஹொதிஸ்.

³⁷ ஒண்டெதி தெனொ ரோக் அவி மொஜ்ஜிஸ். தெகொ ஆங்கு து⁴வடி உஞ்சொ வித்தெ³ர் தொவி ஹொத்யாஸ்.

³⁸ லித்தா கா³ம் யோப்பா பட்ணமுக் லெகுத்த ஸேஸ்தெஹால், தேட் பேதுரு ஸே மெனி சிஷ்யான் அய்கினி பொடி, தயவு கெரி ஸெணம் ஏட் அவொ மெனி ஸங்கி தீ³தெங்கா தட்டியாஸ்.

³⁹ பேதுரு தெங்கொ ஸெந்தொ ஜியெஸ். பேதுருக் உஞ்சொ வித்தெ³ர் பெல்லி ஜியாஸ். தேட் அவெ விதவென் தொர்காள் ஜீவ் ஸெந்தொ ர:த, அபுல்நுக் ஸிவி தியெ அங்க்³ரானுக்கின், வஸ்தர்னுக் தெக்கடி ரொட்யாஸ்.

⁴⁰ பேதுரு அஸ்கினா பராட் ஜா மெனி ஸங்கிதி கு³ட்க்யால் தகி ப்ரார்தன கெரெஸ். பல்சொ மொடாக் ஸீ, “தபீத்தாள், ஹூட்’’ மெனி ஸங்கெஸ். தெப்பொ தெனொ தொளொ ஹுடி ஸீஸ். பேதுருக் ஸீ ஹுடி பி³ஸிஸ்.

⁴¹ பேதுரு தெகொ ஹாத் தீ³ ஹுடி ஹிப்படெஸ். பகவானுக் விஸ்வாஸ் கெரெ சிஷ்யானுக்கின் விதவெனுக் பொவி, தெங்கொஜோள் தெகொ ஜீவ் ஸெந்தொ ஒப்பிஞ்சி தியெஸ்.

⁴² எல்லெ ஸமசார் யோப்பா பட்ணம் பூரா களையெஸ். தெப்பொ பகவானுக் ஜுகுதெனு விஸ்வாஸ் கெர்யாஸ்.

⁴³ பேதுரு யோப்பா பட்ணமும் கெஷண் பதம் கெரரிய சீமோன் கொ⁴ம்மொ ஜுகு தின்னு வஸி ஹொதெஸ்.