அப்போஸ்தலர் 2 - Saurashtra Bible (BSI)

பரிஸுத்த ஆவிகெ ஸக்தி

¹ பெந்தெகொஸ்தெ மெனரிய ஸெந்நு அவெவேளு, ஏசுகெ சிஷ்யான் அஸ்கின் ஒண்டெ தேட் மிளி ஹொத்யாஸ். (லேவி 23:15-21; உபா 16:9-11)

² தெப்பொ ம:ட்ட ஸுளி வரொ ஹனரியஸோன் அகாஸும்ரீ: ஒண்டெ ஸெத்து³ தெனு பி³ஸி ஹொதெ கொ⁴ம்மொ அஸ்கினாக் அய்கயெஸ்.

³ தீநா:ஸ்தக் அக்னிகன் தெக்காரிய பா²ட் ஹொயெ ஜீபுன் அஸ்கினா ஹொல்லெ அவி பிஸெஸ்தெ தெனு ஸியாஸ்.

⁴ தெனு அஸ்கின் பரிஸுத்த அவிகெ ஸக்திஹால் பொ⁴வ்ரயி, பரிஸுத்த ஆவி அபுல்நுக் தியெ வரமுக் தகெதானுக் வெகுள வெகுள பாஷாம் வத்தொ கெரன் நிகிள்யாஸ்.

⁵ தேட் புலோகுர் அஸ்கி தேஸும்ரீ: அவி ஹொதெ தேவு பக்தி வேன் ஸேஸ்தெ யூதர்னு எருசலேமும் வஸி ஹொத்யாஸ்.

⁶ தெனு தெல்லெ ஸெத்து³க் அய்கிதி தமி அவி ஸீதி, ஏசுகெ சிஷ்யான் அம்ரெ மாய் பாஷாம் வத்தொ கெரராஸ்னா மெனி ஆச்சர்யம் பொட்யாஸ்.

⁷ தெனு அஸ்கின் ஜுகு ஆச்சர்யம்கன் ஓகோகுன் ஸீ, “இஸனி வத்த கெரரிய எனு அஸ்கின் கலிலேயர்னு நா:கீ?

⁸ திஸொ ர:த, அம்ரெ மாய் பாஷாம் தெனு கோனக் வத்தொ கெரராஸ் மெனி ஜுகு ஆச்சர்யம் பொட்யாஸ்.

⁹ பார்த்தர், மேதர், ஏலாமீத்தர், மெசப்போத்தாமியா, யூதேயா, கப்பத்தோக்கியா, பொந்து, ஆசியா, பிரிகியா கா³மு மென்க்யான்கின்,

¹⁰ பம்பிலியா, எகிப்து, சீரேனெ பட்ணம் லெகுத்த ஜிவரிய லீபியா கா³மு மென்க்யான்கின்,

¹¹ ரோம தேஸும்ரீ: அவெ ரோமானியர்னு, யூதர்னு, யூத மார்குக் ஒப்பிலியெ அந்யத்ரான், கிரேத்தர், அரேபியர்னு ஏட் ஜிவராஸ். ஹொயெதி எனு அஸ்கின் தேவுகெ அதிசய க்ரியானுக் அம்ரெ பாஷானும் ஸங்கராஸ்த கோனகு?’’ மெனி மென்யாஸ்.

¹² அஸ்கின் பெதிரி பொடி, “எககுர்சி அமி காய் ஸங்கஸ்த" மெனி அஸ்கின் வத்தொ கெல்லியாஸ்.

¹³ தெவ்டதெனு, “எனு போத பனி வேன் பீதி ரா:ன்" மெனி கேலி கெர்யாஸ்.

பேதுருகெ ப்ரஸங்கம்

¹⁴ தெப்பொ, பேதுரு, துஸ்ர விக்³யாரு அப்போஸ்தலர்னு ஸெந்தொ ஹுடி ஹிப்பி, தேட் ஹொதெ மென்க்யானுக் ஸீ, கெட்டி ஸெத்து³கன், “யூதர்னு, எருசலேம் மென்க்யானு, அஸ்கின் எல்லெ களைளுவொ; மொர் வத்தாக் அய்குவொ.

¹⁵ துமி ஹவ்டரியஸோன் எனு போத பனி பீதி பெதராஸ்த நா: அத்தொ ஸொளபார் நொவ் கெண்டோஸ் ஹொய்ரியொ.

¹⁶ தீர்கதரிஸி யோயேல் ஸங்கெதானுக் எல்லெ ஸம்பவம் சலரியொ.

¹⁷ தெல்லெ காயொமெனெதி: ‘ஸெத்ல தின்னுநும், மீ அஸ்கி மென்க்யான் ஹொல்லெ மொர் ஆவிக் லுச்சு. தெப்பொ தும்ரெ பெடான்கின் பெடின் தீர்கதரிஸனம் ஸங்கன். தும்ரெ ஜவ்ணான் தர்ஸன தெக்கன். தும்ரெ ம:ட்டான்னு ஸொப்னொ தெக்கன்.

¹⁸ மொகொ ஸேவொ கெரரிய அய்யான், அம்மான் அஸ்கினா ஹொல்லெ தெல்லெ தின்னுநும் மொர் ஆவிக் லுச்சு. தெப்பொ தெனு தீர்கதரிஸனம் ஸங்கன்.

¹⁹ தீ நா:ஸ்தக், அகாஸும் அற்புதுன்கின், பு⁴ஞிர் அதிசயமுன் கெரி தெக்கடு. புலோகுர் ரெகத்கின், அக்னிகின், தெ³ட்டுகன் தூ⁴ம் தெக்காய்.

²⁰ பகவான்கெ ப்ரகாஸ் ஹொயெ விஸேஷ தின்னு அவஸ்தக் முல்லொ ஸுரித் ஹந்தார் பொடய். சாந்து ரெகத்ஸோன் மர்சாய். (யோயேல் 2:28-32)

²¹ தெப்பொ, பகவான்கெ நாவுக் நமஸ் கெரஸ்தெனு ரக்ஷண் பொந்தன்’ மெனி ஸங்கிரெஸ்.

²² “இஸ்ரயேல்னு, அய்குவொ. நாசரேத் கா³ம் ஏசுகெ மஹத்வமுக் தும்கொ களடஸ்தக் ஏசுகெ நாவும் ம:ட்ட ம:ட்ட க்ரியான், அற்புதுன் அங்கிதமுன் ஜுகுயெ தேவ் கெர்யாஸ்.

²³ ஹொயெதி தேவுகெ தீர்மான்தானுக்கின், அநந்த ஞான்கெ யோசனான்தானுக் எல்லெ ஏசுக் தும்ரெஜோள் ஒப்பிஞ்சி தியாஸ். தேவுகெ ஆக்³ஞானுக் விரோத்கன் ஜிவெ துஷ்டுடுன் வாட்கன் துமி தெங்கொ ஸிலுவாம் ஹனி மொரட்யாஸ்.

²⁴ ஹொயெதி தேவ், ஏசுக் மொரனும்ரீ: ஸொடுவி கெரி ஜீவ் ஸெந்தொ ஹுடட்யாஸ். மொரன் ஏசுக் ஜெகிஞ்சன் முஸெனி.

²⁵ ஏசுகுர்சி தாவீது ரஜொ, “பகவான் கொப்பிம் மொர் தொளா வெதுர் ஸே. தெனு மொர் ஜெய்னா ஹாத் பொங்குட் ஸேஸ்தெஹால் மீ பத்ரம்கன் ஸே.

²⁶ தேஹாலிம் மொர் மொன்னு ஜுகு ஸொந்தோஷ்கன் ஸே. மொர் ஜீப் தேவுக் ஸ்துதி கெரரெஸ். மொர் ஸரீருக் ஜீவ் ஜியெத் மெளி நொம்கெகன் ரா:ய்.

²⁷ காமெனெதி மொர் ஆன்மாக் துமி பதாளும் தொப்புனான். மீ பரிஸுத்துடு; மீ நாஸ் ஹோஸ்தக் துமி அநுமதி தேனான்.

²⁸ நிஜ்ஜம் ஜிவ்னமுகெ வாடுக் துமி மொகொ களட்யாஸ். தும்ரெ ப்ரஸன்னமும் ஸேஸ்தெ மொகொ துமி பரிபூர்ண ஸொந்தோஷ் தியாஸ்’’ மெனி ஸங்கெஸ். (ஸங் 16:8-11)

²⁹ “பை⁴ பெ⁴ய்னானு, அம்ரெ கோத்ரு பா³ப் தாவீதுகுர்சி மீ தும்ரெஜோள் தைர்யம்கன் வத்தொ கெரன் முஸய். தெனொ மொரெஸ்; பல்சொ க³ட்னி பொடெஸ். தெகொ க³டஸ்தலம் எல்லெ தின்னு லெந்து ஏட் ஸே.

³⁰ தாவீது ரஜொ ஒண்டெ தீர்கதரிஸி. தெனொ அபுல் ஸந்ததிம் உஜரிய ஒண்டெதெகாக் ரஜொகன் ந்யமுன் கெரன் மெனி தேவ் ஸங்கெ வாக்கு தெகொ களாய். (2 சாமு 7:13; ஸங் 132:11)

³¹ தேஹாலிம் தெனொ, ‘மேசியாகெ ஆன்மா பதாளும் ஜான் ஸொட்னான். தெங்கொ ஸரீர் நாஸ் ஹோனா’ மெனி ஸங்கெஸ். தெனொ ஸங்கெ வத்தாகெ அர்து ‘மேசியா ஜீவ் ஸெந்தொ ஹுடன் மெனஸ்தேஸ்.’ (ஸங் 16:10-11)

³² தெல்லெ தீர்கதரிஸன வத்தாதானுக் எல்லெ ஏசுக், தேவ் ஜீவ் ஸெந்தொ ஹுடட்யாஸ். எல்லெகொ அமி அஸ்கின் ஸாக்ஷிகன் ஸே.

³³ பரலோகுக் கள்ளினி பொடெ ஏசு அத்தொ தேவுகெ ஜெய்னா ஹாத் பொங்குட் பிஸிரியாஸ். தேவ் அபுல் வாக்குதானுக் ஏசுக் தியெ பரிஸுத்த ஆவிகெ ஸக்திக் அம்கொ மெளி தீரியாஸ். அத்தொ துமி தெக்கராஸ்தகின், அய்கராஸ்தெ தெல்லெ ஸக்திகெ க்ரியானூஸ்.

³⁴ தாவீது பரலோகுக் கள்ளினி பொடெனினா. அங்குன், தாவீது,

³⁵ ‘பகவான், (தேவ்) மொர் மஹா ப்ரபுஜோள், ‘மீ தும்ரெ விரோதினுக் தும்ரெ பாய்ஞ் கா²ல் பிஸடஸ்த லெங்கு துமி மொர் ஜெய்னா ஹாத் பொங்குட் பிஸுவொ’ மெனி ஸங்கிரியொ. (ஸங் 110:1)

³⁶ “துமி ஸிலுவாம் ஹனெ எல்லெ ஏசுக், தேவ், பகவான்கன், மேசியாகன் ந்யமுன் கெர்யாஸ் மெனஸ்த இஸ்ரயேல்னு அஸ்கின் தீ⁴ர்குகன் களைளந்தக்’’ மெனி ஸங்கெஸ்.

³⁷ எல்லெ வத்தானுக் அய்கெ மென்க்யானுகெ மொன்னு குஸ்கயி, பேதுருக்கின் துஸ்ர அப்போஸ்தலர்னுக் ஸீ, “பை⁴னு, அத்தொ அமி காய் கெர்னொ’’ மெனி புஸ்யாஸ்.

³⁸ தெல்லெகொ பேதுரு, “தும்ரெ பாபுன் க்ஷமொ கெர்னி பொட்னொ மெனெதி துமி பாப் கெரஸ்த ஸொட்டி தேவ்ஜோள் அவொ. துமி அஸ்கின் ஏசு கிறிஸ்துகெ நாவ்ஹால் ஞானஸ்நான் கள்ளுவொ. பரிஸுத்த ஆவிகெ வரமுக் துமி கள்ளன்.

³⁹ காமெனெதி தேவுகெ வாக்கு தும்கொகின், தும்ரெ நு:ருனுக்கின், துதூர் ஸேஸ்தெ அஸ்கினாக் பாத்யம். அங்குன் அம்ரெ தேவ் பகவானுக் பாய்ம் பொடரிய அஸ்கினாக் பாத்யம்’’ மெனி ஸங்கெஸ். (ரோமர் 9:4)

⁴⁰ இஸனி ஜுகு விவர்னுக் ஸங்கிதி, “துஷ்டுடுகன் ஜிவரிய எல்லெ ஸந்ததிக் அப்பரிய தண்டன தும்கொ மெளி அப்புனாஸ்தானுக் துமி தும்கொ கபட்ளுவொ’’ மெனி புத்தி ஸங்கெஸ். (உபா 32:5; ஸங் 78:8)

⁴¹ தெனொ ஸங்கெ வத்தானுக் ஸொந்தோஷ்கன் ஒப்பிலியாஸ்தெனு ஞானஸ்நான் கள்ளியாஸ். இஸனி தெந்துஸ்தி ரமாரமி 3,000 (தீ²ன் ஸஸர்) ஜெனு விஸ்வாஸின் ஹொயாஸ்.

⁴² தெனு அஸ்கின் அப்போஸ்தலர்னுகெ போதனாம், ஐக்யமும், அப்பம் கு²டஸ்தெமாம், ப்ரார்தன கெரஸ்தெமாம் தீ⁴ர்குகன் நிள்சி ஹொத்யாஸ். (லூக் 22:14-20)

விஸ்வாஸின்கெ ஜிவ்னம்

⁴³ அப்போஸ்தலர்னு ஜுகு அற்புதுன்கின், அதிசயமுன் கெர்யாஸ். தெங்கொ ஸீ துஸ்ர அஸ்கின் பயபக்திகன் ஜிவ்யாஸ்.

⁴⁴ ஏசுக் பாய்ம் பொடஸ்தெனு அஸ்கின் ஒண்டேஸ்கன் ஜிவ்யாஸ். தெனு அஸ்கி ஸமான்னுக் ஸமஸ்துகன் வடொ கெல்லியாஸ்.

⁴⁵ அபுல் பெய்ரு தாமுனுக்கின், ஆஸ்தினுக் விக்கி, கொங்கக் கித்க பஜெகீ த்யெதானுக் கள்ளியாஸ்.

⁴⁶ அஸ்கின் த⁴வ்ராக் அவி ஒண்டே மொன்னுகன் தேவுக் பாய்ம் பொட்யாஸ். ஒண்டொண்டெ கொ⁴ம்மானும் ஐக்யம்கன் அப்பம் கயாஸ்; அஸ்கின் ஸொந்தோஷ்கன் கபட் நீ:ஸ்தக் ஜிவ்யாஸ்.

⁴⁷ அஸ்கின் தேவுக் ஸ்துதி கெர்யாஸ். மென்க்யான் ம:ஜார் தெங்கொ சொக்கட் நாவ் ஹொதெஸ். ரக்ஷண் பொந்தெ மென்க்யான் பகவான்கெ ஸபாம் செரி விஸ்வாஸின் ஹொயாஸ்.