2 கொரிந்தியர் 4 - Saurashtra Bible (BSI)

மத்தி பொ⁴ந்நாம் பொக்கிஷம்

¹ தேவுகெ தயவு அம்கொ அப்பிரியஹால் அமி தேவுக் ஸேவொ கெரன் முஸரெஸ். தேஹாலிம் அம்ரெ மொன்னு தில்ல ஸுட்டுனா.

² அஸ்கின் கேவலம்கன் ஹவ்டரிய ரகசிய க்ரியானுக் அமி த்³வேஷ் கெரி தொப்பிதியாஸ். அமி தந்துர்கன் கொங்கினாக் ஹொங்கடரானி. தேவுகெ வத்தாக் பிவ்ரி ஸங்குனான். ஸத்யமுக் ஜ²கி தொவ்னாஸ்தக் பா⁴டகன் ஸங்கராஸ். உத்தமுடுகன் ஜிவரிய அஸ்கினாக் அமி நொம்கெ ஹொயாஸ்தெனு. அம்ரெ ஜிவ்னமும் கொன்னி சூக் நீ:

³ அமி ஸங்கரிய சொக்கட் ஸமசாருக் அங்குன் மெளி தெவ்டதெனு இவர் கெல்லுனா ரி:யெதி, நாஸ் ஹோஸ்தெங்கோஸ் திஸனி இவர் பொட்னா ரா:ய்.

⁴ தேவுகெ ரூப்கன் ஸேஸ்தெ, கிறிஸ்துகெ மஹிமெ பொரெ சொக்கட் ஸமசாருகெ ஹுஜாளுக் அவிஸ்வாஸின் ஸான் முஸுனாஸ்ததானுக் எல்லெ புலோகுகெ தேவ் தெங்கொ தொளாக் ஜ²கி தொவ்ரியொ. (ஆதி 1:3)

⁵ அமி அம்ரெகுர்சி அஸ்கிதாம் ஸங்கராஸ்த நா: ஏசு கிறிஸ்தூஸ் பகவான் மெனி அமி அஸ்கி தாம் ஸங்கராஸ். தும்கொ ஸேவொ கெரஸ்தக் பகவான் அம்கொ தட்டிரியாஸ்.

⁶ காமெனெதி, “ஹந்தாரும் ஹுஜாள் ப்ரகாஸிஞ்சந்தக்’’ மெனி ஸங்கெ தேவூஸ் அம்ரெ மொன்னுக் மெளி ஹுஜாள் தீ³ ப்ரகாஸிஞ்சடராஸ். எல்லெ ஹுஜாள் கிறிஸ்துக் ப்ரகாஸ் கெரடெஸ். தெல்லே ஹுஜாள் தேவுகெ மஹிமெ பொரெ ஞானுக் அமி களைளஸ்தக் அம்கொ வாட் தெக்கடரியொ.

⁷ ரி:யெத் மெளி எல்லெ பொக்கிஷமுக் கள்ளிரிய அமி நிஸ்த மத்தி பொ⁴ந்நோஸ். எல்லெ மஹத்வ ஸக்தி அம்ரெஜோள்ரீ: அவ்ரியொ நா: தேவ்ஜோள்ரீ:ஸ் அவ்ரியொ மெனி எமாம்ரீ: சொக்கட் களைளன் முஸரியொ.

⁸ அமி அஸ்கி பொங்குட் ஹிம்ஸொ பொந்தி மெளி மொன்னு தில்ல ஸுட்டுனா ஸே. வேன் பாத பொந்தி மெளி மொன்னு முட்டுனா ஸே.

⁹ ஹிம்ஸொ பொந்தராஸ். தேவ் அம்கொ ஹாத் ஸொட்னான். கா²ல் தொப்பினி பொடராஸ். அமி நாஸ் ஹோனான்.

¹⁰ பகவான் ஏசு கிறிஸ்துகெ ஜிவ்னம் அம்ரெ ஜிவ்னமும் மெளி களாஸ்ததானுக் அமி ஜாரிய தாமுனும் அம்ரெ ஸரீரும் ஏசுகெ மொரனு பா³தானுக் அமி மெளி அநுபவிஞ்சராஸ்.

¹¹ காமெனெதி மொரனுக் பாத்யம் ஹொயெ அம்ரெ ஸரீரும் ஏசுகெ ஜிவ்னம் அஸ்கினாக் களாஸ்ததானுக் அமி ஏசு கிறிஸ்துகுர்சி மொரஸ்தக் மெளி கொப்பிம் தயார்கன் ஸே.

¹² அமி மொரெத் மெளி கிறிஸ்துகெ பலம் தும்கொ அஸ்கினாக் சல்த கெரய்.

¹³ “விஸ்வாஸ் கெரெஸ்; தேஹாலிம் வத்தொ கெரரியொ" (ஸங் 116:10) மெனி வேதும் லிக்கி ஸே. திஸான் விஸ்வாஸ் அம்கொ மெளி ஸே. அமி விஸ்வாஸ் கெரராஸ்; தேஹாலிம் வத்தொ கெரராஸ்.

¹⁴ அம்ரெ நொம்கெ காயொமெனெதி, பகவான் ஏசுக் ஜீவ் ஸெந்தொ ஹுடடெ தேவ், அம்கொ மெளி ஜீவ் ஸெந்தொ ஹுடடி அபுல் ப்ரஸன்னமும் தொவ்லன்.

¹⁵ எல்லெஅஸ்கி தும்கொ சொக்கடுகுர்சீஸ். தேவுகெ கிருபொ வேன் ஹொத ஹொத, தந்யவாத் ஸங்கரிய மென்க்யான் மெளி வேன் ஹோன். தேவுகெ நாவ் மெளி மஹிமெ பொந்தய்.

விஸ்வாஸ்கன் ஜிவரிய ஜிவ்னம்

¹⁶ அம்ரெ மொன்னு தில்ல ஸுட்டுனா. தெக்காரிய அம்ரெ ஸரீர் நாஸ் ஹொயெத் மெளி, அம்ரெ ஜிவ்னம் நிச்சு நிச்சு நொவ்வொ ஹொய்லேத் ஸே.

¹⁷ அமி பொந்தரிய பா³த பெ⁴ளி ஸெணம் ஜேடய். தெல்லெ ஜுகு கெ⁴டி நிள்சி ரா:னா. அம்கொ அப்பரிய மஹிமெக் லெ:க்க நீ: தெல்லெ கொப்பிம் நிள்சி ரா:ய்.

¹⁸ தொளர் தெக்காரியெஸ்தெ கள்ளுனொ மெனி ஹவ்டரானி. தொளர் தெக்கன் முஸுனாஸ்தயெ கள்ளுனொ மெனரிய லக்ஷ்யமும் அமி ஜிவராஸ். காமெனெதி தெக்காஸ்தயெ நிள்சி ரா:னா. தெக்கானாஸ்தயெ நித்யம்கன் நிள்சி ரா:ய்.