1 தீமோத்தேயு 5 - Saurashtra Bible (BSI)

விஸ்வாஸினுக் தேரிய ஆலோசனான்

¹ ஒர்ஸு ஹொயாஸ்தெங்கொ கா³ள்டு நாஸ்தக் தெங்கொ மாய் பா³ப்கன் ஹவ்டி கெனம் கேர்.

² திஸோஸ் ஜவ்ணா, ஜவ்ணினுக் பை⁴ பெ⁴ய்னான்கன் ஹவ்டி புத்தி ஸங்கி.

³ விதவெனுக் ஹேது கேர். விஸேஷ்கன் ஆதரவு நீ:ஸ்த விதவெனுக் ஹேது கேர்.

⁴ ஒண்டெ விதவெக் நு:ருன்தீ, நத்யா நத்தினின்தீ ரி:யெதி தெனூஸ் தெல்லெ விதவெனுக் ஹேது கெரந்தக். தெங்கொ ஜெனாஸ்தெனுகின், அஜ்ஜா அஜ்ஜின்கெ சொக்கட் கார்யமுனுக் ஹவ்டி ஸீ, தெனு மெளி சொக்கட்யெ கெரஸ்தக் ஸிக்குலந்தக். எல்லேஸ் தேவுக் ஒப்பயெ ஜிவ்னம்.

⁵ ஆதரவு நீ:ஸ்த விதவென் தேவ் ஹொல்லெ விஸ்வாஸ் தொவி ராத் தீ³ஸ் ப்ரார்தன கெர்னொ.

⁶ அமி கெத்தி³ சொக்கட் ஜிவெத் புஜ்ஜய் மெனி ஹவ்டரிய ஸுகபோகின் ஜீவ் ஸெங்கொ ரி:யெத் மெளி மொஜ்ஜியாஸ்தெனூஸ்.

⁷ விதவெனுக் கொன்னின் சூக் ஸங்குனா ர:னொ மெனெதி தெங்கொ எல்லெ புத்திமதினுக் ஸங்கி.

⁸ ஒண்டெதெனு அபுல் ஒஸ்துனுக்கின், விஸேஷ்கன் அபுல் குடும்பமுக் ஸீல்னா ஜியெதி தெனு தேவுகெ ஸத்யமுக் ஒப்புல்னாஸ்தெனு. தெனு அவிஸ்வாஸின் ஸொம்மர் மோஸ்கன் ரா:ன்.

⁹ ஷாட் (60) ஒர்ஸு ஹொயெ விதவெனுக் கெத்தி³ விதவென்கெ ஸபாம் செர்சுல்னொ. தெனொ ஒண்டே தல்லொ ஸெங்கொ ஜிவி ர:னொ.

¹⁰ நு:ருனுக் சொக்கட்கன் ஹொவ்டஸ்த, உபஹார் கெரஸ்த, விஸ்வாஸினுக் ஸேவொ கெரஸ்த, ப்ரசனானுக் திர்சஸ்த, சொக்கட்யெ கெரரிய குண்ணுன் தெகொ ர:னொ.

¹¹ ந:ன்ன ஒர்ஸு விதவெனுக், விதவென்கெ ஸபாம் செர்சுலஹோனா. காமெனெதி தெனு பீர் ஹொராட் கெல்லுனொ மெனி ஆஸெ அவெதி, கிறிஸ்துக் ஸேவொ கெரஸ்த ஸொட்டி ஜேடன்.

¹² தெனு அபுல் ஜிவ்னமுக் தேவுக் மெனி ஒப்பிஞ்சி தியெ வாக்குதானுக் சல்த கெல்லன் முஸுனாஸ்தஹால் சூக் கெரெ மொன்னு தெங்கொ கொப்பிம் ரா:ய்.

¹³ தீநா:ஸ்தக், தெனு கே⁴ர் கே⁴ருக் ஜீ ஹோனாஸ்த வத்தானுக் கெர்லேத் ரா:ன். கய்தி பீதி கெண்டல்பொந்திகன் ரா:ன். தீ கெத்தி³ நா: தெனு அங்குன் ஜுகு மோஸ்கன் சல்த கெல்லி, ப்ரயோஜன் நீ:ஸ்த வத்தானுக் கெரி, துஸ்ரதெங்கா விஷயமும் தொஸ்கொ தீ³, ஜெடொ மல்லஸ்தெனுகன் ரா:ன்.

¹⁴ தேஹாலிம், ந:ன்ன ஒர்ஸு விதவென் பீர் ஹொராட் கெல்லி நு:ருனுக் ஜெனி, ஜித்ரபுக் சல்த கெரஸ்தேஸ் சொக்கட் மெனி ஹவ்டரியொ. தெப்போஸ், விரோதின் தெங்கொ சூக் ஸங்கன் முஸுனா.

¹⁵ காமெனெதி, எக முல்லோஸ் தெவ்ட விதவென் தேவுக் விஸ்வாஸ் கெரஸ்த ஸொட்டி சாத்தான்கெ வாடும் ஜேட்யாஸ்.

¹⁶ பகவானுக் விஸ்வாஸ் கெரரிய ஒண்டெ பெய்ல், விதவெனுக் கபடெதி, தெனோஸ் தெல்லெ விதவெனுக் ஆதரவு தேந்தக். தேவுகெ ஸபாக் தெல்லெ பா⁴ர் தேஹோனா. தெப்போஸ் ஸபாம் நிஜ்ஜம்கன் ஆதரவு நீ:ஸ்த விதவெனுக் ஸீலன் முஸய்.

¹⁷ ஸபாக் சல்த கெரரிய ஒள்டுன், விஸேஷ்கன் தேவுகெ வத்தானுக் போதன கெரஸ்தெங்கொ, தீ³ இத்க ஸம்புலொ கள்ளஸ்தக் தகுதி ஸே.

¹⁸ காமெனெதி, “கொ³வத் ஜுண்ணரிய கா³யுக் தோண் பந்தஹோனா" மெனிகின், “காம்கெரஸ்தெனொ கூலி கள்ளஸ்தக் பாத்யம் ஸே" மெனி வேது வத்தான் ஸங்கரியொ. (உபா 25:4; மத் 10:10; லூக் 10:7)

¹⁹ ஸபா ஒள்டுனுக் விரோத்கன் கோன்தி சூக் ஸங்கெதி, தெக ஆதார்கன் தீ³ தீ²ன் ஸாக்ஷி ரா:னா ஜியெதி தெல்யெ தூ விசான கெரஹோனா. (உபா 17:6; 19:15)

²⁰ கோன்தி பாப் கெரெதி ஸபா விஸ்வாஸினுக் தா⁴க் அவஸ்ததானுக் அஸ்கினா ம:ஜார் தெகொ கடிஞ்சிலெ.

²¹ தேவுகெ ப்ரஸன்னமும்கின், பகவான் ஏசு கிறிஸ்துகெ ப்ரஸன்னமும்கின், தெனு விஸேஷ்கன் களைளியெ தேவு தூதுன்கெ ப்ரஸன்னமும் ஹிப்பி, மீ தொகொஜோள் மெல்லரியொ. மீ ஸங்கரியதானுக் சல்த கெல்லெ. ஒண்டெ பொங்குட்கன் வத்தொ கெரஹோனா. விசான கெர்னாஸ்தக் தீர்மான் கெரஹோனா.

²² ஸெர்ககன் புஸி களைளுனாஸ்தக் கொங்கினாக் தேவு காமுனுக் ந்யமுன் கெரஹோனா. திஸனி ந்யமுன் கெரெதி தெனொ கெரரிய பாபும் தொகொ மெளி வடொ ஸே மெனி மென்க்யான் ஹவ்டன். கொன்னின் தொகொ சூக் ஸங்குனாஸ்ததானுக் சல்த கெல்லெ.

²³ அத்தெங்குட் தூ நிஸ்த பனி கெத்தி³ பேனாஸ்தக் துரெ போட் சொக்கட் ரா:ஸ்தக், தெர்ஸு தொகொ அவரிய ஸரீர பலஹீன் ஜாஸ்தக் ருவ்வொ திராட்செ ரெஸ்ஸு மெளி பே.

²⁴ தெவ்டதெனு கெரரிய பாபுன், பாப் மெனி அஸ்கினாக் களஜ்ஜய். தெவ்டதெங்கா பாபுன்கீ தேவ் நியாவ் ஸார்வொ கெரெ பல்சோஸ் களாய்.

²⁵ திஸோஸ் தெவ்ட சொக்கட் கார்யம் செட்டு கெரி பராட் களஜ்ஜய். தெவ்ட சொக்கட் கார்யம் ருவ்வொ தின்னு பல்சோஸ் களாய். கோனக் ரி:யெத் மெளி மென்க்யான் கெராஸ்தெ ஒண்டெதி பராட் களயிஸ் திரய்.