Yuda 1 - Samburu

¹ Kore ana palai naa keing'uaa Yuda, laisiaayiani le Yeso Kristo oara sii lalache le Yakobo. Kairoroki lolo ooipoto, oaatachama ꞉Nkai Papa, neirritita ꞉Yeso Kristo.

² Metoponari taatua ntae lng'ur o seriani o nchaman.

Laiteng'enak le sapare

³ Lacham lainien, kore abaki aata yieunoto oleng naigerokinyie ntae naipirita ana jeunoto niking'ar, kadol ajo keirikino naigeroki ntae, alej payie inyoknyok aanya larrabal le inia kurukoto nemeibelekenya aikata, naitarasakaki apa sinyat le Nkai.

⁴ Amu keteleliakinete atua ntae ltung'ana ooigerokaki apa nkiguana ewoun eng'or. Kore ninche naa ltung'ana lemeyanyit Nkai, neibelekenya munyani e Nkai ang aaitaa nkoitiei naasie asat e aanyit, neany Yeso Kristo oara ninye apeny lkitok, naa ninye apeny Laitoriani lang.

⁵ Kore abaki iyielolo ntae kuna pooki, naa kaitaparru ake ntae nchere keitejewua apa ꞉Laitoriani ltung'ana lenyena alaku ang'as to nkop e Misiri, kake neitoki aidakie tesiedi lolo leitu eiruk.

⁶ Naa nejia sii eikuna ꞉Nkai lolo malaikani, laa kore duo eyiere neitiemu mpaach e nkitoo naatipikaki, neing'uaa ꞉ninche inie ng'oji nayiere payie ewuenie. Neen ꞉Nkai ninche taatua naimin, too lgiitani loo senke lemedung'o aikata, ana metabau kenya nkiguana e inia parri kitok.

⁷ Kore sii apa Sodom o Gomora o lkerenketi oonyikita, naa nejia etaasa ninche tana laaduo malaikani. Ketaasa ninche loloito, neitoki aairukurukore ng'uarrat aas ntabo to mboita e sesen. Neaku apa ninche nkitanyanyukoto amu ketudung'okaki nkiguana e nkima ee ntarasi.

⁸ Kore eyia, nejia eas lolo tung'ana. Kore te nkitoria ee nkidetidetat enche, neidach seseni lenche, neitoki aany nkitoria e Laitoriani, nedek loaata nkitoo e chumata.

⁹ Kake kore abaki Mikael ilo kitok laa lmalaikani, eorro sesen le Musa o Chitani, naa eitu emen ninye nedung'oki nkiguana, kake ketejo, <>

¹⁰ Kore kulo tung'ana, naa kedekita ntokitin nemeyielo, neitoki aaidakie ate tee nenia tokitin naamusoo aajo kera torrok. Naa kore sii abaki nenia naamusoo, naa kemusoo abaki ng'uesi nemeitoki eyielo.

¹¹ Oi siake ninche! Amu keima nkoitiei e Kain, netapalikita ate ntorno e Balam, aa inia torno taa e lubo nayieu payie elaki. Netanya ꞉ninche Kristo, neidakieki tana neikunaki Kora payie eany Musa.

¹² Kore kulo tung'ana naa soito oopi ooricho le atua nkare. Lolo laa kore too sukukuuni linchi nedaa tenebo o ntae meata nkanyit, aa ate aapeny eing'or. Kera nkidis nemecha naya siwuo, nera sii lkeek lemeata lng'anayio nkata e ndung'ore, ootuata katare netodotunyie taa ntana.

¹³ Naa laing'ok le nkare ninche oaanang'u labur le asat enche e anyit, nera lakir oong'orori. Naa keitibirakaki apake ninche negut e naimin ee ntarasi.

¹⁴ Kore apa Enok, ilo laa le ntowuo e sapa ta Adam, naa keibonua mbaa naaipirita tung'ana laijo kulo ejo, <

¹⁵ paa kore pooki ng'ae nedung'oki nkiguana, nemeatae ltung'ani torno lemeiteyielo ꞉ninye ntorrok pooki naataasa meurie Nkai. Neiteyielo aitoki lolo aing'okok torrok nenia baa torrok nairoro aarie ninye.>>

¹⁶ Kore kulo tung'ana naa kecham aaing'unyung'unya nemeitoki naitiemu, neirukurukore ng'uarrat enche torrok, neikarrie ate, neitemelok nkutukie payie etum inia nayieu.

Nking'odia o nkiteng'ena

¹⁷ Kake kore ntae lacham lainien, entaparru mbaa naatejo apa lkipaareta la Laitoriani lang Yeso Kristo, ewuon eng'or.

¹⁸ Amu ketiakita ntae, <>

¹⁹ Naa kulo tung'ana ooyau oro, nera lena kop, nemeata Ltau le Nkai.

²⁰ Kake kore ntae lacham lainien, entechetu ate te inia kurukoto inchi sinyati naisul pooki, iomonmon to utaroto e Ltau Sinyati.

²¹ Entewueni taatua nchaman e Nkai, iyanyutata lng'ur la Laitoriani lang Yeso Kristo meitabaki ntae nkichon ee ntarasi.

²² Naa entoduaa lng'er lolo oata lng'ach,

²³ nintejeuu lkulikae aawuapu taatua nkima, nintodoldol lkulie lng'er irritata ate, imbaii abaki nkila enche naiduruko taa mbaa torrok e sesen.

Nkisisa

²⁴ Kore ilo oidim atirripo ntae metaa mirrorrorro, nepik ntae tekue nkintoo enye miatata ntioto ing'idada,

²⁵ ilo laa ninye oara Nkai aang nabo, nera Laitejeunoni lang taatua Yeso Kristo, nenye nkisisa o nkitoria o ngolon o nkitoo, apake eitu eitibiri nkop o taata o ntarasi! Aamin.