Yakobo 5 - Samburu

Etobuakaki lparakuo metoduaa ate

¹ Lotung'ana kulo parakuo! Enchira niyekuku, tankaraki sina lipuopuo aatum.

² Keisamisu parakuoicho inchi, nemut nkilani inchi lasai.

³ Kore saabu o nkocholai inchi naa kemut kutu, naa keaku kenya ana kutu limunoto nadung'okinyieki ntae nkiguana, nanya seseni linchi ana nkima. Naa inteng'elitata parakuoicho inchi tee mperot e nkiting'oto.

⁴ Ng'ura ja! Kore lolo aisiaayiak la lchampa leitu ilaakiki ropiyiani enche, naa keichirita. Naa kore sii lkichiret loo lolo adung'ok la lchampa, naa ketabaka nkiyiaa e Laitoriani loo njorin.

⁵ Itibiko ntae to nkop inyanya lkar nitodokita katukul, nitijing'a loikar aaitipir ate ana looyieng'i.

⁶ Inguanare, niarar ltung'ani loosipat, abaki eitu erare ntae.

Enting'iria taatua sina

⁷ Lalachera o nkanachera ainien, enting'iri naa ana meyeu Laitoriani. Eng'ura ja neiko laturoni la lchampa teneng'iri aanyu larin metacha, neanyu lng'anayio la lchampa le tipat metubulu neku.

⁸ Naaku enting'iri sii ntae, nintogoliolio, amu ketataana lotunoto e Laitoriani.

⁹ Lalachera o nkanachera ainien, eminkarnyasa maate, payie meiguanareki ake ntae. Eng'ura ja! Keitache ladung'oni le nkiguana to nkutuk e nkaji.

¹⁰ Lalachera o nkanachera ainien, entaparru lolo oibonok apa le Nkai oiroro ta nkarna e Laitoriani ooting'iria abaki eitamitae sina, enting'iri sii ntae sina ana ninche.

¹¹ Kore naa, ikidol aajo kemayiana lolo ooting'iria sina. Itining'o apa ng'iriata e Ayubu o neitaasa ꞉Laitoriani ninye te siedi, nchere keata Laitoriani lng'er o lng'ur.

¹² Kore nalang mbaa pooki, lalachera o nkanachera ainien, emimanyare chumata tanaa nkop tanaa sii nkae toki. Kake enchoo <> inchi metaa <>, neaku <> inchi, <>, payie medung'oki ake iyioo Nkai nkiguana torno.

Nkomono nati nkurukoto

¹³ Keatae lonyamal taatua ntae? Enchoo eomon. Keatae long'ida? Enchoo erany sinkoliotin le nkisisa.

¹⁴ Keatae lomuai taatua ntae? Enchoo eipot lpayiani le nkanisa metoomonoki ebukoki lata ta nkarna e Laitoriani.

¹⁵ Naa kore nkomono enche natoomono to nkurukoto, neichiunyie ilo tamoyiai, neinyoyie ꞉Laitoriani ninye. Naa kore tanaa ketaasa ng'oki, nepalikini.

¹⁶ Naaku naa, erriidu ng'ok inchi, imbalakinono likae o likae, niomonokinono payie eichiunyieki ntae. Kore nkomono e ltung'ani loosipat naa keata ngolon oleng.

¹⁷ Kore apa Elija naa ltung'ani otuwuana ake iyioo, neomon ninye oleng payie mecha nchan, naaku eitu echa nchan to nkop larin okuni o lapatin ile.

¹⁸ Neitoki aomon metacha, nedou nchan te keper, nebulu lng'anayio to nkop.

¹⁹ Lalachera o nkanachera ainien, kore teneatae aikata taatua ntae ltung'ani otopong'ori aing'uaa sipata neatae ltung'ani otirrinyua,

²⁰ keyiere neyielou ilo tung'ani otirrinyua nchere, kore ilo orrinyu laing'okoni metung'ai nkoitiei enye e mpong'ori, naa keitejewua nkichui e ilo tung'ani te lkiye netujutoyieki ng'ok enyena kumo.