Yakobo 3 - Samburu

Keyiere nirrita lng'ejep

¹ Lalachera o nkanachera ainien, emincho lkumo linchi eaku laiteng'enak te nkanisa, amu iyielolo aajo kore iyioo ooiteng'enicho naa kedung'okini nkiguana nagol oleng.

² Amu kore tee iyioo pooki, ikias ake mbaa kumo naapong'o. Kake kore ilo lemeitopong tee rereii oojo, naa keisula neidim sii airrita koon too nkulie oito pooki.

³ Ikindim aatipik mbartan senke nkutukie payie etum aatining iyioo, nikimerregel mechomo nikiyieu.

⁴ Ng'ura sii aitoki melin, kore abaki era kutuaa oleng nekutaa lkutati kitok le nkare, kake nkini toki ake naata nateeyo, meeima ng'oji pooki neyieu larewani.

⁵ Nejia sii etiu lng'ejep, nkini rubata ake te sesen kake kejo rereii sapuki oleng le nkikarra. Keitarrap sii aitoki lkini milmiloi le nkima ntim nkima.

⁶ Kore sii lng'ejep, naa inji etuwuana nkima. Kera rubata taatua rubat e sesen, naimu ntokitin torrok, neidim aitarruoi sesen pooki lo ltung'ani, neteoki nkichui enye pooki nkoitiei nalo nkima, neitami sii ninye nkima to lmoti le nkima.

⁷ Kore nkajijik pooki ee ng'uesi, naaju o naasipa o ne atua nkare naa keitorei, neitoria ꞉ltung'ani ninche.

⁸ Kake meatae ltung'ani oidim aitoria lng'ejep. Kera ninye ntoki torno nemeibooroi, nabore sayiet nayecho.

⁹ Kore te ilo ng'ejep, ikisis Laitoriani oara Papa lang, nikidekie aitoki ltung'ana ooitibira ꞉Nkai te nkitanyanyukoto enye.

¹⁰ Kore mayian o ldeket naa nkutuk nabo ake eing'uaa. Lalachera o nkanachera ainien, Meyiere payie eaku inji.

¹¹ Amaa, keatae lchorro oimu nkong'u nkare supat o nadua nkata nabo?

¹² Lalachera o nkanachera ainien, keidim lng'erriyio aatijing lcheni lo lng'aboli, tanaa lng'abolo aatijing lcheni lo lmusabibu? Meidim sii lchorro odua nkare aimunyie nkong'u nkare supat.

Ng'eno nagut naing'uaa chumata

¹³ Kalo tung'ani taa ntae oara ng'en neata yielounoto? Nchoo eitodolu te lwuenet lenye supat asat enyena naas to mborron naing'uaa ng'eno nagut.

¹⁴ Kake kore tiniatata lom torno nirara ltung'ana laa ne maate ake enya, emiinkar ake nisapsap ate aajo kebaki neatae ndedei niatata.

¹⁵ Kore inia ng'eno, naa mara ng'eno nagut e Nkai kake ne nkop, mara ne Ltau Sinyati kake naa lairiruani.

¹⁶ Amu kore neti lom torno nenya ltung'ana ne maate, naa ketii ng'olng'ol o mbaa pooki torrok.

¹⁷ Kake kore inia ng'eno naing'uaa chumata, kore nekue naa keisinyati, neyau sii seriani o ng'iriata nening'icho, neata lng'er neiu lng'anayio supati, nemeata ngela nemeitaakino.

¹⁸ Naa kore lantarara le sipata, naa keuni te seriani taatua lolo oaacham seriani.