Yakobo 1 - Samburu

¹ Kore ana palai naa nanu Yakobo, oara laisiaayiani le Nkai o la Laitoriani Yeso Kristo eing'uaa. Kairoroki lolo mareita tomon o oare oaatasachayieki aasachaki atua loreren.

Saanat o ng'iriata o nkurukoto

² Lalachera o nkanachera ainien, enting'idata katukul, tinitumtum saanat naapaapaacha,

³ amu iyielolo aajo kore tenesaani ntae tankaraki nkurukoto inchi, nitumtum ng'iriata.

⁴ Naaku naa, enchoo ng'iriata inchi ebulu katukul, payie iakuku ltung'ana ootubulutua aaiputakino taa mbaa pooki, meatae hoo ntoki nang'oriki ntae.

⁵ Kore teneatae taatua ntae lotong'orika ng'eno, enchoo eomonu ta Nkai naa ninye naicho pooki ng'ae eyieu nemebuaaki aing'ode, naa keichori ninye.

⁶ Kake teneomonu, enchoo eomonu to nkurukoto meata hooyia lng'ach, amu kore loata lng'ach naa inji etuwuana ana laing'ok le mpaso ookutaa lkutati aya neyieu.

⁷ Kore ltung'ani laijo ilo, naa meyiere abaki nerachaki nkue ajo keitoki etum ta Laitoriani,

⁸ amu kore ltung'ani oanya namu are taa mparrunot, naa meata nkitachoto too nkoitieii enyena pooki.

Ndorropicho o parakuoicho

⁹ Kore ltung'ani omena oiruko Kristo, keyiere payie eng'ida tankaraki /nailiepunyie ninye ꞉Nkai aitaa le Kristo.

¹⁰ Kake kore lolo oaara parakuo, oi eng'ida tankaraki naitodowua ninche ꞉Nkai aitaa le Kristo, amu kerrarra ake parakuoichio ana neikunari ntapuka e soro.

¹¹ Amu keiliepu ndama eirewua, nepejoo nkujit o ntapuka e soro, netoi ntapuka nerrarrarri, neichunye supaticho enche. Nejia sii eikunari ltung'ani parakuoni eloito ake ninye kue tee siaatin lenyena.

Sinaitin o ntemat

¹² Kemayiana ilo tung'ani ong'iri taatua sinaitin ooitami, amu kore payie eidip aimai sina, netum nkopiyia e nkisulata aa taa nkichon ee ntarasi, naitayia Nkai lekutuk ajo keicho lolo oaacham ninye.

¹³ Kore naa tenetemi ltung'ani, mincho ake ejo, <> Amu metemi Nkai to ntorroni, nemetem sii ꞉Nkai ltung'ani.

¹⁴ Kake ng'uarrat enyena torrok naatem ltung'ani, neyiataki ntorroni.

¹⁵ Kore naa ana naiturukumu ntoki neicho, keiturukumu sii ng'uarrat torrok neiu ng'oki, kore payie eitore ng'oki ltung'ani, neiu lkiye.

¹⁶ Lalachera o nkanachera ainien, emincho eitopong'ori ntae!

¹⁷ Kore nkichooroto pooki supat nemeata ng'orikinoto naa chumata eing'uaa, etodowua eing'uaa Papa oitibira ndama o lapa o lakir pooki le chumata, ilo lemeikonyi hoo aibelekenya anaa eikonyi aiwuatuwuata.

¹⁸ Kore apa te yieuna enye, neicho iyioo metiini nkata e are aimu rerei lenye odede, payie kiaku ltung'ana lenyena oogeluno taatua ntokitin pooki naitibira ninye.

Tining'o nias nejo rerei le Nkai

¹⁹ Enteyielo naa, lalachera o nkanachera ainien nacham, nchere meata lobo linchi lemesioki aning nemeipirriki airo nemesioki sii agoro,

²⁰ amu kore ngoro e ltung'ani naa meret ltung'ani oitaa ꞉Nkai loosipat.

²¹ Naaku naa, enturrai mbaa pooki naaidurukie ntae o ntorno nataa kitok oleng, ning'amaa to mborron ilo rerei otipika Nkai atua ltauja linchi, oidim aitejeu nkichui inchi.

²² Naa entaa loaas ana nejo rerei le Nkai, namara ake looning apeny rerei, amu isapsap ate tiniasias inia.

²³ Amu kore ake loning ilo rerei nemeas ana nejo, naa inchi etuwuana ltung'ani ochil nkomon enye te kitaap,

²⁴ kore payie eidip atichila, nelo te inie nerikino ake inia kata netiu duo nkomom enye.

²⁵ Kake kore ilo tung'ani ochekino aing'or aitibiraki inia kitanapata e Nkai e nchaman nalaku ltung'ana, nelo kue eas ana nejo nemerikino naatining'o, naa kemayian ꞉Nkai te inia naasita.

²⁶ Kore tenejo ltung'ani kera ltung'ani oyielo Nkai, kake nemeirrita lng'ejep lenye, koon ake esapita naa kore inia najo keyielo Nkai naaku ake pecheu.

²⁷ Kore yielounoto e Nkai naiken ꞉Nkai Papa lang ajo kedede, naa inia nairrita nkera okichono o nkoilia tee sinaitin lenche, neirrita koon payie mejing atua ntorroni nati nkop.