Tito 3 - Samburu

Asat supati naas ꞉ltung'ana oiruko Kristo

¹ Ntaparru ltung'ana le nkanisa meeitodou ate too lolo ooitoricho o loaata nkitoo nening sii ninche, nerretena aas ntoki pooki supat.

² Nemejo hoo ntoki torno too lkulie, nepaachare lolemilemi, nebor, nera ltung'ana supati katukul too ltung'ana pooki.

³ Amu ikira abaki apa iyioo lmada, nimikining'icho, neitopong'ori iyioo, nikira rrindiki loo ng'uarrat torrok o mbaa kumo naaiting'id seseni. Nikiwuenie nkiba o lom, eibae iyioo nikimbaro.

⁴ Kake kore apa payie eibalunyie Nkai nara Laitejeunoni lang supaticho o nchaman enye naata too ltung'ana,

⁵ neitejeu iyioo, namara tankaraki nikitaasa sipat, kake tankaraki lng'ur lenye. Keitejewua iyioo to nkutuko natiunyieki iyioo nkata e are, neiteng'ejuk iyoo ta Ltau Sinyati,

⁶ ilo oichoo iyioo Nkai te leng'on kitok aimu Yeso Kristo, Laitejeunoni lang.

⁷ Paa kore eikena iyioo ꞉Nkai ajo ikira loosipat to munyani enye, nikiaku lootum nkichon ee ntarasi, inia nikisiliguta.

⁸ Keisiligai kulo omon, naa kaaitaarriyian payie ilikoo te mpijan, paa kore ꞉lolo ooiruko Nkai, nenyok aas supati. Kore kuna baa naa keisupati too ltung'ana neret ninche.

⁹ Kake tapaachare nkarnyas e madai o natinin ee lmakui o nchankar o nchankar ee nkitanapat, amu meitoki eret kuna, pecheu ake ninche.

¹⁰ Kore ltung'ani oyeu nkiteng'ena e sapare, ng'odia ninye nkata ekue o ne are, naa kore tenelo kue te inia, timirai ninye,

¹¹ iyielo ajo kore ltung'ani le inia pukunoto naa keimina neyaka koon nkiguana tankaraki ee ng'ok enyena.

Nkirorokino e siedi

¹² Kore ake payie aaidip airruu Artemas anaa Tikiko, ninyok oleng alotu natii te lkerenket le Nikapolis, amu atudung'o ajo kawuon te inie ta ng'amata e nkijepe.

¹³ Tonyuaa ntanapa Sena, ilo okilii o Apolos payie melau hoo ntoki to lototo enche.

¹⁴ Nchoo ltung'ana lang meiteng'ena ate aas siaatin pooki supati to nyuata, payie etum yieunot naayiere oleng neata ltung'ani, payie meaku ltung'ana lemeiu lng'anayio.

¹⁵ Ikiroroki ꞉ltung'ana pooki laaboitiere tene. Roroki sii sotuatin lang le nkurukoto. Metaa munyani e Nkai tenebo o ntae pooki.