Biblia Todo Logo
Bìoball air-loidhne

- Sanasan -

Tito 2 - Samburu


Nteng'enicho nkiteng'ena nadede

1 Kake kore iyie, nteng'enicho mbaa naaichiaari e nkiteng'ena nadede,

2 intaarriyian lpayiani arrarrin metaa looiririki mbaa, neiririkino nkanyit, netem mbaa, neichiaari mbaa to nkurukoto o te nchaman neata ng'iriata nairirikino.

3 Nejia sii nkuna ntomonok arrarrin, ntaarriyiana metaa naawueni to lwuenet oicho Nkai rrepet. Nemeitarruo lkulie tung'ana nkarn, anaa eaku rrindiki e merai, kake keichiaakino neiteng'enicho mbaa supati,

4 payie etum aaitaarriyiana ntomonok leleru metachama lpayiani lenche o nkera enche.

5 Ntaarriyiana ninche metaa naatem mbaa, neaku ntomonok sinyat, naas siaatin taa nkang'ite enche, neichiaari, neitodoyio ate taa lpayiani lenche, payie medeki rerei le Nkai.

6 Nejia aitoki nkuna lewa leleru, ntaarriyiana metaa lootemu mbaa.

7 Kore taa mbaa pooki, ntodolu koon aaku nkitanyanyukoto naduaari taa asat supati. Tininteng'enicho, nteng'enicho ta nkanyit metii ndala,

8 neichiaari nkuroroto ino nemeata ntoki nakurrieki, metaa kore lolo likimbooyo, nenya anyit meata mbae torno najo naipirita iyioo.

9 Nteng'ena rrindiki meitodoi ate too lkutuaa lenche taa mbaa pooki, neiting'id ninche nemeitooliki,

10 namara looirrapirrapicho, kake payie eitoduaaya nchere keisiligai katukul, metaa kore taa mbaa pooki, nerrepi nkiteng'ena e Nkai, Laitejeunoni lang.

11 Amu /keibalunyieki munyani e Nkai, payie eyau njeunoto ee ltung'ana pooki.

12 Naa keiteng'enita iyioo inia munyani matany mbaa nemetii uriata e Nkai o ng'uarrat e nkop, payie kibik kitem mbaa, nikiwueni te sipata nikiurie Nkai tana kop,

13 kianyuta siligi lang omayiana, meitabari tenelioii nkitoo ee Nkai aang kitok, nara Laitejeunoni lang Yeso Kristo.

14 Keichorua koon anang iyioo payie elaku iyioo too ntorrok ang, neituk iyioo payie kiaku ltung'ana lenyena le tipat oonyok aas mbaa supati.

15 Kore inteng'enicho kuna baa, ntaarriyiana ltung'ana, ning'ode ninche te nkitoria pooki niata. Mincho hooyia ltung'ani kimenu.

© 2021, Bible Translation and Literacy

Bible Translation and Literacy
Lean sinn:



Sanasan