Rroman 13 - Samburu

Entodoi ate taabori lolo ooitoricho

¹ Enchoo metaa keitodoyio ꞉ltung'ani pooki koon taabori lolo ooitoricho, amu Nkai eing'uaa nkitoria pooki naa kore lolo ooitoricho naa Nkai natipika ninche rikore.

² Naaku kore ilo oibooyo inia kitoria, naa ntoki natipika ꞉Nkai eibooyo, naa kore loaas inia netum ꞉nkiguana.

³ Amu meituria ꞉lolo ooitoricho ltung'ani oas supati, kake keituria ilo oas mbaa torrok. Kore tanaa miyieu niuriei lolo ooitoricho, taasa naa supati payie kirrep ꞉ninche,

⁴ amu laisiaayiak le Nkai ninche, likintaas iyie supati. Kake tinias iyie ntorrok, tuureicho, amu keitemeicho lolo ooitoricho, kera ninche laisiaayiak le Nkai oata nkitoo naitalak ntorrok ilo oas ntorrok.

⁵ Naaku, meata ltung'ani lemeyiere neitodoyio koon taabori lolo ooitoreicho, namara ake tankaraki naurie ajo kidung'okini nkiguana torno, kake tankaraki namuso te inia naichiaakino.

⁶ Tankaraki ana sii payie ilaklak kodi, kore lolo ooitoricho naa Nkai eisiaita enyok aas laduo siaai oyiere neas.

⁷ Enchoo pooki ng'ae ntoki naichiaakino neichori: Kodin naapaapaacha too lolo oaalaakini kodi, ninchocho nkanyit lolo ooichiaakino nkanyit, ninchocho rrepeta lolo ooichiaakino rrepeta.

⁸ Emincho metaa iatata sile e ltung'ani mara ake nchaman nichamama likae o likae, amu kore ltung'ani oacham likae naa eitabayie nkitanapat.

⁹ Kore nkitanapata najo miloloito o najo miar metua o najo mipurrucho o najo ming'uarricho o nkae kitanapata ake pooki, naa keitutum ꞉ele rerei ojo, <>

¹⁰ Kore nchaman naa meitaas likae tung'ani ntoki torno, naaku keitabaya ꞉nchaman nkitanapat.

Enchomie wong'an

¹¹ Kore sii aitoki iyielolo aajo aa ng'amata ana, etabawua nkata payie inyuotototo aaing'uaa njuo. Amu etinyikua taata njeunoto aang alang apa payie king'asu aairuk.

¹² Echomo nkuarie anyikaa netaa keikenyu, matuburkuchu naa asat e naimin, nikinchop masaa e wong'an.

¹³ Entaas naichiaakino ana neasi to wong'an, aawueni ta nkanyit namara to lubo, anaa te merai anaa to loloito, anaa ta asat e anyit anaa ta larrabal anaa to lom,

¹⁴ kake enchopo Laitoriani Yeso Kristo, niminchocho eaku mpukunoto inchi torno iparraa, payie meinyuototo ake ng'uarrat torrok enyena.