Rroman 12 - Samburu

Nkoitiei ng'ejuk nisiaayieyie Nkai

¹ Naaku lalachera o nkanachera, kore tankaraki lng'ur le Nkai litumo, kaitaarriyian ntae payie inchooyoyo seseni linchi metaa lasar oichu, osinya neiting'id Nkai, amu ana nkoitiei naichiaakino tinisiaayieyie Nkai.

² Emiduaaya mbaa e ana kop, kake enchoo eibelekeny ntae Nkai aiteng'ejuk mparrunot inchi, payie itumtum aatisipu inia nayieu Nkai nara supat, neiting'id ninye, necho.

Nkichoorot e munyani e Nkai

³ Amu kore to munyani e Nkai naaichooki, kaitanap pooki ng'ae otii atua ntae payie medol koon ajo kera toki aitalang nkiririkinoto enye, kake nchoo eparraa pooki ng'ae ana naichiaakino, te risioroto e nkurukoto naichoo ꞉Nkai ninye.

⁴ Amu kore ana nikiata rubat kumo te sesen obo, nemeata rubata nemeata siaai enye,

⁵ nejia siake etiu, kore iyioo kira kumo, ikira sesen obo taatua Kristo, nemeata sii tee iyioo lamara rubata e likae.

⁶ Ikiata nkichoorot naapaapaacha te nkiririkinoto e munyani e Nkai naichooki iyioo, naaku kore ilo oata nkichooroto e naibon e Nkai, nchoo easichere ana nairirikino to nkurukoto.

⁷ Kore ilo oata nkichooroto e nkisiayiare, nchoo eisiaaichiere inia kichooroto. Kore laiteng'enani nchoo eiteng'enichiere nkichooroto enye.

⁸ Kore ilo oitogol lkulie, nchoo eitogol te inia kichooroto enye, naa kore ilo oichooyo, nchoo eichooyo ta ltau supat, kore ilo oitacheki lkulie ta nkanisa, nchoo eitacheki to nyuata, kore ilo oing'er, nchoo eing'er te ng'ida.

Entewueni te nchaman

⁹ Meata nchaman nkitaakino, embai ntorrok nimbung'bung aaitirrichaki mbaa supati.

¹⁰ Entachamata katukul ana lalachera o nkanachera, ninchocho metaa meata lemenyok aaitodolu nkanyit alang likae.

¹¹ Nimichalulu, kake entaa loaata yieuna ninyokiekie taa ltauja, nisiaisiai Laitoriani.

¹² Ning'idada taatua siligi linchi, ning'iriri taatua sina, niomonmon nkata pooki.

¹³ Entang'ar ntoki niatata o lolo sinyat lemeitoki eata, niakuku looitoomon lomon taa nkajijik inchi,

¹⁴ nimayianyian lolo ooitam ntae sina, entamayian emidek ninche.

¹⁵ Enting'idata o lolo oong'ida, ninchirchir o lolo ooichirita.

¹⁶ Enchoo metaa irara loaata mparrunoto nabo, nimitumtum mparrunot niliepiepie ate aaitalang lkulie, kake entuchulare abaki ltung'ana oomena, nimidoldol ate aajo irara ng'eni.

¹⁷ Emilaakinyie ltung'ani ntorno to ntorno, entonyok entaas inia nara supat tekue ltung'ana pooki.

¹⁸ Kore ake tanaa keidimai, entewueni te seriani o ltung'ana pooki.

¹⁹ Loaachami, emintalak ltung'ani teneitaas ntae ntorno, entung'ai metumo ngoro e Nkai, amu keigero ajo, <>

²⁰ Alang niasias inia, entaas najo Lkigerot, <>

²¹ Emincho ntorrok emir ntae, kake entimir ntorrok too supati.