Pilemon 1 - Samburu

¹ Kore nanu Paulo oena tankaraki Laitejeunoni Yeso o lalache lang Timoti, naa ikiroroki iyie Pilemon lchore lang likicham, kiasaki Nkai siaai tenebo.

² Nikiroroki sii iyie Apia nkanache ang o iyie Arkipo lboitiei lang kira sikarini te Kristo, o looiruko Kristo ootumo aasai Nkai ta nkaji ino.

³ Meichoo ntae Nkai Papa lang o Laitoriani lang Yeso Kristo munyani o seriani.

Nache o nkomono e Paulo tankaraki Pilemon

⁴ Kaicho Nkai nache nkatitin pooki tanaaparru iyie to nkomono ai,

⁵ tananing nkurukoto niata ta Laitoriani Yeso o nchaman niata too sinyat lenyena pooki.

⁶ Naomon metaa kore inia kurukoto niking'ar tenebo, neaku keasicho te yielounoto e ntoki pooki supat nikiata taatua Kristo.

⁷ Kore nchaman ino naa kaaiting'ida oleng naaitogol sii, amu keisiate ltauja loo sinyat tankaraki iyie, lalache lai.

Etoomono ꞉Paulo Pilemon metapaliki Onesimas

⁸ Kore tankaraki inia, abaki duo aitieu atiaki taasa mbaa naaichiaakino nias taatua Kristo, maajoki taasa.

⁹ Kore naas tankaraki nchaman, kaalej nanu ꞉Paulo, lpayian arrarri oena taata tankaraki Kristo Yeso.

¹⁰ Kaalej tankaraki nkerai ai naji Onesimas, inia nataa ꞉papa lenye le nkiyeng'et, apa ewuon aena.

¹¹ Meata apa ninye dikir te iyie, kake keata taata te iyie o ta nanu.

¹² Naa kore ninye lacham oleng, kareu nitii.

¹³ Kore tana kata aena tankaraki Lomon Supati, naa kayieu duo naaboitiere ꞉ninye tene payie aatum aisiaayia ta mpaach ino.

¹⁴ Kake mayieu apa naas ntoki eitu ichamaa, payie meaku ntoki ino pooki supat nias, ne nkisimakinoto kake ne yieunoto.

¹⁵ Kebaki naa kore apa payie kitoorieki Onesimas te nkiti kata naa payie itum atoboitiere ninye ntarasi.

¹⁶ Merokure aa rrindik, kake kelang rrindik, nera lalache lino licham te Kristo. Aa kore ta nanu, naa lacham oleng. Nebaa sa icham iyie ninye, era ltung'ani, nera sii lobo taatua Laitoriani!

¹⁷ Naa kore tanaa ikimbung nanu tana lboitiei lino, tang'amai sii ninye ana nikinko duo tiniking'amaa nanu.

¹⁸ Tanaa ikintarruoka apa ninye taa mbaa naaje, anaa sii eata sile ino, nchoo eaku nanai.

¹⁹ Nanu Paulo oigero ana ta nkaina ai, nchere kalak, namaimaki abaki ajo iata sile ai, naa iyie koon inia sile.

²⁰ Ee lalache, kore taatua Laitoriani, kayieu nikiret taa naaduo baa naimaka. Ntogolo ltau lai taatua Kristo!

²¹ Amu kaata sipata ajo ining'icho, nayielo ajo ias abaki naalang nenia najo nanu.

²² Naa kore aitoki, ntibirakaaki ng'oji nalotu awuenie, amu kaata siligi nchere kore to nkomono inchi naa kaapaluni maeu nitii.

Nkirorokino e siedi

²³ Ikiroroki ꞉Epaparas, ilo oteenaki tenebo o nanu tankaraki Laitejeunoni Yeso.

²⁴ Nikiroroki sii ꞉Marko o Arisitarko o Demas o Luka oaara laisiaayiak tenebo o nanu.

²⁵ Metowuana munyani e Laitoriani Yeso Kristo taatua ltauja linchi.