Mbolunoto 9 - Samburu

Etukuta lmalaika le imiet mowuo

¹ Nekut lmalaika le imiet mowuo enye, nadol lakira otusulunye te nkeper e nkai asulakino nkop. Neichori ilo akira lbolet le nkutuk e lodo le nkop.

² Kore payie ebol nkutuk e lodo le nkop, nadol mpuro eijukujuku apuku ana mpuro nairrucha e nkima nanyaita nkop. Neitorok inia puro ndama o siwuo.

³ Nepuku lmaat te inia puro aadoki nkop, neichori ngolon nang'orichiere ana nkulupani.

⁴ Nejokini payie meitarruoo nkujit e nkop tanaa ntoki pooki nanyori tanaa lcheni, mara ake ltung'ana lemeata lminchire le Nkai too nkomomi enche.

⁵ Eitu eichori metara ninche metuata kake meitiemio oleng lapatin imiet. Kore mion natumo naa mion natuwuana tiniking'or nkulupa.

⁶ Naa kore te inia kata, keyiaya ltung'ana lkiye nelau, neyieuu oleng payie eye, kake neilany ꞉lkiye ninche.

⁷ Kore lolo maat, netuwuana ana mbartan naaterretenaki payie epuo larrabal. Kore tee nkuechi enche neata ntoki natuwuana ana nkopiyia e nkitoo e saabu, netuwuana nkomomi ne ltung'ani.

⁸ Kore lpapit lenche neodoo ana lo lmurrani, netuwuana lala ana la lng'atuny.

⁹ Neata long'oii ee lgooitie naatuwuana ne senkei, kore nkaipupo enche, neiru ana nkarrin naayietita mbartan ekuetita aapuo larrabal.

¹⁰ Neata lkidong'o oopi nkuechi ootuwuana le nkulupa, naa too kulo kidong'o lenche oopi nkuechi eiteme ltung'ana taa lapatin imiet.

¹¹ Kore lkinkii lenche naa lmalaika le lodo le nkop oji to nkutuk ee Lburania Abadon neji to nkutuk ee Lgirriki Apolion.

¹² Neidip mutai ekue atung'ututari, kake kewuon epuonu nkulie are!

Etukuta lmalaika le ile mowuo

¹³ Nekut lmalaika le ile mowuo enye, naning ltoilo opuku eing'uaa mowuarak ong'uan, naatii lmaawuen pukura oong'uan lo lperere la lasar le saabu otii tekue Nkai, opejeki naing'urre narropili.

¹⁴ Nejoki ꞉ilo toilo lmalaika le ile oibung'uta mowuo, <>

¹⁵ Nelaaya ꞉ilo malaika lolo malaikani oong'uan ooikenoyieki neterretenete eanyita saa o mparri o lapa o lari obolunyieki metumuta ltung'ana ootii orati nabo to uni e nkop.

¹⁶ Naning ajo kore siana loo sikarini oodirita mbartan naa 20,000 nkatitin 10,000.

¹⁷ Naitoki adol mbartan o lolo oodirita eata long'oi ee lgooitie naanyokuoo ana nkima, nera suruai darleyio. Kore nenia bartan neata nkuechi naatuwuana naa lng'atunyo, nepuku nkima o mpuro o ntoki naji salpa too nkutukie.

¹⁸ Kore inia kima o mpuro o naduo toki naji salpa napuku too nkutukie ee mbartan, near metuata orati nabo to uni ee ltung'ana le nkop.

¹⁹ Amu kore ngolon naitemeyie ꞉nenia bartan ltung'ana naa nkutukie o lkidong'o lenche etii. Kore lkidong'o lenche netuwuana lasuria oaata nkuechi, naa ninche eitemeyie ltung'ana.

²⁰ Kore lolo tung'ana leitu eri, netanya eirriidu aaing'uaa nkaitok e sapare naa kechomo ake kue esai lairiruani o nkaitok naaitibirunyieki saabu o naaitibirunyieki nkocholai o naaitibirunyieki surutiai o naaitibirunyieki soito o naaitibirunyieki nkeek. Kore nenia aitok naa medolicho, nemening'icho, nemeyielo aachom.

²¹ Eitu sii eirriidu lolo tung'ana arichoi naar ltung'ana metuata o nkurupore o loloito o mpurrore enche.