Mbolunoto 20 - Samburu

Larin 1000

¹ Naitoki adol lmalaika odou eing'uaa chumata, neibung'uta ta nkaina enye lboleta lo lodo le nkop o minyororo nairochi e senkei.

^2-3 Neibung inia meu, ꞉ilo asurai le apa laa ninye eji Lairirua neji Chitani, neen nenang'aki lodo le nkop metowuana larin 1,000. Neiken lodo le nkop, nerip nkutuk payie mesap ꞉inia meu lochon ana meeichunye larin 1,000. Kore payie eichunye inia kata, neaku meata ajo meboluni te nkini kata dorrop.

⁴ Naitoki adol lorikan le nkitoo naa kore lolo oowuenita neichooki nkitoria meitoreicho. Nadol aitoki ltauja loo lolo apa ootudung'oki lgoso tankaraki limunoto e Yeso naitaitua o tankaraki rerei le Nkai. Eitu esai ꞉ninche inia ng'ues torno o nkitanyanyukoto enye neitu eng'amaa lminchire lenye too nkomomi tanaa taa nkaik enche. Nepiu ninche, neitoricho tenebo o Kristo larin 1,000.

⁵ Kore lkulie tung'ana pooki apa ootuata, naa eitu epiu ana meeichunye larin 1,000. Naa mpiunoto ekue kenya ana naitipiu ꞉Nkai ltung'ana.

⁶ Kemayiana ltung'ani nera sinyati oitipiu ꞉Nkai te inia piunoto ekue. Amu kore ninye naa medol lkiye le oare, kake keaku laitainoni la lasar le Nkai o Kristo, neitoreicho tenebo o ninye taa larin 1,000.

Etimiraki Chitani

⁷ Kore payie eichunye larin 1,000, neboluni Chitani te inie neteenieki apa.

⁸ Nelotu ninye asap lochon pooki le nkop. Kore lolo ochon naa keji Gog o Magog, ooing'uaa lubot pukura ong'uan e nkop. Naa keiturrurru meotu aanya larrabal, nera njore kitok nemeikenai ana sunyai le nkop.

⁹ Nadol ninche erukunyie aailiep aapuo nkop pooki, neigilu manyicho ee sinyati, ilo kerenket oacham ꞉Nkai. Kake nedou nkima to chumata nemut nenia jorin.

¹⁰ Kore Chitani natasapa ninche, nenang'akini lmoti le nkima oilu to ntoki naji salpa, inie apa netanang'akaki ng'ues torno o loiboni le sapare. Naa keitemei kuarie o parkiji ntarasi o ntarasi.

Eiguanare Nkai nkop te nkiguana e siedi

¹¹ Naitoki adol lorika sapuk oibor le nkitoo o ilo ewuenita. Kore chumata o nkop neisig aapuo aaing'uaa ilo owuenita to lorika le nkitoo neitu edoli aitoki aikata.

¹² Nadol ltung'ana ootuata apa, lkutuaa o lkunini eitachoo tekue lorika le nkitoo. Neboli mbukui, neboli aitoki nkae buku ee lolo oaata nkichui ee ntarasi. Neiguanareki ltung'ana pooki ootuata apa te nkiririkinoto Ee mbaa pooki apa naataasa ana naigero too mbukui.

¹³ Nepalu ꞉mpaso ltung'ana pooki ootii atua, kore sii Lkiye o nemeneng'a, nepalu lolo pooki oaata. Neiguanare ꞉Nkai ninche te nkiririkinoto ee mbaa pooki apa naataasa.

¹⁴ Nenang'akini Lkiye o nemeneng'a mpaso e nkima. Kore mpaso e nkima naa ninye lkiye le oare.

¹⁵ Kore ake ltung'ani lemeigero nkarna enye to mbuku ee lolo oaata nkichui ee ntarasi, nenang'akini lbalbal le nkima.