Mbolunoto 18 - Samburu

Nkidaata e lkerenket le Babilon

¹ Kore payie eim kuna baa pooki, nadol aitoki likae malaika edou eing'uaa chumata eata nkitoria kitok, neitulu wong'an e nkitoo enye nkop.

² Nebuak to ltoilo sapuk ajo, <

³ amu etamata lochon pooki naichuo e loloito enye, neng'uar aas loloito o ninye. Kore lkinkii le nkop, neas loloito o ninye, netaa lolo ooinyiang'icho nemiricho garsisi tankaraki parakuoicho enye.>>

⁴ Naitoki aning likae toilo eipoticho te chumata ejo, <

⁵ Amu eturupate ng'ok enyena ana metabaki chumata, neitu erikino Nkai ntorrok naataasa.

⁶ Kore ntorrok pooki naataasa ana ng'oroyieni, talaaki ninye aitaas inia torno nataasa, talaaki inia torno nataasa nkatitin are. Mputaki lkikompe nduaran nkatitin are, nduaran nalang naitaasa ꞉ninye lkulie.

⁷ Nchoo ninye sina o lkichirai aiputaki, aitirisioki ilo kar oatama o nkikarra naikarra ajo, Amu kewuon ake eliepunye koon ajo,

⁸ Kore tankaraki inia, keyakini ninye mutai ta mparri nabo, lkiye o lkichirai le nkoliai o lamei. Naa kepejori te nkima, amu kore Laitoriani Nkai naiguanare ninye naa Nkai Napeny ngolon.>>

⁹ Kore tenedol lkinkii pooki le nkop oaatama rraa netaasa loloito o ninye mpuro enyeita ninye nkima, nebuak te lkichirai aaichiraki ninye.

¹⁰ Neitachoo elakua amu keurie aajo ketum inia mion sapuk natumuto ninye. Nejo, <>

¹¹ Kore ltung'ana le nkop oomir neinyiang'u ntokitin, naa keichir neisinanio tankaraki Babilon amu merekure eatae loinyiang'u ntokitin enche.

¹² Merekure eatae loinyiang'u saabu enche o nkocholai o soito oogol nkinyiang'a o saen naagol nkinyiang'a, nemeatae loinyiang'u nankan enche naapuyiapui o naanyokuoo, naanana o mugiein, nemeatae loinyiang'u nkeek enche naarropil. Nemeatae loinyiang'u masaa enche naateguetunyieki lala loo ltomia o nkeek naagol nkinyiang'a o surutiai o senkei o mpagas.

¹³ Nemeatae loinyiang'u mpukunot pooki e ila enche naarropil o naichi e lmusabibu naamati o mpukunot pooki ee ndaki. Nemeatae loinyiang'u nkichu enche o nkerra o mbartan o nkarrin naayiataa ꞉mbartan o ltung'ana.

¹⁴ Nejoki lolo oomiricho neinyiang'u ntokitin ilo Kerenket <>

¹⁵ Kore ltung'ana ootimira kuna tokitin netum parakuoicho ta Babilon, naa keitachoo elakua amu keurie aajo ketum inia mion sapuk natumuto ninye. Keichir neisinanio,

¹⁶ nebuak aajo, <

¹⁷ Kore te nkini kata ake dorrop, neichunye parakuoicho ino!>> Kore ltung'ana ooreu melin o loodiraa melin o ltung'ana ooisiaicho tee melin o ltung'ana oomiricho tee melin, neitachoo elakua.

¹⁸ Kore payie edol mpuro ta Babilon enyeita nkima, nebuak aajo, <>

¹⁹ Neisuaaki ate nkulupo nkuechi aaitodolu sina lenche, nebuak aaichir neisinanio ejo, <

²⁰ Kake ting'idai iyie nachumata tankaraki ninye! Enting'idata ntae sinyat lenyena o Lkipaareta o loibonok le Nkai! Amu etudung'oka ꞉Nkai Babilon nkiguana tankaraki mbaa torrok naaitaasa ntae.>>

²¹ Nerrapu ꞉lmalaika kitok soit sapuk owuana soit oitamanari aaidong'ie nkano, nenang'aki atua mpaso nejo, <

²² Meatae ltung'ani aikata oitoki aning ltung'ana eochito nkinantani o larriyiak le ranyare o lakutak loo ndulen o lakutak loo mowuarak taatua iyie. Nemeatae ltung'ana oocheticho tanaa laguetak arriyiak ooitokini aatum taatua iyie. Nemeitokini aikata aaning ltoilo lo ltinka oidong'ichiereki taatua iyie.

²³ Meitoki aikata ltaa ailu taatua iyie. Nemeitokini aikata aaning loyemicho tanaa nayemi taatua iyie. Amu kore apa ltung'ana linono ooinyiang'icho nemiricho, naa keikutuaa apa aalang ltung'ana pooki le nkop, netopong'ori lochon le nkop pooki tankaraki nkurupore ino.

²⁴ Kore taatua ninye netumi lodo loo loibonok le Nkai o sinyat lenyena o lkulie tung'ana pooki oaataraki to nkop.>>