Mbolunoto 13 - Samburu

Etediaa ꞉ng'ues torno naing'uaa mpaso Nkai neiteme lolo ooiruko Nkai

¹ Nadol ng'ues torno eipung'u taatua mpaso. Kore inia ng'ues neata mowuarak tomon o nkuechi sapa o nkopiyiani kunini e nkitoo tomon too mowuarak, kore nenia kuechi enyena, meata nemetii nkarna nadekie Nkai.

² Kore inia ng'ues torno natoduaa, naa kenyunyukore lowuoru keri, neata lkardeta le lowuoru oji bea, netuwuana nkutuk ne lng'atuny. Neng'arie ꞉meu inia ng'ues torno ngolon enye o lorika lenye le nkitoo neitoki aicho nkitoria sapuk.

³ Kore nkue nabo e inia ng'ues, nelioo ajo keata ng'oldonyoti narumu ajo lbae torno, kake ketusupata taata. Neirukurukore ltung'ana pooki le nkop inia ng'ues torno eing'asia.

⁴ Nesai ꞉ninche pooki meu tankaraki naichoo ng'ues nkitoria. Nesai sii aitoki inia ng'ues ejo, <>

⁵ Neichori inia ng'ues torno ngolon metobolo nkutuk airo rereii le nkilacha nedek Nkai. Neichori aitoki metaasichere nkitoria taa lapatin 42.

⁶ Neiro inia ng'ues adek Nkai, nedek nkarna e Nkai, o nemanya Nkai o nemanya lolo pooki otii chumata.

⁷ Neichori metarare ltung'ana le Nkai nemir ninche. Neichori aitoki meitoria loreren o lochon pooki o ltung'ana loo nkutukie pooki o loo nkopi pooki.

⁸ Kore ltung'ana pooki oaamanya nkop nesai ninye, lolo leitu eigeri apa nkarn enche ewuon eitu eitamanyuni nkop to mbuku ee lolo oaata nkichui ee ntarasi, inia buku e Lkuo leker otaraki apa metua.

⁹ Kore naa ilo oata nkiyok, nchoo ening!

¹⁰ Kore tanaa keatae looibung'i aaya jila, nchoo ake eibung'i aaya jila. Naa tanaa keatae lori metua ta lalem, neri ake metua ta lalem. Naaku keyiere payie eng'iri ltung'ana le Nkai neaku looisiligai.

Etasapa ꞉ng'ues torno napukuta eing'uaa nkop ltung'ana pooki

¹¹ Naitoki adol nkae ng'ues torno, epukuta eing'uaa nkop neata mowuarak are ana lkuo leker, kake neiro ana meu.

¹² Neasichere nkitoria pooki e napa ng'ues ekue etii inia ng'ues inie. Neisimaki nkop pooki o lolo oaamanya nkop metasayia inia ng'ues torno naichiwua ng'oldonyoti e lbae torno apa oata.

¹³ Neas mbaa kutuaa naaing'asicho, eitodou nkima te nkeper e nkai aitodoki nkop edol pooki ng'ae.

¹⁴ Kore taa nana baa naaing'asicho naaichooki metaasa tekue inia ng'ues torno ekue, nesap ltung'ana pooki oaamanya nkop. Neitirrichaki meeitibira nkitanyanyukoto e inia ng'ues ekue, inia nataraki apa metua ta lalem neinyiaaka apiu.

¹⁵ Neichori ng'ues torno e are metukutaki siwuo le nkichui nkitanyanyukoto e inia ng'ues ekue payie etum airoro, neitanapicho metari metua pooki ng'ae leitu esai ninye.

¹⁶ Neitirrichaki aitoki ltung'ana pooki, pee era loaata ngolon tanaa loaachal, lparakuo tanaa laisinak, rrindiki tanaa lamara rrindiki, metipiki lminchire nkaik e tetene tanaa nkomomi.

¹⁷ Nemeatae hoo lobo ooidim ainyiang'icho tanaa atimiricho tenemeata ilo minchire tanaa nkarna e inia ng'ues ekue tanaa nampa e nkarna enye.

¹⁸ Keyiere taa niata ng'eno nagut ta ana bae. Nchoo pooki oaata ning'unoto eyielou kipirte e nampa e inia ng'ues, amu nampa e ltung'ani oje eitacheki. Kore inia ampa naa 666.