Mbolunoto 12 - Samburu

Larrabal oipirita ntomononi o Chitani

¹ Nelioi mbae kitok naing'asicho te nkeper e nkai. Nadol ntomononi naimulmulakino ndama ana nanka, neidachita lapa tee nkejek enyena, neunokino lakir 12 nkopiya enye e nkitoo.

² Kore inia tomononi naa keirochio, netaa kejing aji, neichirita oleng tankaraki mion e saisai.

³ Neliooi aitoki nkae bae naing'asicho e are te nkeper e nkai, naa ng'ura etii meu sapuk nanyiekie naata nkuechi sapa o mowuarak tomon o nkunini opiyiani sapa e nkitoo tee nkuechi enyena.

⁴ Neoroo lkidong'oi lenye orati nabo to uni ee lakir le nkeper e nkai neuroki nkop. Neitache inia meu tekue ntomononi nasaisai, ejo payie etum atama nkerai enye inia kata ake naiu.

⁵ Neiu inia tomononi layieni, ilo laa ninye olo aitore ltung'ana pooki le nkop te nkitoria nagol. Newuapari inia kerai aitung'aa meu, neyae neti Nkai o netii lorika lenye le nkitoo.

⁶ Neisig inia tomononi alo lkees, inie ng'oji neitibiraka ꞉Nkai ninye payie etum aing'ura too mperot 1,260.

⁷ Nepuku larrabal sapuk te chumata. Kore lmalaika oji Mikael o lmalaikani lenyena, nerare inia meu. Nenya meu larrabal tenebo o lmalaikani lenyena.

⁸ Kake nemiri inia meu, neaku eitu eichori ninye o lmalaikani lenyena metowuana te chumata.

⁹ Nenang'uni inia meu sapuk, ilo asurai le apa oji Lairirua anaa Chitani, oatasapa neitopong'oo ltung'ana le nkop pooki. Nenang'akini nkop tenebo o lmalaikani lenyena.

¹⁰ Naning ltoilo sapuk te chumata ejo, <

¹¹ Netimira ꞉ninche ninye to lodo lo Lkuo leker o te limunoto naipirita Yeso. Neitu abaki echamu nkichoni enche metaa keturia eri metuata.

¹² <>

¹³ Kore payie edol inia meu ajo etanang'akaki nkop, neijipaa naduo tomononi natiiwua layieni aitam sina.

¹⁴ Neichori inia tomononi nkaipupo are e lmagiro, payie etum achomo ta ai, inie ng'oji neitibirakaki te lkees. Kore te inie naa keing'ori taa larin okuni o nusu, nemeidim ilo asurai aitemio ninye.

¹⁵ Nenyok inia meu aitaya ntomononi nkare nang'oru aimunyie nkutuk enye.

¹⁶ Kake neretu ꞉nkop inia tomononi, nebolo ng'erem sapuk neijoo inia are pooki nang'uruta ꞉meu to nkutuk enye.

¹⁷ Negoro meu tankaraki inia tomononi, nelo aitai larrabal o nkulie kera e inia tomononi, naaning Nkitanapata e Nkai neata limunoto naipirita Yeso.

¹⁸ Neitache inia meu to sunyai le nchepata e mpaso.