Mbolunoto 1 - Samburu

¹ Ana eitoduaa ꞉Nkai Yeso Kristo, aicho meeiteyielo laisiaayiak o nkaisiaayiak enyena inia naa meata ajo measai ta nkata nataana. Neirruaaya ꞉Kristo lmalaika lenye, aiteyielo laisiaayiani lenye oji Yoana ilo kilikuai.

² Nelimu Yoana sipata e inia pooki natoduaa naipirita lomon ooing'uaa Nkai ootilika ꞉Yeso Kristo.

³ Emayiana ilo oisom kulo rereii ooigero tana buku e naibon e Nkai, nemayiana sii lolo ooning neibung, amu ketinyikua nkata.

Nkirorokino e Yoana nairruaaka nkanisani sapa

⁴ Naa nanu Yoana oigeroki ana nkanisani sapa naatii nkop e Asia: Metaa tenebo o ntae munyani o sotua oing'uaa Nkai, ilo otii taata, netii apake, nelotu kenya, neing'uaa sii ltauja sapa ootii tekue lorika lenye le nkitoo,

⁵ neing'uaa aitoki Yeso Kristo. Kore Yeso naa kelimu sipata enye, nera loisiligai, Nkerai e Nkai natipiwua aing'uaa lmeneng'a tekue nemeye aikata, naa ninye oitore lkinkii pooki le nkop. Ketachama ninye iyioo, nelaku iyioo too ng'ok ang to lodo lenye,

⁶ neitaa iyioo lorere o laitainok la lasar maisiaayia Nkai nara Papa lenye. Metaa nenye nkitoo o ngolon ntarasi o ntarasi! Aamin.

⁷ Ng'ura! Kelotu tee nkidisin, naa kedol ꞉nkong'u pooki ninye, abaki lolo apa ooteremo, naa keichir ltung'ana pooki le nkop tankaraki ninye. Ee keaku nejia!

⁸ Kejo Laitoriani Nkai, <>

Etoduaa ꞉Yoana Kristo otipiwua aing'uaa nemeneng'a

⁹ Kore apa nanu Yoana oara lalache linchi taatua Yeso naa katanapa sina oitamitae ntae, nara sii le nkitoria e Nkai tenebo o ntae, nikiting'iria tenebo. Kaawaki apa lkuran oji Patimos tankaraki rerei le Nkai o sipata e Yeso natilikoyie.

¹⁰ Kore ta mparri nabo e Jumapili, netuwuana kaidetidetita to ngolon e Ltau Sinyati, naning tesiedi nanu ltoilo otuwuana le mowuo.

¹¹ Nejo ilo toilo, <>

¹² Naiwuatuwuata aing'or ajo ng'ae laairorie. Kore payie aiwuatuwuata, nadol ntokitin sapa naaitibirunyieki saabu naaitacheyie lkilang'ilang'eta ooitibirunyieki saabu.

¹³ Kore te nkiji ee nenia tokitin sapa naaitacheyie lkilang'ilang'eta, nadol ltung'ani otuwuana Nkerai e Ltung'ani, oichopito nanka naado, nerretenita ntoki natuwuana nkeene e saabu to lgoo lenye.

¹⁴ Kore lpapit le nkue enye neibor ana kule, neilu nkonyek enyena ana nkima.

¹⁵ Kore nkejek enyena, neipilipil ana surutiai oimieki nkima metogolo, netuwauana ltoilo lenye ana nkukurrukurroto ee nkariak naaiurraur.

¹⁶ Neibung'uta ta nkaina enye e tetene lakir sapa, nepuku lalem opi mbat pukura are to nkutuk enye. Neilu nkomom enye ana ndama nailu oleng.

¹⁷ Kore payie adol ninye, nanang nkop tekue nkejek enyena ana ltung'ani otua. Neirriuu nkaina enye e tetene naaiseyie naajoki, <

¹⁸ ilo oichu. Katua apa naa ng'ura kaichu ntarasi o ntarasi! Naa kaata lboleta lo lkiye o nemeneng'a.

¹⁹ Ngero naa to mbuku, nenia tokitin pooki nidolita o ne taata o ntokitin naasai kenya.

²⁰ Kore naa mbae naisudoro naipirita lolo akir sapa litoduaa ta nkaina ai e tetene o nenia tokitin sapa naaitibirunyieki saabu neitacheyie lkilang'ilang'eta naa ana: Kore lolo akir sapa naa lmalaikani lee naaduo anisani sapa, naa kore nenia tokitin sapa naaitibirunyieki saabu neitacheyie lkilang'ilang'eta naa nenia anisani sapa.>>