Lpilipi 2 - Samburu

Nkitoo o mborron e Kristo

¹ Kore tanaa kitogolito tankaraki nikimbung'are Kristo, neitogolo ltauja lang ꞉nchaman enye, nikiata nchula e Ltau Sinyati, nikiata nanai e nkocheke o lng'ur too lkulie,

² enchoo naa metaa kaabore ng'ida ltau, iakuku loaata nduata nabo nichamama, niakuku nabo taa ltauja o taa mparrunot.

³ Emias hoo mbae eji amu iyieuu nintodolulu aajo irara le tipat too lkulie tanaa te nkilacha, kake kore to mborron enkena aajo kera lkulie le tipat aalang ntae.

⁴ Nchoo pooki ng'ae taa ntae metaa mara mbaa enyena ake eparraa, kake nchoo sii eparraa noo lkulikae.

⁵ Kore mparrunoto naichiaakino niatata naa inia apa naata Laitejeunoni Yeso:

⁶ Kore abaki era ninye Nkai, eitu eitaa inia nara Nkai toki,

⁷ kake ketapalayie nenia pooki naaichiaakino ninye, nechamaa aaku rrindik, payie eini ana ltung'ani naa kore payie elotu ninye to mpukunoto e ltung'ani,

⁸ neitodoyio koon nening Nkai ana metari metua, ilo kiye apa otua to lmusalaba.

⁹ Kore tankaraki inia, neiliepunyie Nkai ninye aitalang pooki ng'ae o pooki toki, neicho nkarna naaisul nkarn pooki,

¹⁰ paa kore ta nkarna e Yeso, negil kung pooki ng'ae o pooki toki te chumata o to nkop o te nemeneng'a.

¹¹ Naa keibalie pooki ng'ejep ajo Yeso Kristo Laitoriani, neichori Nkai Papa nkisisa teinia.

Iwong'ung'u ana lakir too ltung'ana le nkop

¹² Naaku taa sotuatin lainien, kore ana nining'ichocho chiaake, entonyok entabai njeunoto inchi ta nkanyit o to uriata e Nkai namara ake nkata nati nanu tenebo o ntae, kake abaki nkata namatii.

¹³ Amu Nkai naasicho taatua ntae aicho ntae yieuna o nkidimata payie eitabari inia nayieu ninye.

¹⁴ Entaas ntoki pooki miatata long'unyung'unyi o nchankar,

¹⁵ payie iakuku lemeata nakurrieki nemeata ntioto. Niakuku aitoki nkera naacho e Nkai taatua ltung'ana torrok ootopong'ori, iong'ung'u ana lakir tana kop,

¹⁶ tinimbung'bung aitibiraki rerei le nkichui. Naa keaku inia rrepet ai ta mparri e Kristo, tankaraki eitu eaku nyuata o nkinyinyiret ai ne pecheu.

¹⁷ Kore abaki tanaa keibukori lodo lai ana lasar tankaraki nayewua ntae atua nkurukoto, naaku kang'ida nang'ar inia ng'ida tenebo o ntae.

¹⁸ Kore sii ntae nejia enkuna enting'idata niking'arierie inia ng'ida.

Timoti o Epapiroditas

¹⁹ Kaisilig ajo kore taatua Laitoriani Yeso, kasioki airruaki ntae Timoti, payie etum ltau lai atogolo tananing lomon linchi.

²⁰ Maata likae tung'ani oata mbaa inchi taatua ltau lenye katukul ana ninye.

²¹ Kore lkulie tung'ana pooki naa mbaa enche ake enyok aayiaya, kake mara payie eas naayieu Yeso Kristo.

²² Kake itisiputua ntae maate ajo ketaasa aitibiraki siaai aitubulaa Lomon Supati tenebo o nanu ana neiko nkerai teneasicho o menye.

²³ Kore payie aaidip ateyielo naapukoki nanu tene, nasiooki airriu ninye nitii.

²⁴ Naa kaisilig nanu Laitoriani ajo kalotu sii nanu aisabaki ntae asioki.

²⁵ Ikirriwakita apa ꞉ntae lalache lai Epapiroditas, ilo oataasa siaai e Nkai tenebo o nanu nikitama larrabal tenebo kira sikarini le Kristo, naaku kaatereto tee nenia nayieu. Nadol ajo keichiaakino tanairruaki ntae

²⁶ amu keyieu nedol ntae oleng, nenyamal aitoki tankaraki itining'o aajo ketomoyia.

²⁷ Naa kedede ketomoyia apa metaa keyieu eye. Kake neduaaki ꞉Nkai lng'er, namara ake ninye apeny kake abaki nanu, amu kaatirichie ꞉Nkai payie maaponikino sina.

²⁸ Naaku kayieu katukul nairiu ninye nitii, payie itumtum aitoki aating'idata tinidoldol, namaitoki taa anyamalu oleng.

²⁹ Entang'amai naa te ng'ida sapuk ninchocho ltung'ana pooki ootuwuana ninye nkanyit.

³⁰ Amu kore tankaraki siaai e Kristo, ketipika koon nkue e larrabal ejo payie aaicho nanu reteto nimikindimdim ntae aaichoo.