Lkolosae 2 - Samburu

¹ Kayieu niyielouu newua nyuata nanyokita nanu tankaraki ntae o lolo otii Laodikea o lolo pooki leitu aikata aadol nanu.

² Kanyokita payie etumi aaitogolo ninche ltauja neibung'a tenebo te nchaman, netum ltung'ana sipata nadede naing'uaa ning'unoto nadede, neichori ning'unoto ee mbae e Nkai naisudoro, naa Kristo taa inia.

³ Amu te ninye eisudoyieki murdaicho pooki e kursaicho o ne ng'eno.

⁴ Najo kuna payie meata ltung'ani osap ntae tee rereii oomelok le sapare.

⁵ Kore abaki matii nanu tenebo o ntae te sesen, katii tenebo o ntae ta ltau, ang'ida tanadol ntae intachoo to nkurukoto nadupa taatua Kristo.

Ketalakua iyioo Kristo tee nkitanapat ee ltung'ana

⁶ Kore itang'amaitie Kristo Yeso aajo ninye Laitoriani, entewueni naa taatua ninye,

⁷ ninchocho metaa ninye nkitamanyunoto naunie neitubulunyie ntae Nkai. Entacho taatua nkurukoto ang, ana naiteng'enaki ntae nimipalpal inchocho Nkai nache.

⁸ Entodol payie meatae ake ltung'ani oitaa ntae ltung'ana ooteenikaki nkiteng'ena e pecheu e sapare. Kore inia naa lkerreti loo ltung'ana eirukurukore ooirichakino nkitanapat e ana kop, namara Kristo.

⁹ Amu kemanya Nkai atua ninye katukul apa era ninye ltung'ani oata sesen,

¹⁰ nirara ntae lootumo nkichon nabore taatua ninye. Ninye lkitok oitore nkitiorian o ngolon pooki.

¹¹ Taatua ninye sii etumurataki ntae. Ketaase ana payie eburkuchuni mpukunoto inchi torno, namara to muratare namuratichoe taa nkaik, kake to muratare e Kristo.

¹² Kore ana muratare naa ketaase apa payie eipatisi ntae, nenukari ntae inia kata o ninye te nkipatisa, neitipiuni aitoki ntae o ninye aimu nkurukoto te inia golon e Nkai naitipiwua ninye too lootuata.

¹³ Kore abaki ituata tankaraki ng'ok inchi, neitu emurati mpukunoto inchi torno e tung'ani, eitaa ntae Nkai looichu tenebo o ninye, etapalikaki ntae ng'ok inchi.

¹⁴ Namara ketujuto ake apeny sile ee ng'ok ang, kake keitarruoyie mpalai naigerore nkitarruorruot ang nikiata tankaraki ee mbaa kumo naayiere nikintabaya neitu kintabaya. Kore apa inia palai naa mang'antita ang, newa ꞉Nkai neche to lmusalaba.

¹⁵ Netigilgila ninye ngolon o nkitoria pooki e naimin edolita pooki ng'ae, amir pooki to lkiye lenye o te mpiunoto enye.

¹⁶ Naaku naa emincho ltung'ani Eiguanare ntae to ntoki ninyanya o nimatmat, tanaa taa ntasimi ee Lyiaudi naanyae ta lari o naanyae ta arre e lapa anaa ta mparri e Sabato.

¹⁷ Kore kuna naa loip ake le inia apa nalotuta, kake kore sipata e inia naa Kristo.

¹⁸ Emincho hoo ltung'ani ojo keitodoyio koon nesai lmalaikani edung'oki ntae nkiguana. Kore ltung'ani laijo ilo naa mbaa naadol ake eitirrichaki, neiliepunyie koon pecheu tankaraki ee mparrunot e tung'anicho.

¹⁹ Nemeibung'are ꞉ninye Kristo, laa ninye nkue naa te ninye ebulu sesen pooki ana naitubulu Nkai. Keitubulu ilo sesen eramat neruburub too mpit o too marloochi.

^20-21 Amaa, mara ituata apa tenebo o Kristo aaing'uaa nkitanapat ena kop? Oo naa payie intokiki aapik ate taabori nkitanapat naajo, <>, <>, <>, eji atuwuana ewuon ake irara le nkop?

²² Kore kuna tokitin pooki naa keichunye ake teneidipi aatam, naa mbaa ake nenia e lkerreti o nkiteng'ena ee ltung'ana.

²³ Kore kuna kitanapat naa inji ake etuwuana ana ng'eno, kake meiririkino nkanyit, keti ake aaitabaya inia nayieu ltung'ani. Kore inia naa nkoitiei ake nadol ltung'ana maate aajo keisupat, ejo eji nejia eikoni teneurieini Nkai, tenewuon eitodoyio koon, neiteme sesen.