Lkolosae 1 - Samburu

¹ Kore ana palai naa keing'uaa Paulo, oara Lkipaaret le Yeso, ilo Aitejeunoni oanyutae apa tankaraki nayieu Nkai payie eaku, neing'uaa sii Timoti, lalache lang.

² Ikiroroki lalachera o nkanachera ang sinyat naaisiligai taatua Kristo ootii lkerenket le Kolosae. Metaa ninchi munyani o seriani naingua Nkai Papa lang.

Nkomono o nkichoroto e nache

³ Kore chiaake tinikiomonoki ntae, nikincho Nkai nara Papa la Laitoriani lang Yeso Kristo nache,

⁴ amu ikitining'o aajo itipika nkurukoto inchi atua Laitejeunoni Yeso, nikitining'o sii newua nchaman niatata too sinyat pooki le Nkai.

⁵ Kore ana, naa tankaraki inia nisiligitata metaa ninchi, neisudokaki ntae te chumata, ana nindipa aatining too Lomon Supati oodede.

⁶ Kore kulo Omon Supati netabakita ntae. Naa kore ana neiuta lng'anayio nebularita to nkop pooki, nejia sii ake etiu taatua ntae. Nejia apake etiu ang'asu mparri ekue nitining'o, nining'ung'u katukul naipirita munyani e Nkai nedede.

⁷ Niteyieloutua nenia baa aimu Epaparas, ilo likiasicho tenebo nikicham, nera laisiaayiani oisiligai oisiaai Kristo ta mpaach ang,

⁸ netilika ninye iyioo nchaman inchi naichoo ntae Ltau Sinyati.

⁹ Naa tankaraki inia paa kore ang'asu mparri nikining lomon linchi, eitu kipal mikiomonoki ntae, nikinchiraki Nkai payie eiteyielo ntae katukul yieuna enye, te ng'eno o te ning'unoto pooki naicho ntae Ltau lenye,

¹⁰ nitumtum aatewueni taatua nkichon naichiaakino ta Laitoriani payie inting'idng'id ninye taa mbaa pooki, iuu lng'anayio loo asat pooki supati, nibululu aayielou Nkai oleng.

^11-12 Neitogol ntae Nkai to ngolon pooki ana te nkidimata enye e nking'asia, payie itumtum aating'iri taa mbaa pooki. Naa kore te ng'ida ninchocho Papa nache, oitaa ntae looichiaakino netum inia naitayia Nkai lekutuk ajo keicho ntae tenebo o sinyat lenyena oowueni taatua wong'an.

¹³ Netalakua iyioo aitung'aa nkitoria e naimin nepik iyioo atua nkitoria e Nkerai enye nacham,

¹⁴ laa kore aimu ninye, nelak Papa inia nairirikino alakunyie iyioo, naa kore inia lakunoto nikiata naa mpalakino ee ng'ok.

Kristo o siaai enye

¹⁵ Kore Nkerai e Nkai naa nkitanyanyukoto nalioo e Nkai nemelioo, ilo oing'uaa Nkai ewuon apake eitu eitibiri nkop naa ninye oitore ntoki pooki naitibiraki.

¹⁶ Amu te ninye eitibiraki ntokitin pooki, natii chumata o natii nkop, nalioo o nemelioo, pee era lolo ooitoricho anaa nkitoria anaa lkulie aitoriak anaa nkitoo. Kore ntokitin pooki, naa te ninye eitibiraki naa ninye eitibirakaki.

¹⁷ Netii apake ninye ewuon meatae nkulie tokitin pooki, naa aimu ake ninye eaku ketii ntokitin pooki.

¹⁸ Ninye nkue e sesen, aa taa nkanisa, naa ninye ng'asunoto, Nkerai e Nkai natipiwua aing'uaa lmeneng'a tekue nemeye aikata, peaku ninye oituruk to ntoki pooki,

¹⁹ amu ketachamayie Nkai ajo kemany atua ninye katukul.

²⁰ Neitemelet koon o ntokitin pooki naatii nkop o naatii chumata, eyewua sotua aimu lodo le Nkerai enye oibukori to lmusalaba.

²¹ Kore abaki ntae oaara apa ltung'ana oaalamita Nkai nirara lmang'ati lenyena tankaraki ltauja linchi ana naitodolu asat nchi torrok,

²² naa eyewua Nkai taata melet terichet ntae o koon aimu lkiye le Nkerai enye natua to nkop payie etum aitaa ntae sinyat, ltung'ana lemeata ntioto nemeata nakurrieki tekue ninye.

²³ Keasai inia tanaa intachoo ake taatua nkurukoto ang aaitirrichaki, nimingusgus, nimiwuangwuang aaing'uaa siligi oicho ntae lolo Omon Supati litining'o. Kore lolo Omon Supati naa ketilikoyieki apa aaliki ltung'ana pooki otii nkop, naa kore nanu Paulo nataa laisiaayiani loo lolo Omon Supati.

Siaai e Paulo ta nkanisa

²⁴ Kang'ida taata tee sinaitin laanyaita tankaraki natilika ntae Lomon Supati o sinaitin lewuon eng'or paatum laatiaka apa Kristo meata ajo maimaa tankaraki reteto natum sesen lenye, aa taa nkanisa, naa inia ake aitabarita.

²⁵ Kataa nanu laisiaayiani le nkanisa. Naa kore naikuna paaku naa Nkai naichoo siaai maiteyielo ntae rerei lenye katukul.

²⁶ Kore inia naa mbae e Nkai naisudoyie taa ng'amat o too ntowuon e apa, kake kore taata keibalakinyieki taata sinyat lenyena.

²⁷ Keyieu apa Nkai payie aibalunyie newua inia kisudoroto enye e nking'asia too ltung'ana loo loreren, kore inia kisudoroto naa nchere kore Kristo oamanya atua ltauja linchi naa ninye siligi linchi le nkitoo nalotu.

²⁸ Ninye kilikoo, kintaarriyian nikinteng'en ltung'ani pooki te ng'eno pooki payie kintaa ltung'ani pooki metaa ltung'ani lemeata ntioto tekue Nkai taatua Kristo.

²⁹ Naa kore payie etum inia atabai, kanyokita oleng to ngolon enye naasicho taatua nanu.