Lgalatia 5 - Samburu

¹ Naa ketalakua iyioo Kristo payie kibik taatua inia lakunoto. Kore tankaraki inia, entacho katukul, emirrinyokino aitoki enet e rrindikicho.

Mara muratare naata tipat, kake lakunoto taatua Kristo

² Entining najoki nanu ntae Paulo! Tininchocho metumurati ntae eji payie eikenakini ntae sipat tekue Nkai, naaku meitoki Kristo aata tipat taa ntae.

³ Kaliki aitoki pooki ng'ae oicho koon metumurati, nchere meata ajo meibung nkitanapat pooki e Musa.

⁴ Etoorieki ntae Kristo, ntae oonyok aayiaya meikenakini sipat to nkoitiei ee nkitanapat. Iterriate, nilamlam munyani e Nkai.

⁵ Amu ta Ltau o to nkoitiei e nkurukoto, kianyu iyioo ilo siligi oitabari aajo, keikenaki iyioo Nkai sipat.

⁶ Amu kore tanaa ira le Kristo Yeso, meata tipat kitumurataki anaa eitu. Kore ntoki naata tipat naa inia kurukoto nikindimie tachama lkulie.

⁷ Ipuoitoto apa aaitibiraki to nkoitiei e nkurukoto, ng'ae oibooyie ntae payie mianyitnyit ndedei?

⁸ Mara ilo oipoto ntae otelejaka ntae inia.

⁹ Keisiichieyie nkini mukate naisiicho mukate pooki, nejia sii eiko nkini sapare teneitopong'oo ltung'ana kumo.

¹⁰ Kake kaata sipata taa ntae, taatua Laitoriani nchere, mitumtum nkae duata mara ake nduata ai. Kake kore ilo oitanyamal ntae naa ketum nkiguana enye, nemenya ajo ng'ae.

¹¹ Lalachera, amaa, tanaa ewuon alikorita apa mbaa e muratare payie aaikenakini sipat, aanyo naa pee ewuon aaitamitae sina? Kore tanaa kalikorita ana, anata merokure era lmusalaba nkubooroto.

¹² Keyiere duo naa kore lolo oitanyamal ntae, nepuo aagelem ate.

Nkichon ng'ejuk taatua Ltau Sinyati

¹³ Lalachera lainien, keipotokaki ntae lakunoto, kake emincho ake lakunoto inchi eaku nkoitiei niasiesie nayieu mpukunoto inchi torno. Esiaayiata ntae maate to nkoitiei e nchaman.

¹⁴ Amu keitabayieki nkitanapat pooki te rerei obo ake, <>

¹⁵ Tinionyanya, nirara maate, entodol naa emindakie ate.

¹⁶ Kake kajoki ntae, enchom erikoo ntae Ltau Sinyati, naa mintabayaya kenyaake nayieu mpukunoto inchi torno.

¹⁷ Amu kore nayieu mpukunoto ang torno, nera o yieunot e Ltau Sinyati. Naa keibooro kuna, payie miasias nenia niyieuu.

¹⁸ Kake tenerikoo ntae Ltau Sinyati, nimitii taabori nkitoria ee nkitanapat.

¹⁹ Keibala asat e mpukunoto torno e ltung'ani aa kuna, loloito o ntolo o asat e anyit,

²⁰ o sayiata ee nkaitok e sapare o nkurupore o mang'antiticho o nchankar o lom o ngoro o nchaman e koon o oro taatua lturrur o oro ee lturrurri

²¹ o nkiba tankaraki naata likae ntoki o merai o lubo o mbaa nainyinyukore nenia. Kajoki ntae, ana apake natiaka ntae tekue, nchere kore lolo oaas nenia baa naa mejung mayian e nkitoria e Nkai.

²² Kake kore lng'anayioi la Ltau Sinyati naa nchaman o ng'ida o seriani o ng'iriata o nanai e nkocheke o supaticho o ltau oisiligai

²³ o mborron o nkubooroto e koon. Meatae nkitanapata naibooyo kuna.

²⁴ Kore lolo oaara le Kristo Yeso, etecho mpukunoto enche torno tenebo o yieunot o ng'uarrat enyena.

²⁵ Tanaa ikitii atua nkichon ng'ejuk e Ltau Sinyati, mairukurukore naa Ltau Sinyati.

²⁶ Maichoo metaa mikirrep ate, nimiking'elakino anaa kulomo maate.