Lgalatia 3 - Samburu

Nkurukoto tana nkitanapat?

¹ Lagalatia kulo oaamada, ng'ae oirupo ntae? Mara tekue nkonyek inchi eibalunyeki nchere Yeso Kristo etechoki?

² Entilikaaki ana toki nabo, amaa, itang'amaitie Ltau Sinyati tankaraki intabaitie nkitanapat ana tankaraki itining'o Lomon Supati nimbung'bung to nkurukoto?

³ Oo ntae, imadada chiaake nabanyi? Itang'asutua apa lototo inchi taatua Kristo ta Ltau. Aanyo taata payie inyokitata aaidip to nyuata inchi?

⁴ Keitamaki apa ntae sina kitok owuenyi pecheu? Majo nanu pecheu.

⁵ Amaa ꞉ilo oicho ntae Ltau neas mbaa e nking'asia taatua ntae, keas nenia tankaraki nimbung'utata nkitanapat ana tankaraki iruko ilo rerei litining'o?

⁶ Eng'ura Abraam, <>

⁷ Naa iyielolo naa aajo, ltung'ana le nkurukoto oara nkera e Abraam.

⁸ Keibonutua apa Lkigerot aajo keiken ꞉Nkai loreren ajo loosipat teneiruk ninye, neliki ꞉lolo kigerot Lomon Supati Abraam tekue ejo, <>

⁹ Naa inia paa kore lolo oaara le nkurukoto, nemayiani tenebo o Abraam oata nkurukoto.

¹⁰ Amu kore lolo pooki oisilig asat ee nkitanapat, ketii taabori ldeket, amu keigero ajo, <>

¹¹ Keibala nchere meatae ltung'ani oikenakini sipat tekue Nkai tankaraki nairukurukore nkitanapat. Amu kejo Lkigerot, <>

¹² Mara nkurukoto nkitamanyunoto ee nkitanapat, kake nkubung'ata ana nejo Lkigerot, <>

¹³ Naa Kristo oinyiang'uaa iyioo to ldeket loo nkitanapat, netaa ninye ldeket tankaraki iyioo, amu keigero too Lkigerot ajo, <>

¹⁴ Kore taatua Laitejeunoni Yeso, nebaki mayian e Abraam lochon pooki, payie kitum aatang'amai lekutuk la Ltau to nkoitiei e nkurukoto.

Meibelekeny ꞉nkitanapat lekutuk

¹⁵ Lalachera lainien, kaicho ntae nkitanyanyukoto ee ltung'ana. Kore nkitujung'o naidipaki aimie, naa meatae hooyia ltung'ani oidim aibelekenya tanaa atoponu.

¹⁶ Kore Abraam o inoti lenye, naa keitaka ꞉Nkai lekutuk, amu mejo Lkigerot, <> autu ajo ltung'ana kumo, kake kejo, <> autu ajo ltung'ani obo, aa ninye Kristo.

¹⁷ Kore najoito naa ana, keitayia apake Nkai lning'o. Nemeidim nkitanapat naaotuo tesiedi larin ip ong'uan o osom aaibelekenya ilo ning'o, aitaa lekutuk le pecheu.

¹⁸ Kore tanaa nkitanapat eing'uaa njung'ore e njeunoto, neaku meing'uaa lekutuk. Kake te munyani eichoo ꞉Nkai Abraam lekutuk e inia mayian pecheu.

¹⁹ Ne nyo naa nkitanapat? Ketoponuaki tankaraki ntorrok, ana meeu ilo inoti oichorunyieki apa lekutuk. Keichoo apa ꞉Nkai ltung'ana nkitanapat aimaa lmalaikani to nkoitiei e laitutumoni.

²⁰ Kore laitutumoni naa mejing'aa mbata nabo, kake kore Nkai naa keitache apeny.

²¹ Amaa, keibooyo ꞉nkitanapat lekutukie le Nkai? Meibooyo katukul! Amu tanaa keichoruaki apa nkitanapat naaidim aaichoru nkichui, anata duo eikenakaki ltung'ana sipat tankaraki naibung'a nkitanapat.

²² Kake kore Lkigerot naa keteena nkop pooki apik taabori nkitoria ee ng'ok, payie eichori lolo oata nkurukoto ilo lekutuk to nkurukoto e Yeso Kristo.

²³ Kake kore ewuon eitu elotu ana kurukoto, ketipikaki apa iyioo taabori nkitanapat, neteenaki iyioo ana meeu ana kurukoto naibalunyieki kenya.

²⁴ Kore tankaraki inia, keaku ꞉nkitanapat lairritani lang ana meeu Kristo, payie etumi aikenaki iyioo sipat to nkurukoto.

²⁵ Kake eyewuo taata nkurukoto, merokure kitii taabori lairritani.

Mirara rrindiki kake nkera e Nkai irara

²⁶ Irara taata pooki nkera e Nkai to nkurukoto taatua Laitejeunoni Yeso.

²⁷ Amu kore ntae pooki ooipatisakaki Kristo, naa inchopo Kristo.

²⁸ Kore taatua Laitejeunoni Yeso, irara ntae pooki ntoki nabo, meatae ajo Lyiaudii ira anaa ltung'ani loo loreren, rrindik anaa ilo lamara rrindik, lee anaa ng'oriei.

²⁹ Naa tanaa irara ntae le Kristo, irara sii nkera e Abraam, nirara lajung'ok ana nejo lekutuk.