Lgalatia 1 - Samburu

¹ Nanu Paulo Lkipaaret le Yeso oigero ana palai, namara ltung'ana laaitaa anaa ltung'ani aimua, kake kaimua Yeso Kristo o Nkai Papa, ilo oitipiwua ninye too lootuata.

² Kore nanu o lalachera pooki laatii tenebo, ikiroroki nkanisani ee Lgalatia,

³ meichoo ntae Nkai Papa o Laitoriani Yeso Kristo munyani o sotua.

⁴ Ilo laa ninye oichorua koon tankaraki ng'ok ang, pee etum atalaku iyioo taa mbaa torrok e ana kop, ana yieunoto e Nkai Papa lang.

⁵ Naa metaa nenye nkisisa ntarasi o ntarasi. Aamin.

Inining'ito nkiteng'ena torno

⁶ Kaing'asia nanu tankaraki isiokiki aaing'uaa ilo oipoto ntae entewueni taatua munyani e Kristo, nimbelekenyakinono lkulie omon lamara Lomon Supati.

⁷ Amu meatae lkulie omon supati, kake keitanyamalita ntae lkulie tung'ana, neyieu neibelekeny Lomon Supati le Kristo.

⁸ Kake kore abaki tanaa iyioo anaa lmalaika oliki ntae lomon supati oaapaachere likitilikita ntae, naa nchoo etum ldeket le Nkai.

⁹ Kore ana nikitejo apa, naa kaitoki aigil ajo, tanaa keliki ntae ltung'ani rerei opaachere apa litang'amaitie, nchoo metaa keaku lodiaa.

¹⁰ Amaa taata, rrepeta ayieita too ltung'ana, ana ta Nkai? Ana ltung'ana anyokita aiting'id? Tanaa apa ltung'ana ewuon aiting'idita, anata duo mara laisiaayiani le Kristo.

Neikuna Paulo payie etum nkitoo naakunyie Lkipaaret

¹¹ Naa kayieu niyielouu lalachera lainien aajo, kore rerei latilikoyie naa mara rerei ooidim ltung'ani aitai.

¹² Neitu ang'amaa to ltung'ani, neitu sii aaiteng'eni, kake Yeso Kristo laatoboloka.

¹³ Amu itining'o ntae lwuenet lai le apa taatua lkerreti le nkurukoto ee Lyiaudi, ana naikuna payie aitam oleng sina nkanisa e Nkai, nanyok aidakie.

¹⁴ Nalo kue taatua nkurukoto ee Lyiaudi alang risere ai pooki, naibung lkuak loo lmakui alang ninche.

¹⁵ Kake Nkai naategelua ewuon atii nkocheke e yieyio lai, naaipot te munyani enye, nechamaa

¹⁶ payie aaboloki mateyielo Nkerai enye, paatum atiliki loreren Lomon Supati lenyena. Kore inia kata, neitu ayiaya nkitaarriyiana nabokata to ltung'ani,

¹⁷ neitu sii ailiep alo Yerusalem netii lolo oaataa apa Lkipaareta tekue nanu, kake kachomo lkees le Arebia, naitoki arrinyunyie alo Damasikas.

¹⁸ Kore aitoki pee eich larin okuni, nailiep alo Yerusalem payie atum aiparichiere Kepa, nawuon to ng'oji enye mperot tomon o imiet.

¹⁹ Kake meata lkulie Kipaareta latodua mara ake Yakobo lalache Laitoriani.

²⁰ Naa kore kuna naigerokita ntae, kajoki ntae tekue Nkai nchere mara sapare.

²¹ Kore aitoki tesiedi, nalo mbata e Siria o Kilikia.

²² Kake kore nkanisani e Kristo natii Yudea, naa maayielo nanu to nkomom.

²³ Naa kening'ito ake eji, <>

²⁴ Neisis ꞉ninche Nkai tankaraki mbaa naaitaasa.