Lburania 9 - Samburu

Lasar lo lning'o musana o lo lning'o ng'ejuk

¹ Kore apa lning'o lekue naa keata nkitanapat naaitodolu neikoni tenesaii Nkai o ne ng'oji neomonieki Nkai to nkop.

² Kore apa inia aji e Nkai naa keata lgilat oare. Kore lgilata lekue naa keji Ng'oji Sinyati, inie neti ng'oji e lkilang'ilang'et o misa o mukateni naaitayiaki aaicho Nkai naapiki nkeper e inia misa.

³ Kore teidialo nanka naor kulo gilat, netii lgilata oji Ng'oji Sinyati aisul pooki.

⁴ Inie etii lperere la lasar le saabu opejieki ntokitin naarropil o sanduku lo lning'o le Nkai oimulumularita ꞉saabu. Kore atua ilo sanduku netii moti e ndaa naing'uaa chumata naji mana, o sobua e Aron natubulakita ntilita, o soito oare dapachi lo lning'o.

⁵ Kore te keper ilo sanduku lo lning'o, netii ntokitin naaji lkerubi le nkitoo e Nkai, neisiapita taa nkaipupo inie ng'oji nepalikinyieki apa ltung'ana ng'ok. Kake mikindim aaimaki kuna baa to nguton taata.

⁶ Kore eidipaki ntoki pooki ana nayiere ta nkaji e Nkai, nejing laitainok la lasar lgilata lekue nkata pooki aas siaai lenche ana nayieunyieki,

⁷ kake laitainoni kitok la lasar ake apeny ojing nkata nabo ta lari atua ilo gilata le oare oji Ng'oji Sinyati aisul pooki. Nemejing meata lodo oibukoo aomonu mpalikinoto ee ng'ok enyena o naataasa ltung'ana eitu ebaraki.

⁸ Keitodolu Ltau Sinyati tene ajo, kore inie nejing'ieki Ng'oji Sinyati aisul pooki naa ewuon eitu ebolo ewuon ake eatae napa aji e Nkai musana.

⁹ Kore kuna pooki naa nkitanyanyukot naautu tana ng'amata aajo kore nkichoorot o lasarri naa meidim aaitibira ltung'ani oasai Nkai metining'o ajo meata nakurrieki.

¹⁰ Kore nenia tokitin, neipirita ake ndaki naanyae o ntokitin naaichiaakino nemati o nkulie tasimi naanyae aaitibirichiere, naa keti ake ana metabau nkata naiteng'ejuk Nkai ntokitin.

Kristo lasar ocho

¹¹ Kake keidipa Kristo ayeu ana laitainoni la lasar loo ntokitin supati naaotuo. Netijing'a ninye nkaji e Nkai alo atua Ng'oji sinyati naaisul pooki. Kore inia aji naisiaaichere ninye, naa keisupat oleng neitu eitibir nkaik ee ltung'ana, amu mera nkaji ena kop.

¹² Namara lodo loo lkineji o laa lachau etijing'ie inie Ng'oji Sinyati aisul pooki, kake lodo lenye koon etijing'ie nkata nabo ake aitai lasar, nelaku iyioo ntarasi.

¹³ Amu amaa tanaa keisuaaki laitainok la lasar ltung'ana oaataasa ng'ok lodo loo lkineji o laa laing'ok, neisuaaki nkuron e lasar le ntawuo natepejoki, neitisiny metaa merokure etolo,

¹⁴ kebaa sa eitisiny iyioo lodo le Kristo aoru iyioo asat naayau lkiye payie kitum aaisiaayia Nkai naichu? Kore ta Ltau Sinyati laa ntarasi, neitai ninye koon aaku lasar lemeata ntioto ta Nkai.

¹⁵ Naaku tankaraki ana payie era Kristo laitutumoni lo lning'o ng'ejuk, paa kore lolo ooipotoki netum inia naitayia apa Nkai lekutuk ajo keicho ninche metaa nenche ntarasi. Amu ketua ninye payie etum atalaku ninche too ng'ok naataasa etii apa atua lning'o musana.

¹⁶ Kore lning'o ng'ejuk naa inji etuwuana mpalai naigerore mbaa naaitodolu njung'ore, naaku keichiaakino payie esipuni aajo kedede ketua ilo tung'ani ojung'i.

¹⁷ Kore mpalai naigerore mbaa naaitodolu njung'ore naa meata siaai ewuon eichu ltung'ani oigero. Teneper ake ilo oigero etum inia palai siaai.

¹⁸ Naa tankaraki inia payie measicho apa lning'o lekue, teneitu eibukori lodo.

¹⁹ Amu kore apa payie eidip ꞉Musa atiliki ltung'ana pooki nkitanapat e Nkai, nerrapu lodo laa lachau o lo lkine oituchulakino nkare, neisuaaki mbuku ee nkitanapat e Nkai o ltung'ana pooki too lpapit le nker oonyokuo o tee mbene e lcheni oji aisop

²⁰ nejoki, <>

²¹ Neitoki ake aitoki aisuaaki lodo inia aji e Nkai o masaa pooki naasichiere laitainok la lasar te inia aji e Nkai.

²² Kore apa tee nkitanapat e Nkai, nkuni tokitin ake meitisinyi to lodo, naa kore eitu eibukori lodo naa meatae mpalikinoto ee ng'ok.

²³ Naaku keichiaakino naa paa kore nenia tokitin naara ake nkitanyanyukot ee ntokitin e chumata neitisinyi te inia oitiei, kake kore ntokitin e chumata, neitisinyi ninche ta lasar le tipat oleng alang ele.

²⁴ Amu eitu ejing Kristo Ng'oji Sinyati aisul pooki naitibira nkaik ee ltung'ana, inia nara ake nkitanyanyukoto e inia nadede, kake ketijing'a ninye chumata, payie etum taata achomo tekue Nkai eliki ninye mbaa ang.

²⁵ Neitu ejing ninye chumata aitai koon aaku lasar nkatitin kumo, ana apa neiko laitainoni la lasar lemeata lari lemejing atua inie Ng'oji Sinyati aisul pooki eata lodo lamara lodo lenye.

²⁶ Amu tanaa ketaasa apa inia, anata naa eye nkatitin kumo, ang'asu apake payie eitibir Nkai nkop. Kake keyewuo ninye nkata nabo ake taata kitii ng'amata e nkiting'oto e nkop, neicharu koon aaku lasar oichu ng'ok te lkiye lenye.

²⁷ Naa kore ana nemeata ajo meye ltung'ani nkata nabo ake, nedung'okini nkiguana e lkiye tesiedi inia,

²⁸ keitaaki sii Kristo lasar nkata nabo ake payie etum aawa ng'ok ee ltung'ana pooki. Kelotu aitoki nkata e are, namara payie eya ng'ok kake payie eitejeu lolo oaanyuta ninye.