Lburania 8 - Samburu

Lning'o ng'ejuk

¹ Kore mbae e tipat ee kuna nikijeito naa ana: Ikiata laitainoni kitok la lasar otowuana te chumata te tetene e lorika le nkitoo e Nkai naaisul pooki.

² Kera ninye laitainoni la lasar oisiaaicho to Ng'oji sinyati naaisul ta nkaji nadede e Nkai, inia naa Laitoriani oitibira mara ltung'ani.

³ Amu kore laitainoni kitok pooki la lasar naa ketegeluaki payie eichooyo nkichoorot o lasarri, naaku keyiere sii paa kore Kristo neata ntoki naichooyo.

⁴ Kore duo tanaa keti ninye ana kop naa meaku laitainoni la lasar, amu keatae laitainok la lasar ooichooyo nkichoorot ana nayieu nkitanapat e Nkai.

⁵ Ketuwuana nkisiaayiare enche tene to nkop ana nkitanyanyukoto, nera ntoki nalio e nkisiayiare nadede e chumata. Amu kore apa payie eaku kechet Musa nkaji e Nkai, neitaarriyian ꞉Nkai ajoki, <>

⁶ Kake kore Kristo naa keata nkisiaayiare nalang naata apa laitainok la lasar, ana nalang ꞉ilo ning'o oara ninye laitutumoni, ilo ning'o musana tankaraki keirichakino lekutukie supati oaalang lo lning'o musana.

⁷ Kore tanaa meitoki apa nang'oriki ilo ning'o lekue anata meatae tipat nayeunyieki likae ning'o.

⁸ Amu ketoduaa Nkai ajo keitarroitie ltung'ana nejo, <

⁹ Nemetuwuana ilo ning'o ana ilo apa laitibira o lmakui lenche, inia kata apa payie aibung ninche ta nkaina ai narik aitung'aa Misiri. Neitu apa eaku loosiligai te ilo ning'o lai, naiwuatuwuata taa nanu aing'uaa ninche.

¹⁰ Amu inji ejo Laitoriani, Ele lning'o laitibir o lmarei le Isirael te inia kata kenya: Kapik nkitanapat ainien atua mparrunot enche, naiger taatua ltauja lenche, naaku nanu Nkai enche, neaku ninche ltung'ana lainien.

¹¹ Nemeatae loitoki aiteng'en le latia enye tanaa lalache lenye ajoki, amu kaayielou ninche pooki, ang'asu lkini ana metabaki lkitok.

¹² Amu kapaliki ntorrok enche, namaigil aikata aparru ng'ok enche.>>

¹³ Kore tenejo Nkai lning'o <>, naa keikena ilo lekue ajo keimusana, naa kore ntoki natumusana, nemerokure eata tipat naa ketaa keichunye.