Lburania 7 - Samburu

Laitainoni kitok la lasar oara sii lkinkii le Salem

¹ Kore ilo Melkisedek, naa lkinkii lo lkerenket le Salem nera laitainoni la lasar le Nkai naisul pooki. Kore apa payie echukunyie Abraam eing'uaa larrabal otumutie lkinkii, nenang'are ꞉Melkisedek nemayian.

² Neicho ꞉Abraam ninye motua e tomon e ntoki pooki natarua. Naa kore kipirte e nkarna naji Melkisedek naa <> Kera sii apa lkinkii lo lkerenket le Salem, naa kore kipirte enye naa <>

³ Meata menye tanaa ng'otonye tanaa lmakui lenyena, nemeata ng'asunoto anaa nkiting'oto e nkichui enye. Kewuon ninye era laitainoni la lasar ntarasi, netuwuana Nkerai e Nkai.

⁴ Ng'ura ja newua apa Melkisedek! Keichoo sii akuyia lang ꞉Abraam motua e tomon ee ntokitin e tipat naatarua te njore.

⁵ Kore abaki apa lolo ayiok le Lawi ooichooki metaa ninche eing'uaa laitainok la lasar, naa keitanapaki tee nkitanapat e Nkai meewaita motua e tomon too ltung'ana. Keya apa motua e tomon taa lalachera lenche le Isirael, abaki era pooki le ichoi e Abraam.

⁶ Kake kore Melkisedek naa mera apa ninye le ntalipa e Lawi, netang'amayie ake eyia motua e tomon naichoo ꞉Abraam, nemayian ꞉ninye Abraam oata lekutuk le Nkai.

⁷ Kore metii kerkei, ltung'ani kitok oamayian lkini.

⁸ Kore naduo bae ekue, neipirita laitainok la lasar oaang'amaa motua e tomon naa ltung'ana ake ooye ninche, kake kore naijipu inia neipirita ilo oatae sipata aajo keichu ntarasi.

⁹ Ikindim duaake aatejo, kore ichoi e Lawi laa ninche apa oaang'amaa motua e tomon, naa ketalaa motua e tomon inia kata apa payie elak Abraam.

¹⁰ Amu kore payie etum ꞉Melkisedek Abraam naa ketii apake Lawi atua sesen le Abraam.

Ketuwuana ꞉Yeso Melkisedek

¹¹ Kore abaki ejo nkitanapat e Musa nchere meata ajo mara ake ichoi e Lawi eing'uaa laitainok la lasar, meidim lolo aitainok la lasar aitaa ltung'ani metaa ltung'ani lemeata ntioto. Naaku keyiere payie eatae laitainoni kitok la lasar otuwuana Melkisedek, alang ilo oara le ntalipa e Aron.

¹² Amu teneibelekenyi neiko laitainoni la lasar teneitai lasar, keyiere sii neibelekenyi nkitanapat.

¹³ Naa kore ilo likiimakita naa le likae orere, nemeatae apake obo le ilo orere otaasa siaai te lperere la lasar.

¹⁴ Keibala ajo kore Laitoriani lang naa lmarei le Yuda eing'uaa, neitu eimaki Musa naipirita laitainok la lasar te ilo marei.

¹⁵ Kore aitoki ake, naa keibala oleng tankaraki nayewuo likae aitainoni la lasar otuwuana Melkisedek.

¹⁶ Naa ketaa Yeso laitainoni la lasar namara ana nayieu nkitanapat, kake ketaa to ngolon e nkichui nemeata nkiting'oto.

¹⁷ Amu kejo Lkigerot, <>

¹⁸ Kore tana naa keitaaki apa inia kitanapata musana meitoki, amu meitoki eidim, nemeata tipat.

¹⁹ Nemeitoki eitaa ꞉nkitanapat metaa meata ntioto, kake keichooki taata iyioo siligi oikach laa ninye kinyikakinyie Nkai.

²⁰ Kore aitoki, eitu eaku Laitainoni la lasar eitu eitai Nkai lekutuk ta nkarna enye koon. Ketaa lkulikae laitainok la lasar meatae nkarna naipotoki aaitainyie lekutuk,

²¹ kake ketaa Kristo Laitainoni la lasar payie eitai ꞉Nkai lekutuk eipot nkarna enye koon ejo, <>

²² Kore tankaraki ele lekutuk, neaku Yeso sipsip e lning'o likiata o Nkai.

²³ Naa kore aitoki apa, ketaa lkumo laitainok la lasar tankaraki natimitika lkiye ninche ebikoo.

²⁴ Kake kore amu kebik Yeso ntarasi naaku kera ninye Laitainoni la lasar laa ntarasi.

²⁵ Naaku keidim ninye katukul aitejeu lolo oopuonu neti Nkai eimaa ninye, amu keomonoki ꞉ninye ninche nkata pooki Nkai.

²⁶ Naaku taa ninye Laitainoni kitok la lasar likiyieu iyioo, ilo oara sinyati, nemeata nakurrieki, nemeata ntioto, netooroyieki taatua loo ng'ok, neiliepunyie ꞉Nkai ninye aitalang pooki ng'ae o pooki toki.

²⁷ Meata tipat payie eitai ninye lasar mparri o mparri ana neiko apa laitainok la lasar oaang'as tekue aitai lasar tankaraki ng'ok enche payie etum taa aitai tankaraki lkulie tung'ana. Kake keitayia apa Yeso koon aaku lasar nkata ake nabo tankaraki ltung'ana pooki.

²⁸ Kore nayieuni tee nkitanapat e Musa, naa kegeluni ltung'ana metaa laitainok la lasar abaki era ake ltung'ana oaachal, kake kore lekutuk oichorua Nkai tesiedi nkitanapat e Musa, naa ketegelua ꞉ninye Nkerai enye metaa laitainoni la lasar loosipat ntarasi.