Lburania 5 - Samburu

¹ Kore laitainoni kitok pooki la lasar naa taatua ltung'ana ake ootuwuana ninye egeluni, payie etum aitacheki ninche taa mbaa e Nkai, neichooyo nkichoorot o lasar le mpalikinoto ee ng'ok.

² Keidim ninye ateretu to mborron lolo lemeitoki eyielo netopong'ori, amu kore abaki ninye koon, naa keata ake nchalan naijo inia.

³ Naa kore tankaraki inia, meata ajo meitai ninye lasar tankaraki ng'ok enyena o noo lkulie tung'ana sii.

⁴ Meatae ltung'ani oitaa koon laitainoni kitok la lasar peechu ake naa Nkai nategelua, ana apa payie etegeluaki Aron.

⁵ Nejia sii etiu Kristo, eitu eitaa koon laitainoni kitok la lasar, kake Nkai natiaka, <>

⁶ Nejo aitoki Lkigerot Sinyat ta nkae ng'oji, <>

⁷ Kore apa ebikito Yeso tana kop, ketoomono neichiraki Nkai too lkiyio, inia Ai naaidim aitejeu atirichie lkiye. Nening Nkai nkomono enye tankaraki naurie ninye.

⁸ Kore abaki era ninye nkerai e Nkai, neyielou too sinaitin ootumo neiko tenening Nkai.

⁹ Naaku kore payie eisulieki, neaku ninye etumie pooki ng'ae oning ninye njeunoto ee ntarasi,

¹⁰ neitaa ꞉Nkai ninye laitainoni kitok la lasar ana neikununo apa Melkisedek.

Entodol ake emung'uaa nkurukoto

¹¹ Kore taa mbaa naaipirita ana bae, kaata duo lomon kumo lajo, kake kegol limunoto amu misiokiki aaning'u mbaa.

¹² Amu kore ntae naa keyiere apa nitaa laiteng'enak, kake ewuon ake iyieuu ltung'ani oiteng'en ntae mbaa naalelek e rerei le Nkai. Kore taata ewuon ake irara ltung'ana laa kule aapeny eidim aatamat alang ndaa nagol.

¹³ Naa kore pooki laa kule e lkina ake eichiwue naa ewuon era nkerai kini, nemeyielo atooro ntoki nadede o nemedede.

¹⁴ Kake kore ndaa nagol naa noo ltung'ana botoro ootomoo eiteng'en ate aatoor ndedei o sapare.