Lburania 3 - Samburu

Keikitok Yeso alang Musa

¹ Naaku taa, lalachera o nkanachera ainien sinyat, niking'ar tenebo nkipototo e chumata, entaparrai naa Yeso oara lkipaaret oiriwua ꞉Nkai nera laitainoni kitok la lasar, ilo laa ninye kiruk nikimbalie.

² Keisiligai apa ninye ta Nkai nategelua, ana apake naisiligai Musa too ltung'ana pooki le Nkai.

³ Kake ketoduaaki nchere kore Yeso, naa keiririkino nkanyit kitok alang Musa, ana ake payie eiririkino lachetani le nkaji nkanyit kitok alang inia aji natecheta.

⁴ Amu meata nkaji nemeata lachetani lenye, kake kore loitibira ntokitin pooki naa Nkai.

⁵ Naaku kesipa keisiligai apa Musa too ltung'ana pooki le Nkai ana laisiaayiani, neaku siaai lenye nkitodolunoto ee mbaa naalimuni kenya.

⁶ Kore sii ilo Aitejeunoni apa oanyutae naa keisiligai te nkitachekinoto ee ltung'ana le Nkai, amu kera ninye Nkerai e Nkai. Naa ikira iyioo lolo tung'ana lenyena tinikimbung aaitirrichaki ilo siligi lang liking'idare nimikincho metigilata iyioo ltauja.

Entodol eming'uaa nkurukoto

⁷ Naaku kore ana nejo Ltau Sinyati, <

⁸ emintogol nkuechi inchi, aany ining'ining Nkai, ana netaasa apa lmakui linchi mparri naaitimitu te lkees.

⁹ Te inie aatasaana ninche, abaki etoduaa asat ainien taa larin artam.

¹⁰ Naaku kaaitogorito lolo tung'ana najo,

¹¹ Naa inia paa kore to ngoro, naimie te lekutuk nchere, >>

¹² Entodol naa, lalachera o nkanachera, payie meatae ake lobo linchi oata ltau torno lemeiruk oibelekenya aing'uaa Nkai naichu.

¹³ Kake kore ntae entogoloto likae o likae mperot pooki, ewuon kiata nkata, payie meatae ake lobo linchi oaku ltung'ani ogol kue tankaraki nasapaa ꞉ng'oki.

¹⁴ Amu ikiata sotua tenebo o Kristo, tinikimbung aaitirrichaki inia sipata nikiata apake tekue payie kiruk ninye, ana metabau nkiting'oto e nkop.

¹⁵ Amu kejo lkigerot Sinyat, <>

¹⁶ Oo ng'ae apa lolo oaatanya ening Nkai abaki etining'o ltoilo lenye? Mara apake lolo ootirikua Musa aipung'unyie to nkop e Misiri?

¹⁷ Naa oo ng'ae apa etogorokine ꞉Nkai taa larin artam? Mara apa lolo oaataasa ng'ok, neye neperioo lpopoki lenche te lkees?

¹⁸ Naa oo ng'ae apa eitaka Nkai lekutuk nchere mejing katukul atua nkiyeng'iyeng'ata enye? Mara apake lolo oaatanya ening ninye?

¹⁹ Naaku ikidol naa aajo eitu eidim ninche aatum nkiyeng'iyeng'ata enye tankaraki nemeata nkurukoto.