Lburania 2 - Samburu

Emintololoki njeunoto e Nkai

¹ Kore tankaraki inia, keyiere nikimbung aaitirrichaki inia nikitining'o payie meiwuang'ieki ake neitopong'ori iyioo.

² Amaa tanaa kore nkitanapat naaichorua ꞉Nkai aimu lmalaikani neasicho, naa kore lotigila nenia kitanapat o ilo leitu ening Nkai neitemei ana nairirikino,

³ kaji kipokie iyioo tinikintololoki ana jeunoto nawuenyi natilimua apa Laitoriani, neitisipaki aitoki iyioo ꞉lolo ootining'o apa Laitoriani tee nkiyiaa enche?

⁴ Neitisipua sii Nkai ajo kedede inia limunoto enche tee asat naaitodolu nkitoo enye o mbaa e nking'asia o asat napaapaacha e ngolon enye o tee nkichoorot e Ltau Sinyati naaichorua ana nayieu ninye.

Ketaa Yeso ltung'ani payie eitejeu iyioo

⁵ Mara apa lmalaikani eichoo ꞉Nkai meitoria nkop nalotu, naa ninye taa kiimakita,

⁶ kake keigeroki too Lkigerot Sinyat ta nkae ng'oji aajo, <

⁷ Intodoyie ninye taa lmalaikani te nkiti kata, ninchopoki nkopiyia e nkitoo o ne nkanyit,

⁸ nitipika ntoki pooki taabori nkitoria enye.>> Kore payie eji etipika ntoki pooki taabori ninye, naaku meatae ntoki natung'ayie eitu epik taabori nkitoria enye. Naa kore eyia, ewuon mikidolita etii ntokitin pooki taabori ltung'ani.

⁹ Kake ikidolita Yeso, oitodowuaki te nkiti kata aaitaa kini taa lmalaikani, etipikaki nkopiyia e sinyaticho o ne nkanyit amu ketumo mion ana metua, paa kore te munyani e Nkai neye anang ltung'ana pooki.

¹⁰ Amu Keiririkino ta Nkai inia naa tankaraki ninye payie etii ntokitin pooki naa te ninye etaa ntokitin pooki, payie eicho Yeso, ilo laa ninye oatang'asua njeunoto enche, meitabai inia nayieu ninye te mion naimayie, nerikoo nkera enyena kumo metang'amu nkitoo enye.

¹¹ Kore Yeso o lolo ooitaa ꞉ninye sinyat, naa ilo Papa obo eing'uaa, tankaraki inia payie medol Yeso anyit teneipot ninche ajo lalachera o nkanachera enyena

¹² ejo, <>

¹³ Naa kore aitoki, <> Neitoki ajo, <>

¹⁴ Naaku kore amu nkera ee ltung'ana nenia kera naata seseni oaata nkiri o lodo, nelotu sii Yeso eata sesen otuwuana lenche, paa kore te lkiye lenye neoru chitani ngolon, naata apa nkitoria nayeunyie lkiye.

¹⁵ Nelaku lolo laa kore mperot pooki ee nkichoni enche netowuana era rrindiki le ng'ureticho e lkiye.

¹⁶ Nedede taa ajo mara lmalaikani eyewuo aret kake ichoi e Abraam.

¹⁷ Naaku tankaraki inia payie eitaaki too nkoitieii pooki ana lalachera o nkanachera enyena, payie etum ataa laitainoni la lasar oata lng'ur neisiligai te siaai le Nkai, netum Nkai atapaliki ltung'ana lenyena ng'ok.

¹⁸ Kore amu keimayie Yeso sina o ntemat, keidim atereto iyioo tinikitum ntemat.