Lburania 13 - Samburu

Nkutogoloto e siedi o nkirorokino

¹ Entewueni ichamama ana lalachera o nkanachera.

² Emirikino nkitoomono ee lomon, amu kore te inia oitiei keitoomonita lkulikae lmalaikani meyielo.

³ Entaparru lolo ooyena te jila atuwuana ienana o ninche, o lolo ooitamitae sina atuwuana ntae eitamitae.

⁴ Keyiere neyanyit pooki ng'ae nkiyema. Nemeata ajo meaku lpayian o ntomononi naaisiligai, amu keiguanare ꞉Nkai ltung'ani oboitere te sesen lpayian anaa ntomononi namara nenye o pooki ng'ae oas loloito.

⁵ Emiaku ltung'ana oaata lubo ee ropiyiani, enchoo eitiemu ntae ntoki niatata amu ketejo Nkai, <>

⁶ Naaku ikintieu aatejo, <>

⁷ Entaparru larikok linchi ootilikita ntae rerei le Nkai. Eng'ura lwuenet lenche, nirukuruk ana nairuko ninche.

⁸ Kore Yeso Kristo naa meibelekenya, kore netiu apake, nejia etiu taata, naa nejia etiu ntarasi.

⁹ Emincho eitopong'oo ntae mbaa kumo naapaachere nkiteng'ena ang. Keichiaakino metaa munyani e Nkai etumie ltauja lang ngolon, mara nkibung'ata ee nkitanapat naaipirita ndaa nemeret abaki lolo ooirukurukore nenia kitanapat.

¹⁰ Ikiata lperere la lasar laa kore lolo loowuon eitai lasar ta nkaji e Nkai e apa, nemeichooro metama nkitainot e lasar naatii lperere lang.

¹¹ Kore laitainoni kitok la lasar loo lyiaudi, naa keya lodo loo suom atua Ng'oji sinyati naaisul pooki ta nkaji e Nkai, meeitukoi ng'ok ee ltung'ana. Kore lpopoki lee nenia suom naaitainyieki lasar, nepejori ta aulo e inie ng'oji nemanya ltung'ana loo Isirael.

¹² Naaku kore sii Yeso ketama abaki ninye ꞉sina taulo e lkerenket payie eitisiny ltung'ana ꞉lodo lenye.

¹³ Maipung'o naa taatua nchula ee ltung'ana aapuo neti Yeso, niking'iri anyit natama apa ninye,

¹⁴ amu mikiata tene lkerenket obik, kake iking'oruta inia ang nalotu.

¹⁵ Naaku kore aimu Yeso, maitaki naa Nkai lasar le nkisisa nkata pooki, kimbalie nkarna enye too nkutukie aang.

¹⁶ Mirikino ias supati tanaa ing'arichiere lkulie, amu kore asat naijo nenia naa lasar oiting'id Nkai.

¹⁷ Entining larikok linchi nintodoyioyio ate taabori ninche, amu ntae eirrita eyielo aajo keipar kenya ꞉Nkai. Entining ninche payie etumoki ninche aataas siaai lenche te ng'ida meata long'unyung'unyi, amu mesupataki ntae inia.

¹⁸ Entoomonoki iyioo amu ikisip aajo mikiata nakurrieki iyioo, tankaraki ikiyieu nikias naaichiaakino taa mbaa pooki.

¹⁹ Kaamon ntae entoomon, oleng payie aachuku Nkai inie nitii too kuna naataana.

^20-21 Kore Nkai napeny seriani, /nailiepunyie Laitoriani lang Yeso Kristo ilo chekut kitok loo nkerra, taatua lootuata tankaraki naibukori lodo lenye oitibirie lning'o obik ntarasi, meeichoo ntae aiputaki ntoki pooki supat niyieuu payie itumtum aataas inia nayieu ninye. Meichoo naa ꞉Nkai Yeso Kristo metaasicho taatua iyioo payie kitum aataas inia naiting'id Nkai. Metaa nenye nkisisa ntarasi o ntarasi.

²² Kaomon naa ntae lalachera o nkanachera payie ing'iriri kuna baa naitaarriyianaka ntae tana palai, amu kaigeroka ake ntae to ndorropo.

²³ Kayieu niyielouu aajo ketalakuaki lalache lang Timoti te jila. Naa kore tanaa kesieku alotu natii, nalotu aisabaki ntae tenebo o ninye.

²⁴ Eroroki larikok linchi pooki o sinyat le Nkai. Keiroroki sii ntae lolo ooing'uaa nkop e Itali.

²⁵ Metaa munyani e Nkai tenebo o ntae pooki.