Lburania 12 - Samburu

Keitodolu wochoto e Nkai nchaman enye

¹ Naaku kore amu ikiata lturrur kitok loo ltung'ana le nkurukoto ooing'orita iyioo taa mbat pooki kikuetita, maiturrai naa ntoki pooki nairochi o inia ng'oki naonyikino iyioo oleng, nikindip inia kuetata e nkurukoto natii tekue iyioo te ng'iriata.

² Kore naa kikuetita, maimariria Yeso ilo oatang'asua neitabaya nkurukoto ang, laa kore peedol inia ng'ida natipikaki tekue ninye, neng'iri lkiye to lmusalaba neitu edol anyit. Kore taata naa kewuenita ta mbata e tetene e lorika le nkitoo le Nkai.

³ Entaparru newua sina oitamita ꞉ltung'ana loo ng'ok ninye! Entaparrai naa ninye payie minaururu negila ntae ltauja.

⁴ Kore inyaitata larrabal aaibooyo ng'ok, ewuon naa eitu imbooyoyo ana meibukori ntae lodo.

⁵ Amaa itirikinete katukul ilo rerei oitogol ntae irara nkera enyena, ilo ojo Lkigerot Sinyat, <

⁶ Amu keoch ꞉Laitoriani ilo oacham, neidong pooki ng'ae oara nkerai enye.>>

⁷ Enting'iria inia mion amu nkoitiei ake inia naitubulunyie Nkai ntae ana nkera enyena. Kaa kerai sa meiteme papa lenye?

⁸ Tana oitiei eitubulu Nkai nkera enyena, naa tanaa meitubulu ntae aiko nejia, naaku irara nkera naataluno, nimirara nkera enyena.

⁹ Kore ntoiwuo ang, naa keutaa iyioo nikining ninche, kebaa naa sa eyiere payie kiyanyit Nkai nara Papa laa ltauja lang payie kibik kinchu ntarasi?

¹⁰ Keitubulutua iyioo te nkini kata dorrop ana nadol ninche aajo keisupat, kake kore Nkai naa keitubuluta iyioo payie kitum inia nara supat aa taa sinyaticho enye.

¹¹ Kore nkata pooki naitemei iyioo, naa keme inia kata kake kore tesiedi neyau inia sotua oipida o Nkai oti seriani too lolo ooitemioki.

Mitum mayian e Nkai tinimiata sinyaticho

¹² Naaku ntogolo nkaik naatelepori o nkejek naatachalta.

¹³ Entoriori eima nkoitieii naaipida, payie merriaa ltardoi, kake payie eichiunyieki.

¹⁴ Entonyok oleng eng'oru seriani o ltung'ana pooki ning'oruru sii sinyaticho, amu tenemeata ltung'ani sinyaticho naa meidimai payie edol Laitoriani.

¹⁵ Entodol payie meti ake ltung'ani lemeikenakini munyani e Nkai, niminchocho ebulu ntanai torno e mion e ngoro naitanyamalicho, nerroyo ltung'ana kumo ta sayiet enye.

¹⁶ Emincho sii etumi ltung'ani oboitiere likae tung'ani te sesen mara nkitok enye anaa lpayian lenye ake, niminchocho etumi ltung'ani oparraa ake mbaa e nkop ana lkikau le Isaka oji Esao oitama apa njung'ore enye ndaa ewuon eichu menye.

¹⁷ Iyielolo naa aajo nyo natupukoka ninye te siedi, eitu etum ninye mayian ta papa lenye abaki etonyuaa ajo ing'oru too lkiyio amu merekure apa eata nabaki.

¹⁸ Eitu ipuonunu neti ldonyuo, anaa ng'oji neiyupuyup nkima, anaa ng'oji neti nkidis namismis, anaa neti naimin narok, neitu ipuonunu neti lkutati sapuk ana neikuna ltung'ana loo Isirael to ldonyuo le Sinai.

¹⁹ Ketining'o mowuo o ltoilo oirorita rereii. Kore payie ening ilo toilo, neomonu payie meigilieki aitoki likae rerei.

²⁰ Amu meidimare ninche inia naitanapichie Nkai ajo, <>

²¹ Kore inia nataase, naa keituriaicho ana natejo Musa, <>

²² Kake iotuo ntae Ldonyuo le Sion, inie netii nkang e Nkai naji Yerusalem te chumata netii lmalaikani nkalupini o nkalupini.

²³ Niotuo atua ilo turrur ong'ida loo inot le Nkai, ooichiaakino njung'ore e lkikau neigeroki nkarn enche te chumata, o netii Nkai nadung'oki pooki nkiguana, o netii ltauja loo loosipat lemeata ntioto neidipa nkuetata

²⁴ o netii Yeso oara laitutumoni le Nkai o ltung'ana te lning'o ng'ejuk o netii ilo odo oitukoo ng'ok neiro mbaa supati alang lodo le Abel oyieu neitalakicho Nkai to ngoro.

²⁵ Entodol naa ake emiany ilo oirorita amu tanaa eitu eim aras e kumojik ꞉lolo oaatanya ening Nkai eirorie to nkop, meata naa sii nikinko iyioo tinikilany ninye, tinikiany kining ltoilo lenye oing'uaa chumata.

²⁶ Kore apa inia kata, keikirikirie ꞉ltoilo lenye nkop, kake kore taata naa keinyiaaka aitai lekutuk ajo <>

²⁷ Kore kulo rereii oojo, <>, naa keitodolu ajo kore ntokitin pooki naaitibiruaki naa keikirikirieki neiwuang'ieki metaa ntokitin nemeigusugus ake aapeny naaitachoo.

²⁸ Naaku kore amu iking'amaa inia kitoria nemeigusugus, maichoo naa Nkai nache. Naa kore kiata nache, maisiaayia ninye to nkoitiei naiting'id ninye, kincho nkanyit nikiurie.

²⁹ Amu <>